Jašče adzin suśvietny aŭtavytvorca nazvaŭ pamyłkaj staŭku na elektramabili
Japonski aŭtavytvorca Nissan płanuje skaracić dzieviać tysiač supracoŭnikaŭ, 20% suśvietnych vytvorčych mahutnaściaŭ i 2,6 miljarda dalaraŭ vydatkaŭ, kab pasprabavać vyratavać kampaniju ad nastupstvaŭ niaŭdałaha rašeńnia.
Staŭka akazałasia projhryšnaj
Nissan možna nazvać adnym ź pieršaprachodcaŭ na sučasnym rynku elektramabilaŭ ź ich Nissan Leaf. Madel vyjšła ŭ śviet u 2010-m i zmahła stać davoli papularnaj. Ale heta pośpiechi «dziasiatych», kali kankurencyja na rynku «zialonych» aŭto faktyčna adsutničała. Mahčyma, mienavita pośpiech Leaf zhulaŭ zły žart, bo paŭtaryć pośpiech u Nissan nie atrymałasia.
Prodažy aŭto marki padajuć, japonski aŭtavytvorca nie vytrymlivaje kankurencyju ad amierykanskaj Tesla i kitajskich vytvorcaŭ elektramabilaŭ.
Tak, naprykład, u paraŭnańni z 2017 hodam prodažy Nissan u 2023-m skaracilisia na 40% i praciahnuli padać u 2024-m.
Hałoŭnaj pryčynaj finansavaj katastrofy Nissan kiraŭnictva nazvała admovu ad vypusku hibrydaŭ. Pa zaviaršeńni pandemii COVID-19 u Nissan vyrašyli zrabić staŭku całkam na elektramabili, hałoŭnym rynkam dla jakich pavinny byli stać ZŠA. Ale ŭ Štatach popyt u pieršuju čarhu pačaŭ raści na hibrydnyja aŭto, a nie na całkam elektryčnyja.
U kaho atrymałasia sprahnazavać trendy?
U toj ža čas, takija vytvorcy, jak Toyota, vyrašyli nie tolki raźvivać raspracoŭku elektrakaraŭ, ale i praciahvać rabić upor na vytvorčaść aŭtamabilaŭ z hibrydnymi ŭstanoŭkami.
Admietna, što hłava Toyota Akio Tajoda nieadnarazova vystupaŭ z krytykaj prymusovaj elektryfikacyi aŭtatranspartu. Biznesmien upeŭnieny, što aproč elektramabilaŭ treba raźvivać hibrydnyja aŭto, a taksama vadarodnyja technałohii. Samo zachapleńnie elektrakarami jon nazyvaje časovym trendam.
Statystyka pakazała, što rašeńnie Nissan z hałavoju akunucca ŭ raspracoŭku i vytvorčaść aŭto, jakija pracujuć vyklučna na elektryčnaści, akazałasia pamyłkovym.
Navat niahledziačy na płany ES, niekatorych štataŭ Amieryki i šerahu inšych krain zabaranić z 2035 hoda prodaž novych aŭto z ruchavikami na dyzieli, bienzinie i z hibrydnymi ŭstanoŭkami, prodažy elektrakaraŭ, zdajecca, dasiahnuli svajho piku ŭ 2023-m. U 2024 hodzie cikavać da ich pačała padać. Asabliva mocna heta nazirajecca ŭ ES.
Tym časam, popyt na hibrydy naadvarot raście, ale pakolki Nissan zrabiŭ staŭku nie na hibrydnyja aŭto, a na čystyja «elektryčki», to zadavolić hety popyt jany nie mohuć.
A što ŭ Jeŭropie?
Adnak Nissan daloka nie adziny aŭtavytvorca, chto adčuvaje finansavyja składanaści praz žadańnie jak maha chutčej admovicca ad vytvorčaści aŭto z tradycyjnymi i hibrydnymi ruchavikami i sam trend na elektryfikacyju. Składanaści adčuvajuć u tym liku takija hihanty, jak VW, jakija taksama vymušany iści na skaračeńnie vydatkaŭ i zakryćcio zavodaŭ.
Praź źnižeńnie popytu na elektramabili premium-kłasa niamiecki aŭtavytvorca Porsche vyrašyŭ adnavić raspracoŭku madelaŭ ź bienzinavymi ruchavikami.
Na hetym fonie ŭ ES usio čaściej pačynajuć hučać hałasy palitykaŭ, jakija vystupajuć za skasavańnie zabarony na rehistracyju novych aŭto z ruchavikami ŭnutranaha zharańnia (u tym liku hibrydaŭ) paśla 2035 hoda.
Kamientary