Яшчэ адзін сусветны аўтавытворца назваў памылкай стаўку на электрамабілі
Японскі аўтавытворца Nissan плануе скараціць дзевяць тысяч супрацоўнікаў, 20% сусветных вытворчых магутнасцяў і 2,6 мільярда даляраў выдаткаў, каб паспрабаваць выратаваць кампанію ад наступстваў няўдалага рашэння.
Стаўка аказалася пройгрышнай
Nissan можна назваць адным з першапраходцаў на сучасным рынку электрамабіляў з іх Nissan Leaf. Мадэль выйшла ў свет у 2010-м і змагла стаць даволі папулярнай. Але гэта поспехі «дзясятых», калі канкурэнцыя на рынку «зялёных» аўто фактычна адсутнічала. Магчыма, менавіта поспех Leaf згуляў злы жарт, бо паўтарыць поспех у Nissan не атрымалася.
Продажы аўто маркі падаюць, японскі аўтавытворца не вытрымлівае канкурэнцыю ад амерыканскай Tesla і кітайскіх вытворцаў электрамабіляў.
Так, напрыклад, у параўнанні з 2017 годам продажы Nissan у 2023-м скараціліся на 40% і працягнулі падаць у 2024-м.
Галоўнай прычынай фінансавай катастрофы Nissan кіраўніцтва назвала адмову ад выпуску гібрыдаў. Па завяршэнні пандэміі COVID-19 у Nissan вырашылі зрабіць стаўку цалкам на электрамабілі, галоўным рынкам для якіх павінны былі стаць ЗША. Але ў Штатах попыт у першую чаргу пачаў расці на гібрыдныя аўто, а не на цалкам электрычныя.
У каго атрымалася спрагназаваць трэнды?
У той жа час, такія вытворцы, як Toyota, вырашылі не толькі развіваць распрацоўку электракараў, але і працягваць рабіць упор на вытворчасць аўтамабіляў з гібрыднымі ўстаноўкамі.
Адметна, што глава Toyota Акіо Таёда неаднаразова выступаў з крытыкай прымусовай электрыфікацыі аўтатранспарту. Бізнэсмен упэўнены, што апроч электрамабіляў трэба развіваць гібрыдныя аўто, а таксама вадародныя тэхналогіі. Само захапленне электракарамі ён называе часовым трэндам.
Статыстыка паказала, што рашэнне Nissan з галавою акунуцца ў распрацоўку і вытворчасць аўто, якія працуюць выключна на электрычнасці, аказалася памылковым.
Нават нягледзячы на планы ЕС, некаторых штатаў Амерыкі і шэрагу іншых краін забараніць з 2035 года продаж новых аўто з рухавікамі на дызелі, бензіне і з гібрыднымі ўстаноўкамі, продажы электракараў, здаецца, дасягнулі свайго піку ў 2023-м. У 2024 годзе цікаваць да іх пачала падаць. Асабліва моцна гэта назіраецца ў ЕС.
Тым часам, попыт на гібрыды наадварот расце, але паколькі Nissan зрабіў стаўку не на гібрыдныя аўто, а на чыстыя «электрычкі», то задаволіць гэты попыт яны не могуць.
А што ў Еўропе?
Аднак Nissan далёка не адзіны аўтавытворца, хто адчувае фінансавыя складанасці праз жаданне як мага хутчэй адмовіцца ад вытворчасці аўто з традыцыйнымі і гібрыднымі рухавікамі і сам трэнд на электрыфікацыю. Складанасці адчуваюць у тым ліку такія гіганты, як VW, якія таксама вымушаны ісці на скарачэнне выдаткаў і закрыццё заводаў.
Праз зніжэнне попыту на электрамабілі прэміум-класа нямецкі аўтавытворца Porsche вырашыў аднавіць распрацоўку мадэляў з бензінавымі рухавікамі.
На гэтым фоне ў ЕС усё часцей пачынаюць гучаць галасы палітыкаў, якія выступаюць за скасаванне забароны на рэгістрацыю новых аўто з рухавікамі ўнутранага згарання (у тым ліку гібрыдаў) пасля 2035 года.
Цяпер чытаюць
Лукашэнка загадаў забараніць арганізаваныя паездкі дзяцей за мяжу без дазволу дзяржавы13
Каментары