U śviecie naradziłasia pieršaje dzicia, začataje dziakujučy novaj technałohii apładnieńnia
Novaja technałohija, jakuju śpiecyjalisty nazyvajuć revalucyjnaj, bolš efiektyŭnaja, biaśpiečnaja i dastupnaja za EKA.
Jak piša New Atlas, u Pieru naradziłasia pieršaje dzicia, jakoje było začataje z dapamohaj inavacyjnaj technałohii Fertilo, zasnavanaj na vykarystańni stvałavych kletak. Raspracoŭščykam źjaŭlajecca bijatechnałahičnaja kampanija Gameto.
Jak viadoma, mietodyka EKA ŭklučaje stymulacyju jaječnikaŭ harmanalnymi injekcyjami dla atrymańnia niekalkich jajcakletak, jakija zatym vymajuć i apładniajuć u łabaratoryi. Paśla piaci dzion raźvićcia embryjon pieranosiać u matku ŭ spadziavańni na toje, što ciažarnaść nastupić. Poŭny cykł zajmaje kala dvuch-troch tydniaŭ i moža ŭklučać da 90 injekcyj za adzin kurs.
Mietodyka Fertilo adroźnivajecca ad tradycyjnaha EKA tym, što zamiest harmanalnaj stymulacyi jaječnikaŭ dla atrymańnia śpiełych jajcakletak vykarystoŭvajecca praces vyroščvańnia niaśpiełaj jajcakletki ŭ asiarodździ z asobym typam padtrymlivalnych kletak, jakija dapamahajuć joj daśpiavać, imitujučy naturalny praces u arhaniźmie.
Hetyja padtrymlivalnyja kletki jaječnikaŭ (OSCs) stvarajucca ź indukavanych plurypatentnych stvałavych kletak (iPSCs) i adyhryvajuć rolu asiarodździa, jakoje zabiaśpiečvaje jajcakletcy patrebnyja ŭmovy dla raźvićcia.
U 2023 hodzie byli praviedzieny adpaviednyja daśledavańni, jakija vyjavili, što hetaja technałohija značna palepšyła paśpiavańnie jajcakletki i farmiravańnie embryjona.
Sami ž aŭtary kažuć, što jana źnižaje nieabchodnaść u harmanalnych injekcyjach na 80%, pamianšaje ryzyki, źviazanyja z hipierstymulacyjaj jaječnikaŭ, palahčaje pabočnyja efiekty i skaračaje praciahłaść lačeńnia z 2-3 tydniaŭ da troch dzion.
Jak adznačajuć śpiecyjalisty, Fertilo adkryvaje novyja mahčymaści dla bolš šyrokaha koła pacyjentak, jakija nie mohuć pieranosić ci nie chočuć prachodzić ciažkuju praceduru tradycyjnaha EKA, robiačy praceduru mienš ciažkaj i bolš dastupnaj.
Mietodyka ŭžo atrymała adabreńnie ŭ Aŭstralii, Japonii, Arhiencinie, Parahvai, Mieksicy i Pieru. Gameto aktyŭna rychtujecca da kliničnych vyprabavańniaŭ u ZŠA, što adkryvaje novy raździeł u vykarystańni technałohii iPSC u repraduktyŭnaj miedycynie.
Fertilo abiacaje stać revalucyjnym rašeńniem dla mnohich žančyn, prapanoŭvajučy dastupny, biaśpiečny i efiektyŭny sposab pieraadoleńnia prablem ź fiertylnaściu.
Ciapier čytajuć
Cichanoŭski ŭ Jelskim univiersitecie prapanavaŭ try elemienty stratehii ZŠA nakont Biełarusi30
Kamientary