Azierbajdžanski deputat: Rasija pavinna vybačycca za ataku na samalot Baku — Hrozny
U parłamiencie Azierbajdžana pryhrazili Rasii paharšeńniem adnosin praz chłuśniu ab padbitym nad Hroznym samalocie.
«Samalot byŭ źbity na terytoryi Rasii, u niebie nad Hroznym. I admaŭlać heta niemahčyma», — skazaŭ člen Kamiteta Mili Miedžlisa pa mižnarodnych adnosinach, palitołah Rasim Musabiekaŭ, kamientujučy ahienctvu Turan paviedamleńni miascovych ŚMI pra toje, što samalot AZAL, jaki vykonvaŭ rejs Baku — Hrozny 25 śniežnia, byŭ źbity rakietaj rasijskaha SPA.
Pavodle jaho słoŭ, u Rasii niekatoryja robiać peŭnyja dziejańni ŭ miedyja, kab zamieści ślady hetaha incydentu.
Adnak, na jaho dumku, zamiest hetaha rasijski bok pavinien dziejničać adekvatna situacyi i prynieści prabačeńni.
«Tyja, chto heta zrabiŭ, pavinny być pryciahnutyja da kryminalnaj adkaznaści, nieabchodna vypłacić kampiensacyi za hibiel ludziej i paciarpiełym. Kali hetaha nie budzie, to adnosiny, viadoma, pieraciakuć u inšuju płoskaść», — zajaviŭ Musabiekaŭ.
Jon nahadaŭ, što kali padčas 44-dzionnaj vajny 2020 hoda suprać Nahornaha Karabacha byŭ źbity rasijski vajenny viertalot, azierbajdžanski bok paprasiŭ prabačeńnia, zajaviŭ, što vinavatyja buduć pryciahnutyja da adkaznaści, i vypłaciŭ kampiensacyju.
«Takija cyvilizavanyja adnosiny. Kali pracuje SPA, to aeraport pavinien być zakryty, pavinna być apaviaščeńnie, kab tudy nichto nie lacieŭ. Tamu vinavatyja pavinny być pryciahnutyja da adkaznaści», — skazaŭ Musabiekaŭ.
Nahadajem, što ranicaj 25 śniežnia samalot Azerbaijan Airlines, jaki lacieŭ z Baku ŭ Hrozny, upaŭ blizu aeraporta Aktau na zachadzie Kazachstana. Na borcie łajniera było 67 čałaviek, u tym liku 37 hramadzian Azierbajdžana, 16 rasijanaŭ, šeść kazachstancaŭ i troje hramadzian Kyrhyzstana.
U avijakatastrofie zahinuli 38 čałaviek, 29 vyžyli. Stan siemiarych z tych, chto vyžyŭ, miedyki aceńvajuć jak vielmi ciažki.
Kamientary