Pasoł Ukrainy pa asablivych daručeńniach Ihar Kizim pakinuŭ svaju pasadu
Były pasoł Ukrainy ŭ Biełarusi Ihar Kizim pakidaje pasadu pasła pa asablivych daručeńniach pa Biełarusi. Pra heta jon paviedamiŭ u fejsbuku.
«Siońnia ja pryniaŭ rašeńnie zvolnicca z dypłamatyčnaj słužby i pajści «na zasłužany adpačynak» z čysta asabistych mierkavańniaŭ. U kožnaha čałavieka nadychodzić momant, kali razumieješ, što ŭzrost biare svajo i nielha addavacca svajoj pracy na 100 pracentaŭ. Ja nie mahu pracavać pa-inšamu, i ŭ ciapierašnich umovach liču heta niesumlennym u adnosinach da słužby, jakoj pryśviaciŭ amal usio svajo žyćcio», — napisaŭ jon.
Jon dadaŭ, što nie maje namieru «kidać usio i dałučacca da «kanapnych piensijanieraŭ», i ličyć, što zmoža prynieści karyść u tych śfierach, dzie dośvied i kampietencyi buduć karysnyja.
«Spadziajusia, kamuści jany spatrebiacca dla razumieńnia situacyi ŭ/vakoł Biełarusi, a taksama jaje mahčymaha raźvićcia. Miarkuju, što heta peŭny padsumak majoj «hramadskaj» pracy na pasadzie, jakuju pakidaju. Što budzie dalej — pahladzim. I ciapier ja chacieŭ by padziakavać svajoj siamji, usim maim siabram i kaleham, jakija padtrymlivali mianie ŭsie hetyja hady, niezaležna ad taho, što my razam pieražyli i jakija pasady zajmali. Dziakuj usim. Słava Ukrainie! Žyvie Biełaruś!» — reziumavaŭ jon.
U intervju dziaržaŭnamu ahienctvu «Ukrinform» Kizim nazyvaŭ hańbaj, što Ukraina nie vyrašyła pytańnie z pašpartami i inšymi dakumientami biełaruskich vajaroŭ: «Biełarusy — heta najbolšaja etničnaja hrupa ŭ šerahach Uzbrojenych sił Ukrainy. Jak tolki jany padpisvajuć kantrakt z USU i dałučajucca da adnaho ź biełaruskich farmavańniaŭ, u Biełarusi ich aŭtamatyčna pryznajuć terarystami.
A kali ŭ hetych ludziej zakančvajecca termin dziejańnia pašparta, ź jakim jany ŭjechali va Ukrainu, dla jaho pradaŭžeńnia treba iści ŭ biełaruskaje konsulstva. Jano tut nie pracuje, bo niama pasolstva».
Kamientary