«Ja nie dumała, što heta budzie nastolki doraha». Kolki hrošaj vydatkoŭvajuć blizkija palitviaźniaŭ na ich padtrymku ŭ SIZA i turmie?

U Nastaśsi (imia źmieniena) dvoje blizkich svajakoŭ znachodziacca ŭ SIZA ŭžo treci miesiac. Uvieś hety čas dziaŭčyna pieradaje kožnamu ź ich pa čatyry pasyłki ŭ miesiac, kładzie hrošy na ich rachunki i apłačvaje zdymnuju kvateru, u jakoj jany žyli. Tak minimalnaja suma vydatkaŭ u miesiac składaje 1500€ (5000 rub.).

«Ź ich kala 300 rub. idzie na pieravody, tamu što nie ŭsie rečy ź pieradačak prymajucca. Heta takaja łatareja: što ŭ vyniku dojdzie da źniavolenaha? Daviedajemsia my heta ŭžo ź listoŭ.

Pieravody patrebnyja, kab ludzi mahli kupić cyharety, myła, prakładki, tualetnuju papieru. Nakolki ja razumieju, u SIZA niama vialikaha limitu na tavary. Ale ŭ turmie, naprykład, možna kupić tolki adzin pačak prakładak u miesiac».

«U SIZA chutčej za ŭsio razychodzicca ježa»

«Sami pieradački vychodziać daražej, tamu što tam byvajuć zatratnyja kupli nakštałt termabializny, lekaŭ i vitaminaŭ. My sa svajakami starajemsia kuplać dabaŭki da ježy, klatčatku ŭ tabletkach — ale ŭ nas jaje pakul ni razu nie brali, i my praz heta pieražyvajem. Ciapier na pieradački dla dvaich u miesiac u nas idzie minimum 1000€ (3400 rub.). Kali jość mahčymaść, my starajemsia adpraŭlać bolš.

Chutčej za ŭsio ŭ SIZA tracicca ježa. Tamu my starajemsia kłaści ŭsiakija smakotki, jakija lubiać blizkija, sneki, ale kab heta było dobraj jakaści i nie chutka psavałasia. Pieradajem skanvordy, sudoku, razmaloŭki, papieru, ałoŭki — heta davoli chutka skančvajecca».

«Čerhi na pieradaču pasyłak raściahvajucca na ceły dzień»

«Nam vielmi pašancavała, što ŭsio jašče jość blizkija svajaki ŭnutry Biełarusi, jakija mohuć pieradavać pasyłki, — heta maja ciotka i stareńkaja babula. Adziny dzień dla pieradačak — paniadziełak. Heta maksimalna niazručna dla ludziej, jakija pracujuć. Tamu ŭ asnoŭnym pradukty pieradaje maja babula, ale dla jaje vielmi ciažka stajać u čarzie pa 5-6 hadzin.

Raniej ja nie viedała, što ludziej, jakija adnosiać pieradački, tak šmat: čerhi raściahvajucca na ceły dzień.

«Akramia pieradačak apłačvajem kredyty i zdymnaje žyllo»

«U maich blizkich ciapier idzie śledstva, tamu akramia pieradačak treba apłačvać advakata — jon moža prychodzić ad adnaho da čatyroch razoŭ na tydzień. Zaležyć ad taho, jak časta jaho vyklikajuć. Adzin vizit advakata abychodzicca ŭ 400 rub. Taksama, kali svajak traplaje ŭ SIZA abo turmu, jahonyja hrašovyja abaviazacielstvy pierachodziać na blizkich. Naprykład, u maich svajakoŭ byli kredyty, i, kab na ich ničoha nie visieła i ŭ budučyni nie było prablem, my ich vypłačvajem. U miesiac heta prykładna 500 rub. Da taho ž my apłačvajem zdymnuju kvateru, dzie žyli blizkija. Dla Minska heta nie vielmi vialikaja suma, kala 150$ (490 rub.)».

«Nie dumała, što mnie nastolki rana daviadziecca ŭtrymlivać svaju siamju»

«Ja razumieju, što znachodžusia ŭ pryvilejavanym stanoviščy. Ja nie žyvu ŭ Biełarusi, i ŭ mianie jość plus-minus stabilny zarobak. Ciapier bolšaja častka majho zarobku idzie niepasredna na ŭtrymańnie majoj siamji.

Kali ŭsio pačałosia, ja nie dumała, što heta budzie nastolki doraha.

Časam dumaju, što nie viedaju siemjaŭ u Biełarusi, jakija mohuć kožny miesiac vydzialać takuju sumu. Niachaj heta budzie 700€, ale navat stolki mnohija ludzi ŭ nas nie zarablajuć. Pa stanie zdaroŭja mnie treba rabić apieracyju, i ja jaje adkładaju, tamu što niama hrošaj.

Byvaje, chočaš sabie niešta kupić, a ŭ ciabie ŭ hałavie krucicca, što lepš adpravić pabolš hrošaj blizkamu. Ja nie dumała, što mnie nastolki rana daviadziecca ŭtrymlivać svaju siamju».

CityDog.io pahavaryŭ z aktyvistami inicyjatyvy, jakaja dapamahaje svajakam palitviaźniaŭ źbirać pasyłki ŭ SIZA i kałonii. Sa słoŭ aktyvistaŭ, za apošnija hady košt pieradačak vyras. Časam siemji addajuć pa 3500 rub. za pasyłki ź ježaj i adzieńniem.

— U kolki siamji palitviaźnia abychodzicca jaho ŭtrymańnie ŭ turmie?

— Zaležyć ad taho, pra jakija pasyłki i pieradačy my havorym.

Naprykład, da suda čałavieku pad vartaj mohuć pieradavać rečy i pradukty kožny miesiac. Uličvajučy, što vaha pasyłak pa pošcie nie ŭvachodzić u ahulnuju ličbu dazvolenaj vahi, jakuju pryniasuć rukami, to možna siabie nie abmiažoŭvać. Rečy, naprykład, adpraŭlajuć pasyłkaj, jak i niešta ciažkaje, a rukami prynosiać śviežaje i samaje nieabchodnaje.

Pa našamu vopytu, u 2024 hodzie ŭ siarednim vydatki skłali kala 500-700 rub. tolki na pieradačy.

Taksama asobny artykuł vydatkaŭ — heta kali čałavieku dajuć pazbaŭleńnie voli pa vynikach suda i jaho źbirajuć u kałoniju, pakul jon jašče fizična znachodzicca ŭ SIZA. Niekatoryja vyrašajuć pierastrachavacca i adrazu vysłać u SIZA toje, što budzie treba čałavieku ŭ kałonii: čornuju vopratku, termabializnu, hadzińnik, elektrabrytvu, abutak.

Praŭda, i tut jość svaje niuansy: na etapie heta dadaje vahi torbam, i heta fizična składana, bo čaściej za ŭsio ludzi niasuć svaje rečy ŭ kajdankach.

— Ci pavialičyŭsia košt pasyłak, kali paraŭnoŭvać z 2020 hodam?

— Viadoma, pryčym značna. Kali ŭ 2020-m mahčyma było sabrać dobruju pieradaču na 500 rub., to ciapier heta nierealna. My niadaŭna dapamahali źbirać pieradačy, i košt adnoj vyjšaŭ 1500 rub., a siamji treba było adpravić dźvie — rečavuju i praduktovuju. Razam pryjšłosia vydatkavać 3500 rub.

Pryčym ludzi nie zakuplajuć niešta ŭ darahich kramach, zvyčajna šukajuć na źnižkach, dzieści na rynku, dzieści z anłajn-kram — imknucca maksimalna aptymizavać vydatki.

— Što blizkija adpraŭlajuć palitviaźniam?

— Dazvolenaja praduktovaja pieradača — 50 kh. Źbirajuć jaje tak, kab čałavieku chapiła na doŭhi pieryjad. U jaje imknucca pakłaści:

• kaścium;
• čaraviki, tapki;
• roznyja varyjanty vuściłak;
• krem dla abutku;
• sšytak;
• kanviert;
• viachotku;
• brytvu, stanki dla źmieny;
• myła, parašok, krem, dezadarant;
• tualetnuju papieru.

U praduktovych pasyłkach adpraŭlajuć:

• da 10 kiłahramaŭ miasa, kaŭbasy, sała;
• syr;
• šmatki (hračanyja, rysavyja),
• suchoje piure;
• pryprava;
• kakava, kava, čaj;
• arechi;
• suchafrukty;
• šakaład, cukierki, piečyva;
• cyharety;
• harodninu i sadavinu.

— U SIZA i kałonijach pracujuć śpiecyjalnyja kramy. U niekatorych ź ich možna zakazać pradukty anłajn. Nakolki asartymient takich kram dazvalaje pakryć patreby źniavolenych?

— Takaja pasłuha jość nie va ŭsich kałonijach. Ale, naprykład, anłajn-krama jość u papraŭčaj kałonii №17 u Škłovie. Vybar tavaraŭ tam, viadoma, mienšy, čym u hipiermarkietach. I ŭsio ž lepš, kali takaja mahčymaść isnuje, tamu što nie ŭsie fizična mohuć advieźci pieradaču.

My šmat razoŭ dapamahali ludziam z tym, kab advieźci ŭ kałoniju sumki z praduktami, — i heta asobnaja historyja. Kali piensijanierka žyvie ŭ vioscy ŭ Homielskaj vobłaści, a syn adbyvaje pakarańnie ŭ Viciebsku, to heta niaprosta.

Tamu byvaje, što lepš kupić siertyfikat. Niekatoryja vydatkoŭvajuć pa 1500 rub. na siertyfikaty, kab palitviazień moh kupić u kramie toje, što jamu treba. Asabliva heta aktualna dla tych, u kaho blizkija nie zmahli zastacca ŭ Biełarusi i bolš niama mahčymaści samim źbirać pieradačy. Tamu takija kramy zastajucca adzinym vychadam, kab padtrymać svaich blizkich.

— Ź jakimi ciažkaściami pry zbory i pieradačy pasyłak sutykajucca blizkija?

— Zaŭsiody jość finansavyja składanaści, tamu što heta davoli nakładna. A jašče bolš nakładna, kali pieradačy supadajuć pa tajminhu. Kab paźbiehnuć hetaha, mnohija pačynajuć źbirać pasyłki zahadzia i kuplać patrochu. Jość siemji, jakija kruhły hod źbirajuć pieradačy.

Časam siemji saromiejucca i admaŭlajucca ad dapamohi, jakuju prapanujuć aktyvisty i inicyjatyvy. Tamu maja adzinaja parada — nie admaŭlacca ad padtrymki. Budzie lahčej.

• 1
• 0
• 1
• 3
• 1
• 6
• 0
• 0