U pačatku 2025 hoda ŭ minskim ofisie pracavała kala 150 śpiecyjalistaŭ. U studzieni niekatorym ź ich, u tym liku tym, chto mieŭ doŭhaterminovyja kantrakty, kiraŭnictva paviedamiła pra skaračeńni.
Rakuten Viber skaraciła častku minskaj kamandy i, imavierna, spyniła najm u Biełarusi. Zatoje kampanija nabiraje supracoŭnikaŭ u Polščy, dzie płanuje adkryć ofis u 2025 hodzie, piša Devby.io
Viber — adzin z apošnich viadomych praduktavych IT-prajektaŭ, jaki na fonie apošnich kryzisaŭ praciahvaŭ paŭnavartasnuju pracu ŭ Biełarusi. R&D-ofis u Minsku pracuje z 2012 hoda. Dla mnohich, navat dalokich ad IT ludziej, hety brend tryvała asacyjujecca ź biełaruskim IT, niahledziačy na jaho izrailskija karani.
U pačatku 2025 hoda ŭ minskim ofisie pracavała kala 150 śpiecyjalistaŭ. U studzieni niekatorym ź ich, u tym liku tym, chto mieŭ doŭhaterminovyja kantrakty, kiraŭnictva paviedamiła pra skaračeńni.
Supracoŭniki, ź jakimi devby zmoh pahavaryć ananimna, ličać, što skaracili nie mienš za 5% ad usioj kamandy.
Najbolš raspaŭsiudžanaje mierkavańnie: skaračeńni źviazanyja z aptymizacyjaj vydatkaŭ paśla błakiroŭki Viber u Rasii ŭ kancy 2024 hoda — kampanija straciła značnuju častku karystalnikaŭ.
Mieniedžmient, pa słovach krynic, u asabistych razmovach z tymi, kaho płanavali skaracić, vykazvaŭ pretenzii da ich pracy. Prapanoŭvali syści «pa pahadnieńni bakoŭ», davali čas na pošuk novaj pracy, vypłačvajučy zarobak za 2 miesiacy.
«Mnie, naprykład, paviedamili, što pavodle vynikaŭ hadavoha ahladu ŭ mianie vyjšła nie vielmi vysokaja acenka. Ale nichto nie ahučvaŭ kankretnych ličbaŭ i kryteryjaŭ. Pry hetym usie zadačy vykonvalisia svoječasova. Atrymlivajecca, što letam usio było dobra, a ŭzimku — na maroz», — padzialiŭsia adzin z byłych supracoŭnikaŭ.
Adnačasova Viber faktyčna spyniŭ najm u Biełarusi. Na aficyjnym sajcie kampanii zastałasia tolki adna vakansija — Content Validation Specialist.
«Jašče ŭ kancy 2024 hoda na sajcie kampanii byli vakansii ŭ Minsku. Ale ŭžo ŭ pačatku 2025-ha jany źnikli, zatoje źjavilisia prapanovy pracy ŭ Varšavie».
Častka supracoŭnikaŭ Viber ź Minska chacieła pierajechać u Polšču, niekatoryja zrabili heta jašče ŭ 2020 hodzie praz prahramu Polskaja karta (PBH).
«Zdajecca, u druhoj pałovie 2023-ha abo na pačatku 2024-ha top-mieniedžmient abmiarkoŭvaŭ mahčymaść adkryćcia ofisa ŭ Polščy. Navat pryjazdžała vysokaje načalstva ź Izraila. Ale tady skazali, što doraha — siadzicie abo ŭ Minsku, abo ŭ Hruzii. Vierahodna, paśla błakiroŭki Viber u Rasii kampanija pierahledzieła svaje płany», — raspavioŭ adzin z supracoŭnikaŭ.
U polski ofis płanujuć nabrać 50 śpiecyjalistaŭ.
Pavodle adnoj krynicy, Viber nie prapanoŭvaŭ minskim supracoŭnikam rełakavacca ŭ Polšču. Zhodna ź inšaj krynicaj, kampanija šukaje śpiecyjalistaŭ, jakija ŭžo majuć IP (JDG) u Polščy, afarmlaje pa madeli B2B.
Novym supracoŭnikam u Varšavie prapanujuć hibrydny farmat pracy i kampiensacyju parkoŭki (kala 150 jeŭra ŭ miesiac), kali adkryjecca ofis.
«Ad ludziej, jakija ŭžo atrymali ofier, ja čuŭ, što Viber prapanuje zarpłaty pa nižniaj miažy rynku. Akramia taho, štohadovaja premija ŭ Polščy, vierahodna, budzie nižejšaj, čym u Biełarusi», — adznačyŭ adzin z surazmoŭcaŭ.
Pakul niama prykmiet, što Viber całkam zakryvaje ofis u Biełarusi. Ale supracoŭniki nie ŭpeŭnienyja ŭ svaich doŭhaterminovych pierśpiektyvach.
Niekatoryja čakajuć novych skaračeńniaŭ, inšyja — prapanovy pra pierajezd.
«Usio vyhladaje tak, što, acaniŭšy ryzyki paśla błakiroŭki ŭ RF, Viber vyrašyŭ pastupova pieranosić asnoŭnyja raspracoŭčyja mahutnaści ŭ Polšču».
Kamientary