Teletranślacyja sa stadyjona ŭ Minsku, jaki ŭ 2021 hodzie adkryvaŭ Łukašenka, «niebiaśpiečnaja dla zdaroŭja apierataraŭ»
13 sakavika ŭ Biełarusi startavaŭ novy futbolny siezon: prajšoŭ pieršy tur sioletniaha čempijanatu krainy. Miž tym u efiry spartyŭnaha telekanała «Biełaruś 5» nivodzin matč nie pakazali. Heta «vyklikała vialiki hramadski rezanans», a tamu na telekanale patłumačyli, čamu tak adbyłosia, piša «Priessboł».
Pieradusim televizijščyki kivajuć na techničnyja prablemy. Maŭlaŭ, da 1 maja rehłamient dazvalaje kamandam pravodzić matčy na stadyjonach sa štučnym pakryćciom, a jany zvyčajna nie prystasavanyja da patreb teletranślacyi.
Ździŭlaje, adnak, što da takich abjektaŭ naležyć i minski stadyjon, jaki z pompaj u pačatku vieraśnia 2021 hoda adkryvaŭ sam Łukašenka:
«Čempijon krainy ŭ centr stalicy pakul pierabiracca nie płanuje i tulicca na ŭskrainie Minska, na stadyjonie «Dynama-Juni». Adtul telepakaz niemahčymy i, jak pakazała detalovaje abśledavańnie areny, niebiaśpiečny dla zdaroŭja apierataraŭ i techničnaha piersanału», — havorycca pra matč minskaha «Dynama» z kłubam «Smarhoń».
Miž tym u 2021 hodzie padčas adkryćcia z udziełam Łukašenki prapahandysty zachoplena raśpisvali pieravahi hetaha abjekta, jaki da taho rekanstrujavaŭsia ažno 10 hadoŭ:
«Na terytoryi stadyjona funkcyjanujuć try pali sa štučnym pakryćciom i źniešnim aśviatleńniem, trybuny na 5,2 tys. hledačoŭ, punkty hramadskaha charčavańnia, kabiniet mieddapamohi, zała dla pres-kanfierencyj, pakoj dopinh-kantrolu, administracyjna-bytavy błok, jaki ŭklučaje 13 hatelnych numaroŭ na 28 čałaviek dla pastajannaha pražyvańnia i navučańnia talenavitych dziaciej z rehijonaŭ Biełarusi, dva abstalavanyja navučalnyja kłasy, trenažornaja zała».
I voś z takoha zusim śviežaha «navaročanaha» abjekta, akazvajecca, arhanizacyja tranślacyi nie tolki niemahčymaja, ale navat i niebiaśpiečnaja dla zdaroŭja ludziej, jakija sprabavali b jaje arhanizavać.
Ciapier čytajuć
Vyjšaŭ na svabodu biełarus, jakoha ŭ svoj čas prysudzili da pažyćciovaha źniavoleńnia. Heta pieršy viadomy taki vypadak8
Kamientary