Pamiatajecie stvaralnika adyjoznaha sajta «Litkrytyka», jaki byŭ palitviaźniem? Zdajecca, jaho aryštavali znoŭ

«Kali vy čytajecie hety list, sa mnoj niešta adbyłosia». Takoje pasłańnie ad siaredziny lutaha 2025 hoda visić na sajcie «Litkrytyka», jaki vioŭ 74-hadovy eks-supracoŭnik KDB i eks-palitviazień Alaksandr (Aleś) Novikaŭ. Ni jaho sajt, ni sacsietki bolš nie abnaŭlajucca.

Novikaŭ byŭ adnym z samych niezvyčajnych biełaruskich palitviaźniaŭ — čałaviek, jaki hadami plažyŭ dziejačaŭ biełaruskaha nacyjanalnaha ruchu, a paśla kardynalna źmianiŭ pazicyju i staŭ krytykavać Alaksandra Łukašenku i rasijskuju ahresiju.

Jon vyzvaliŭsia z kałonii №3 Viciebska ŭ mai 2024 hoda, pravioŭšy za kratami amal dva hady pa palityčnym matyvavanym prysudzie — za «raspalvańnie varožaści», a taksama za raspaŭsiud źviestak pra asabistaje žyćcio (Novikaŭ apublikavaŭ u fejsbuku fotazdymki i imiony amapaŭcaŭ).

Novikaŭ nie źmiryŭsia z prysudam i adsiedžanymi hadami, praciahvaŭ pisać bieźlič skarhaŭ, pra što spravazdačyŭsia ŭ sacsietkach. Jon patrabavaŭ zavieści kryminalnyja spravy na śledčaha i sudździu, jakija zajmalisia jaho papiaredniaj spravaj, a taksama praciahvaŭ zavočnuju vajnu z eks-kiraŭnikom prałukašenkaŭskaha Sajuza piśmieńnikaŭ Biełarusi Mikałajem Čarhincom, jakoha ličyŭ vinavatym u svaim turemnym terminie.

Pavialičyć

U śniežni 2024 hoda Novikava vyklikali ŭ homielski HUBAZiK, a taksama praviali pieratrus i zabrali kampjutar. Havorka išła pra toje, što jon dapuskaŭ niehatyŭnyja vykazvańni ŭ adnosinach namieśnika hienieralnaha prakurora Stuka, sudździ Viarchoŭnaha suda Kavalčuka, sudździ Homielskaha abłasnoha suda Piskunova i Čarhinca, a taksama paviedamlaŭ nibyta chłuślivyja źviestki ab pravavym pałažeńni hramadzian i dziejnaści dziaržaŭnych orhanaŭ.

U lutym 2025 hoda Novikaŭ napisaŭ u fejsbuku, što na jaho zaviali kryminalnuju spravu za paklop:

«Padobna, u śledčym padraździaleńni Homiela (u jakim — mnie nie viadoma), u suviazi z tym, što ja abaraniaŭsia i pisaŭ skarhi (pra heta cynična zajaŭlaje supracoŭnik HUBAZiK), zaviedziena kryminalnaja sprava ŭ dačynieńni da mianie, i fabrykujucca jaje materyjały. Pačalisia dziejańni ŭ styli 1937 hoda. Jak mnie stała viadoma, sprava zaviedziena pa art. 188 KK RB. Heta nazyvajecca «cyrk na drocie». Navat cikava, jak jany jaho sfabrykujuć. Vo ŭlapalisia!»

17 lutaha 2025 hoda jaho błoh abnaviŭsia apošni raz. Što ciapier ź jaho aŭtaram, nieviadoma. Mahčyma, Novikaŭ u SIZA. Adkaznaść za «paklop» (artykuł 188 KK Biełarusi)— ad štrafu da 3 hadoŭ kałonii.

• 0
• 0
• 0
• 6
• 1
• 6
• 3
• 0