Z rachunku fondu Anžaliki Mielnikavaj źniali hrošy. Nieviadoma, ci jana sama

Pavodle krynicy «Biełsata» ŭ Ministerstvie zamiežnych spraŭ Polščy, hrošy z rachunku fondu Anžaliki Mielnikavaj źniali. Zrabiła heta Mielnikava sama, a kali tak, to ci pa svajoj voli, ci pad prymusam, nieviadoma.

Jak paviedamlałasia raniej, na rachunki fondu Białoruś Liberty, zasnavanaha Mielnikavaj, byli pieraviedzienyja hrošy dla Kaardynacyjnaj rady i «Kibierpartyzanaŭ». Pavodle damovy z donaram, KR nie raskryvaje źviestak. Dla «Kibierpartyzanaŭ» byli pieraviedzienyja niekalki dziasiatkaŭ tysiač dołaraŭ, dostupu da rachunku ŭ «Kibierpartyzanaŭ» niama.

Pradstaŭnica «Kibierpartyzanaŭ» Juljana Šamietaviec raskazała «Biełsatu»: 

«My nie možam dakładna skazać, ci zdymała Anžalika niejkija hrošy z rachunku fundacyi, bo nie majem dostupu da jaho. Ciapier my pracujem nad tym, kab atrymać hety dostup. Kali jon budzie atrymany, zmožam dakładna vyznačyć, ci zdymalisia hrošy, kolki i kali. Apošni raz, kali my praviarali rachunak, na im byli tolki srodki, źviazanyja z prajektami «Kibierpartyzanaŭ», i ich zastavałasia niašmat».

Vykanaŭca abaviazkaŭ śpikierki KR Stasia Hlińnik skazała «Biełsatu», što takoj infarmacyi ŭ KR nie majuć.

Pres-słužba Narodnaha antykryzisnaha ŭpraŭleńnia, kiraŭnik jakoha Pavieł Łatuška kantaktuje z polskimi pravaachoŭnikami ŭ spravie źniknieńnia Mielnikavaj, prakamientavała «Biełsatu»:

«My nie majem dačynieńnia da hetaha fondu. My nie viedajem, dzie, kali i jakaja suma była źniataja, a taksama čyje heta byli hrošy. U nas niama infarmacyi, jakaja mahła b dapamahčy rastłumačyć hetyja pytańni. Taksama nam nie pastupała nijakaj aficyjnaj infarmacyi ad pravaachoŭnikaŭ pa hetym pytańni».

Fond «Białoruś Liberty» tym časam źmianiŭ kiraŭnika: z 9 krasavika staršyniom staŭ Vital Paciechin, były vajskoviec, jakoha ŭ Biełarusi zavočna asudzili pavodle abvinavačvańnia ŭ atacy drona na bazu AMAP. Pradstaŭnica «Kibierpartyzanaŭ» Juljana Šamietaviec paćvierdziła «Biełsatu», što pryznačyła jaho kiravać fondam.

Pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.

7 krasavika žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami ničoha nie viedajuć i tryvožacca.

• 0
• 0
• 16
• 22
• 4
• 5
• 4
• 0