Ci pahražaje ŭzłom akaŭnta Mielnikavaj tym, chto hałasavaŭ na vybarach u Kaardynacyjnuju radu? Adkazvaje Libier
Uschvalavanaja vice-śpikierka Kaardynacyjnaj rady Stasia Hlińnik paviedamiła pra toje, što jašče 13 sakavika nieviadomyja vyhruzili z akaŭnta źnikłaj śpikierki Anžaliki Mielnikavaj fajły, jakija tyčylisia dziejnaści KR. Stratehičny płan, biudžet, dakłady… I kali vykradańnie stratehičnaha płana KR biełaruskimi śpiecsłužbami — heta niešta z razradu palityčnaha aniekdota, to jak sprava z sapraŭdy adčuvalnaj rečču — asabistymi danymi ŭdzielnikaŭ hałasavańnia ŭ protaparłamient?
«Pa-pieršaje, na momant vybaraŭ [na čale KR] jašče nie było nijakaj Mielnikavaj», — supakojvaje ajcišnik Pavieł Libier, da jakoha z adpaviednym pytańniem źviarnułasia «Naša Niva». Padčas praviadzieńnia vybaraŭ u Kaardynacyjnuju radu Libier arhanizoŭvaŭ techničny bok hałasavańnia.
«Pa-druhoje, nichto z KR nie mieŭ dostupu da piersanalnych danych. Pa-treciaje, u pryncypie nie isnuje niejkaj centralnaj bazy ŭdzielnikaŭ hałasavańnia, jakuju možna vykraści, vykupić ci ŭzłamać.
Usie piersanalnyja źviestki zastavalisia ŭ telefonach karystalnikaŭ i nikudy nie ściakalisia. Hałasavali ludzi chešam — unikalnym ličbavym adbitkam, u jaki pieraŭtvaralisia ich asabistyja danyja. Nabor ličbaŭ, simvałaŭ i litar.
Tak što, adkaz: nie, uzłom Mielnikavaj nijakim čynam nie pahražaje tym, chto prahałasavaŭ», — reziumavaŭ Libier.
Pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.
7 krasavika žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami nibyta ničoha nie viedajuć.
Vykanaŭca abaviazkaŭ śpikierki Kaardynacyjnaj rady Stanisłava Hlińnik 8 krasavika paviedamiła, što była atrymanaja infarmacyja, «jakaja tyčycca biaśpieki ŭsioj Kaardynacyjnaj rady».
Padčas dadatkovaj pravierki było paćvierdžana, što 13 sakavika z akaŭnta Anžaliki Mielnikavaj byli spampavanyja fajły, da jakich jana mieła dostup u ramkach pracy Kaardynacyjnaj rady. Siarod ich — stratehičny płan, biudžet, unutranyja dakłady i inšyja apieracyjnyja materyjały, pačynajučy ź lipienia 2024 hoda.
Paćvierdziłasia taksama infarmacyja pra toje, što telefon Mielnikavaj 19 sakavika pracavaŭ z terytoryi Biełarusi.
Kamientary
..cy v hłaza a im bożja rosa