Maładaja akciorka Kołasaŭskaha teatra začapiła ludziej svaim vykazvańniem pra biełaruskuju movu
Ksienija Kaminskaja raniej pracavała ŭ słužbie pratakoła Łukašenki.
Tyktok-kanał Vitebsk Live zavitaŭ u biełaruskamoŭny Kołasaŭski teatr u Viciebsku, adzin z najstarejšych teatraŭ Biełarusi, kab pahladzieć, čym žyvuć akciory. Havorka zajšła pra toje, što ŭ teatry ŭsio pa-biełarusku.
«Kali drenna viedaješ biełaruskuju movu, impravizavać składana. Tak, my na joj pracujem, usio razumiejem, što havorym. Ale znajści słova-sinonim, kali svajo niejkaje zabyŭ, maładomu pakaleńniu, jakoje horš viedaje biełaruskuju movu, na ruskaj było b praściej», — adkazała maładaja artystka teatra Ksienija Kaminskaja.
Watch on TikTok
U razmovu z paradaj umiašaŭsia viadučy redaktar teatra Alaksandr Zamkoŭski, jaki raniej kiravaŭ litaraturna-dramatyčnaj častkaj:
«Tamu kožny raz raju artystam pačynać razmaŭlać na biełaruskaj movie za paŭhadziny da vychadu na scenu. Mozh pieraklučajecca, i ty prosta sam pieraklučaješsia. Niechta robić, niechta nie robić. Starym artystam praściej, maładym składaniej», — adznačyŭ Zamkoŭski.
«Byvała takoje, što z majstram uvieś čas havoryš na biełaruskaj movie, i ty, kali [paśla] havoryš na ruskaj, [dumaješ] — «jak hetaje słova pa-rusku?» Toje ž samaje byvaje i tut, u teatry. Kali ty stabilna miesiac pracuješ nad śpiektaklem, to pačynaješ i ŭ žyćci aŭtamatyčna razmaŭlać pa-biełarusku. Zusim nie śpiecyjalna, nie kab vypiendryvacca, što ja mahu razmaŭlać pa-biełarusku, a prosta mašynalna», — dałučyŭsia da dyskusii 21-hadovy Dźmitryj Filimonienkaŭ, jaki pracuje ŭ teatry z 2021 hoda.
Kamientataraŭ pad videa ŭ tyktoku aburyła, što akciory biełaruskaha teatra nie vałodajuć movaj svajho naroda i nie karystajucca joj u žyćci.
«Dyk bolš čytajcie pa-biełarusku, bolš razmaŭlajcie. U čym prablema?»
«Na maju dumku, kali ty pracuješ u biełaruskim teatry, pjesy staviacca na biełaruskaj movie, i razmaŭlać pavinien na biełaruskaj jak rodnaj movie, tolki ŭ honar taho, što ty słužyš u teatry».
«Krychu strašna za toje, što takija razmovy ŭ pryncypie ŭźnikajuć».
«Nie razumieju, čamu ŭsim tak ruskaja mova sałodkaja, što svajoj curajucca», — dadała praŭładnaja błohierka Zoja Sierada.
Chto hetaja akciorka?
Dziaŭčyna ŭ videa — 24-hadovaja aktrysa Ksienija Kaminskaja, jakaja pracuje ŭ Nacyjanalnym akademičnym dramatyčnym teatry imia Jakuba Kołasa z 2021 hoda. Kaminskaja naradziłasia ŭ Vilejcy, vučyłasia ŭ Viciebskim dziaržaŭnym kaledžy kultury i mastactvaŭ, paśla praciahnuła vučobu ŭ Biełaruskaj dziaržaŭnaj akademii mastactvaŭ.
Kaminskaja viadomaja ŭ Viciebsku błohierka, u jaje akaŭncie ŭ instahramie bolš za 180 tysiač padpisčykaŭ, 100 tysiač ź jakich, pavodle jaje słoŭ, jana zrabiła za dva miesiacy. U kancy minułaha hoda Kaminskaja navat paŭdzielničała ŭ biełaruskim realici-šou «Fabryka błohieraŭ».
U šapcy profilu paznačana, što jana akciorka teatra, ale nidzie nie ŭdakładniajecca jakoha. Jakija-niebudź dopisy, zroblenyja pa-biełarusku, u aktrysy Kołasaŭskaha teatra my adšukać nie zmahli.
Samaja prykmietnaja detal bijahrafii Ksienii Kaminskaj — praca ŭ słužbie pratakoła administracyi Łukašenki. 18-hadovaja dziaŭčyna, apranutaja ŭ narodny stroj, vitała vysokich haściej chlebam-sollu, a taksama supravadžała aficyjnych asob na mierapryjemstvach.
«Naša Niva» — bastyjon biełaruščyny
PADTRYMAĆ-
«Baimsia, što jaje nie vypuściać ź Biełarusi». Baćki minskich padletkaŭ raskazali, jak škoły kantralujuć płany pastupleńnia ich dziaciej
-
«Čałaviek, zaniaty lubimaj spravaj, nie stareje». Biełarus robić u Polščy rycarskija daśpiechi pa 15 tysiač jeŭra
-
«Zachvareŭ? Idzi ŭ chram». Andrej Lemiašonak raskazaŭ, jak zaražaŭ ludziej na Vialikdzień 2020 hoda
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta10
Kamientary