Na volu vyjšaŭ palitviazień z Homiela, jakoha sudzili pa ciažkich artykułach
Pravaabaroncy daviedalisia pra raptoŭnaje vyzvaleńnie palitviaźnia Ihara Čarnavusava, jakoha nibyta pavinny byli zasudzić da praciahłaha źniavoleńnia, piša «Homielskaja viasna».
Žychara Homiela Ihara Čarnavusava zatrymali 31 sakavika 2023 hoda razam z Kanstancinam Hvoździevym, Uładzimiram Kamiennavym i Dźmitryjem Papkovym. Ich abvinavacili ŭ stvareńni «śpiačaj jačejki ekstremistaŭ». Na ich zaviali kryminalnuju spravu pavodle troch artykułaŭ Kryminalnaha kodeksa: častki 1 artykuła 361-1 (stvareńnie ekstremisckaha farmiravańnia), č. 1 i 2 art. 361-4 (spryjańnie ekstremisckaj dziejnaści), art. 368 (abraza Łukašenki).
Kryminalnuju spravu ŭ zakrytym režymie razhladaŭ sudździa Homielskaha abłasnoha suda Aleh Charoška. Vyniesieny im prysud pakul nieviadomy, ale Ihar Čarnavusaŭ byŭ pryznany vinavatym pavodle ŭsich troch artykułaŭ kryminalnaj spravy.
Akramia taho, 10 krasavika 2024 hoda ŭ tym ža Homielskim abłasnym sudzie taksama na zakrytym pasiadžeńni sudździa Anatol Sotnikaŭ razhladaŭ kryminalnuju spravu adnosna jaho z abvinavačvańniem u raspalvańni varažniečy (č. 1 art. 130 KK), paklopie na Łukašenku (č. 1 art. 367 KK) i abrazie Łukašenki (č. 1 art. 368 KK). Vyniesieny prysud taksama nieviadomy.
Pry hetym MUS ažno dvojčy abviaščała Ihara Čarnavusava «ekstremistam»: u mai i ŭ žniŭni 2024 hoda.
Paśla vyniasieńnia prysudaŭ Ihar Čarnavusaŭ adbyvaŭ pakarańnie ŭ kałonii № 22 kala stancyi Damanava Ivacevickaha rajona. 14 lutaha 2025 hoda jon vyjšaŭ na svabodu.
Pakul nieviadoma, jak adznačaje «Homielskaja viasna», z čym źviazana takoje chutkaje vyzvaleńnie palitviaźnia, jakoha ŭłady abvinavacili pavodle artykułaŭ, što praduhledžvajuć davoli vialikija terminy źniavoleńnia.
Kamientary