«Chram — heta i balnica, i škoła!» U Mahilovie sabrali sotni podpisaŭ suprać budaŭnictva carkvy ŭ Piačerskim lesaparku
Adnak čynoŭniki zrabili vyhlad, što ich nie było. Na tych, chto źbiraŭ podpisy suprać, vyklikali milicyju, a dziaržaŭnyja telekanały pierakonvali, što budaŭnictva inicyjavali žychary horada, choć sami jany pra tyja tysiačy podpisaŭ, jakija byccam by sabranyja ŭ padtrymku prajekta, ničoha nie čuli.
U Mahilovie z 25 krasavika pa 9 maja prachodziła hramadskaje abmierkavańnie architekturna-płanirovačnaj kancepcyi chrama Dabravieščańnia Najśviaciejšaj Baharodzicy pa vulicy Jakuboŭskaha. Pa jaho vynikach, jakija vyhladajuć dosyć sprečna, miascovyja ŭłady dazvolili budaŭnictva.
Kompleks, jaki ŭklučaje sam chram, dom kliru, haspadarčy błok i parkoŭku dla viernikaŭ, niečakana dla miascovych žycharoŭ vyrašyli raźmiaścić naŭprost na terytoryi Piačerskaha lesaparku, adnaho ź niešmatlikich miescaŭ adpačynku ŭ Mahilovie.
Terytoryja, na jakoj prapanavana pabudavać carkvu, husta zasadžana drevami, jakija buduć śpiłavanyja ŭ čas budaŭnictva, i ŭvachodzić ŭ achoŭnuju zonu bataničnaha zakaźnika, abvieščanaha ŭ 2021 hodzie ŭ Piačersku. Pry hetym u kancepcyi, vyniesienaj na abmierkavańnie, pra heta nie zhadvałasia.
Vidać, zakazčyki i miascovyja ŭłady chacieli, kab takaja adčuvalnaja infarmacyja nie była zaŭvažana haradžanami da zaviaršeńnia hramadskaha abmierkavańnia, dyj jaho daty vybrany byli tak, što vypadali na doŭhija majskija śviaty, kali ludzi źjazdžajuć na adpačynak.
Ale jana była zaŭvažana miascovymi žycharami. Mnohija sa ździŭleńniem daviedalisia, što za budaŭnictva carkvy ŭ hetym miescy jeparchijaj užo sabrana tysiača podpisaŭ niejkich mahiloŭcaŭ.
Aburanyja takim nachabstvam carkoŭnikaŭ, žychary za karotki termin sabrali kala 500 podpisaŭ suprać. Paśla 7 maja, pierad samym zaviaršeńniem abmierkavańnia, ludziej, jakija źbirali podpisy suprać chrama, pačali vyklikać u RAUS, dzie tłumačyli, što heta supraćzakonna.
Na prezientacyi prajekta, jakaja adbyłasia 30 krasavika ŭ harvykankamie, zajaŭlali, što nasamreč heta nijaki nie les, a «bamžatnik» i «burałom», a pierazvon «stanoŭča ŭpłyvaje na čałavieka».
Usia rytoryka hruntavałasia na biespadstaŭnych zajavach pra nibyta prośby tysiačy žycharoŭ rajona, jakija ŭhavorvajuć pabudavać carkvu mienavita na miescy maładoha lesu.
16 maja na dziaržaŭnym telekanale «Biełaruś 4» vyjšaŭ repartaž, u jakim zajaŭlałasia, byccam by budaŭnictva było inicyjavana ŭ hetym miescy samimi žycharami, jakija źviarnulisia z takoj prapanovaj u jeparchiju.
U repartažy pierakonvali, što chram pabudujuć na «pustcy» — u kadry sapraŭdy źjaŭlałasia biaźlesaja palana.
Chram, kali supastavić płany sa spadarožnikavymi zdymkami, sapraŭdy raźmiaščajecca na pakazanaj palanie, ale ŭ kompleks uvachodziać inšyja pabudovy, parkoŭki i šyrokaja vybrukavanaja placoŭka dla kryžovych chadoŭ, na miescy jakich ciapier siadzić les.
Usie pakazanyja ŭ repartažy ludzi, naturalna, vystupajuć za budaŭnictva chrama, nikoha suprać byccam by i niama. Adzin navat niezadavoleny tym, chto inšyja mahiloŭcy chočuć škołu ci balnicu, a nie čarhovuju carkvu.
«Ludzi nie razumiejuć, što chram — heta i jość balnica! Chram — heta i jość škoła!» — zajaŭlaje mužčyna.
Namieśnik dyrektara «Mahiloŭzielanbuda» Vasil Hienievič u kadry zajaŭlaje, što hetaja placoŭka «nijakaha dačynieńnia da terytoryi Piačerskaha lesaparku nie maje» — heta taksama chłuśnia. Pavodle rašeńnia ab stvareńni na terytoryi Piačerskaha lesaparku zakaźnika, hetaja terytoryja ŭvachodzić u jaho achoŭnuju zonu, dzie zabaroniena vysiečka drevaŭ — duba čareščataha, buka, klona vastralistaha, viaza (ilma, bierasta), jasienia zvyčajnaha, lipy, duhłasii (psieŭdatsuhi).
U sacyjalnych sietkach, adnak, pad publikacyjami pra prajekt budaŭnictva carkvy ciažka znajści choć jaki-niebudź kamientaryj u jaho padtrymku, absalutnaja bolšaść — hnieŭnyja ci niezadavolenyja kamientary.
19 maja ŭ harvykanamie prajšło pasiadžeńnie architekturna-horadabudaŭničaj rady pa hetym prajekcie. Jak vyjaviłasia, čynoŭniki pryniali tolki 180 zvarotaŭ suprać budaŭnictva chrama,
nie pryniaŭšy da ŭvahi bolš za 300 podpisaŭ, sabranych ad žycharoŭ susiednich damoŭ. Zatoje kolkaść podpisaŭ za budaŭnictva chrama za hety čas cudoŭnym čynam vyrasła da niekalki tysiač.
Hałoŭny inžynier firmy «Kansałtynh-stroj», jakaja prajektuje carkvu, zajaviŭ na radzie, što jany ŭpeŭnieny, što ichni chram «stanie takoj ža razynkaj Mahilova, jak Pietrapaŭłaŭski sabor u Homieli».
Rada bolšaściu hałasoŭ dazvoliła budaŭnictva chrama ŭ hetym miescy.
Zrešty, taho adnadušša ŭ hetym pytańni, jakoje imknulisia pakazać haradžanam sa staronak dziaržaŭnaj presy i pieradač na telebačańni, nie atrymałasia — pieravaha skłała ŭsiaho adzin hołas.
Tolki 6 z 11 členaŭ rady prahałasavali za budaŭnictva chrama, pry tym prynamsi pałova ź ich — łukašenkaŭskija čynoŭniki z adpaviednymi značkami na łackanie.
«Naša Niva» — bastyjon biełaruščyny
PADTRYMAĆCiapier čytajuć
Kachanak Anžaliki Mielnikavaj — ahient biełaruskich śpiecsłužbaŭ z pašpartam prykryćcia56
Kamientary