Dzieviać čałaviek pamierli ŭ Breście i Minsku — usim im uvodzili adnyja i tyja ž leki. U preparacie znajšli bakteryi

Uzrost pamierłych — ad 50 da 67 hadoŭ

Z pačatku studzienia pa pačatak sakavika ŭ Bresckaj abłasnoj balnicy padčas apieracyj na sercy 13 pacyjentam uvodzili adenazin. Hety preparat na niekalki siekundaŭ rezka zapavolvaje abo časova spyniaje pracu serca, a taksama źnižaje cisk. Dziakujučy hetamu chirurh moža spakojna vykanać składany etap apieracyi ź minimalnym kryvaciokam. Balnica karystałasia adenazinam pad handlovaj markaj «Kardyŭreks» (Cardiurex).

Zhodna z dakumientami, jakija jość u rasparadžeńni «Lusterka», z 13‑ci pacyjentaŭ, jakija atrymali preparat, pamierli vosiem. Heta siem mužčyn i adna žančyna va ŭzroście ad 50 da 65 hadoŭ. Kamuści ź ich rabili pratezavańnie aorty, kamuści — zamianiali jaje kłapany abo pravodzili aortakaranarnaje šuntavańnie.

Užo paśla apieracyj u analizach siami pacyjentaŭ znajšli bakteryi. Adnosna vośmaj pacyjentki infarmacyi pra vyniki daśledavańnia niama. Ale viadoma, što analizy ŭ jaje taksama brali.

Pry hetym u piaciarych z tych, chto pamior u Breście, jak vynikaje z dakumientaŭ, raźviŭsia sternamiedyjastynit — heta ciažki infiekcyjny praces, kali zapalajecca i nahnojvajecca hrudzina i tkanki ŭnutry hrudnoj kletki. U troch vypadkach pačaŭsia siepsis — stan, kali imunnaja sistema daje zboj u adkaz na infiekcyju. Dadatkova ŭ dvuch pacyjentaŭ była hienieralizavanaja infiekcyja. Heta ciažkaje zachvorvańnie, pry jakim virusy, bakteryi abo hrybki raspaŭsiudžvajucca pa ŭsim arhaniźmie za miežami ačaha.

«Kardyŭreks» vykarystoŭvali i pry praviadzieńni apieracyj na sercy dzieviaci pacyjentam staličnaha RNPC «Kardyjałohija». Usie jany pastupili ŭ centr z 17 lutaha pa 3 sakavika. Pacyjentam było ad 41 hoda da 68 hadoŭ. Dvoje ź Minska, siamiora — ź Minskaj vobłaści.

Paśla apieracyi va ŭsich dzieviaci daktary vyjavili vysokarezistentnyja bakteryi, a taksama dyjahnastavali siepsis. Vyratavać zmahli vaśmiarych. 67‑hadovaja žančyna pamierła.

Što pakazali łabaratornyja daśledavańni?

Z dakumientaŭ vynikaje, što pacyjentam u RNPC «Kardyjałohija» ŭvodzili Adenosin Injection IP 6 mg/ml Cardiurex, jaki vyrabiła indyjskaja kampanija Welcure Remedies. Ustanova ŭpieršyniu atrymała 1000 upakovak hetaha preparata 18 lutaha. Kolki pastavili Bresckaj abłasnoj balnicy — nieviadoma.

Pry hetym u dakumientach adznačajecca: Bresckaja abłasnaja balnica nie paviedamiła pra vyjaŭleńnie ŭ kryvi pacyjentaŭ bakteryj ni ŭ haradski, ni ŭ abłasny centr hihijeny i epidemijałohii. U RNPC «Kardyjałohija», naadvarot, paviedamili adrazu.

Analiz Minskaha haradskoha centra hihijeny i epidemijałohii pakazaŭ, što preparat byŭ niesterylny — u im znajšli Klebsiella oxytoca i Serratia marcescens. Hetyja ž bakteryi znajšli i ŭ analizach pacyjentaŭ RNPC «Kardyjałohija», jakim uvodzilisia leki.

Nie vyklučana, što heta nie adzinyja vidy bakteryj, jakija ŭtrymlivalisia ŭ rastvory dla injekcyi. Naprykład, u pamierłych pacyjentaŭ Bresckaj abłasnoj balnicy znachodzili nie tolki Klebsiella oxytoca. U bolšaści vypadkaŭ tam była Acinetobacter baumannii, radziej — Klebsiella pneumoniae i Haemophilius influenzae.

13 sakavika Dziaržfarmnahlad paviedamiŭ pra situacyju ŭ Minzdaroŭja, i toje zahadała vyłučyć z abaračeńnia partyju preparata WADG25001A.

Vyśvietliłasia, što leki pastaviła biełaruskaja kampanija «JUMB-Farm». Mienavita ź joj «Minskaja farmacyja» zaklučyła damovu ŭ kancy lipienia minułaha hoda. Siarod tych, kamu išli pastaŭki, — 24 ustanovy z usioj krainy, u tym liku i RNPC «Kardyjałohija», hałoŭnaje ŭpraŭleńnie pa achovie zdaroŭja Bresckaha abłvykankama, a taksama Bresckaje RUP «Farmacyja».

Usiaho ž pa damovie da 30 červienia 2026 hoda «JUMB-Farm» pavinna była pastavić 5943 adzinki hetaha lekavaha srodku. Byli ŭsie jany z adnoj partyi ci ź niekalkich — nieviadoma.

Prablemy vyjavili SAAZ i indyjskija ekśpierty

Pra niesterylnaść «Kardyŭreksa» indyjskaha vytvorcy Welcure Remedies papiaredžvała i Suśvietnaja arhanizacyja achovy zdaroŭja. Tak, 25 maja Dziaržaŭnaja słužba kantrolu za lekavymi srodkami pry Minzdaroŭi Litvy raskazała, što atrymała ad SAAZ list pra niebiaśpieku ŭsio toj ža partyi WADG25001A. Arhanizacyja adznačała, što ŭ Litvie hetaha preparata niama, ale na ŭsialaki vypadak prasiła pastaŭščykoŭ paviedamić, kali jany jaho nabyli.

U lipieni Centralnaja arhanizacyja pa kantroli standartaŭ lekavych srodkaŭ Indyi (CDSCO) uklučyła hetuju samuju partyju ad Welcure Remedies u śpis preparataŭ, jakija nie adpaviadajuć standartam jakaści. Siarod pryčyn — nievykanańnie sterylnaści i najaŭnaść bakteryjalnych endataksinaŭ. Heta, hruba kažučy, reštki bakteryj, jakija pry traplańni ŭ arhanizm mohuć vyklikać mocnaje zapaleńnie, haračku, a ŭ ciažkich vypadkach — siepsis i sieptyčny šok.

• 0
• 0
• 0
• 0
• 0
• 0
• 0
• 0