Adkaz na hetaje pytańnie — chiba samy cikavy momant vizitu Kita Kiełaha ŭ Minsk. I samy zahadkavy. Piša palityčny ahladalnik «Svabody» Jury Drakachrust.
Napiaredadni vizytu specyjalnaha pradstaŭnika prezydenta ZŠA ŭ pytańniach Ukrainy Kita Kiełaha paviedamlałasia, što hałoŭnaj jaho temaj buduć pytańni biaśpieki. I što ŭ hetych pytańniach Alaksandar Łukašenka moža (moh by) dać Donaldu Trampu?
Pieramovy ŭ trochkutniku Vašynhton-Maskva-Kijeŭ vidavočna ŭ tupiku. Biezumoŭna, Łukašenka vielmi zaležny ad Kramla. Vasał, jak kažuć niekatoryja, ale nia rab. Pieramaŭlacca ź kiraŭnikom Čačni Kadyravym ci kiraŭnikom rasiejskaj akupacyjnaj administracyi Danieckaj vobłaści Pušylinym amerykancam i ŭ hałavu nie pryjšło b.
Z Łukašenkam — pryjšło. Usio ž asobnaja jurysdykcyja, jak było skazana padčas kryzisu ź miaciažom Pryhožyna. Plus vielmi ščylnyja asabistyja adnosiny Łukašenki z Pucinym. Da taho ž jość peŭnyja asablivaści pazycyi.
Biełaruskaja armija nia ŭdzielničaje ŭ rasiejskaj vajnie z Ukrainaj.
U Biełarusi šmat hadoŭ (2015-2022) vialisia pieramovy pamiž Ukrainaj i Rasiejaj u miežach Mienskaha mirnaha pracesu, Łukašenka, na čyjoj terytoryi tyja pieramovy adbyvalisia, viedaje šmat tonkaściaŭ hetaha ŭzajemadziejańnia, mienš viadomych inšym.
Kali sytuacyja ŭ tupiku, to vyvieści jaje z hetaha stanu moža i impuls, chod, jaki nievidavočna, nieharantavana palapšaje raskład. Ale jaki prosta vyvodzić z tupiku, pavyšajučy niapeŭnaść, pavialičvajučy ryzyki, ale i adkryvajučy novyja mahčymaści.
Heta całkam upisvajecca ŭ palityčny styl Trampa. Padobnym krokam byli ŭ svoj čas sensacyjnyja pieramovy Trampa z Kim Čen Ynam. Chod, jaki parušaje zvykłuju raŭnavahu, jakaja nie zadavalniaje. Plonu ad taho chodu było niašmat. I nie mahło prynieści plonu? A voś heta nia fakt. Tramp tady pasprabavaŭ.
Dyk i zaraz, mahčyma, prosta vyrašyŭ pasprabavać — uvieści ŭva ŭraŭnieńnie novuju pieramiennuju. Nia vielmi značnuju, ale i nia roŭnuju nulu.
Vyvieści Łukašenku z rasiejskaj arbity naŭrad ci staviłasia za karotkaterminovuju metu. I što značyć vyvieści? Kab Biełaruś vyjšła sa šmatlikich sajuzaŭ z RF? Heta niedasiahalna. Ale sam pa sabie fakt adnaŭleńnia asobnaj kamunikacyi, dyjalohu Miensku z Vašynhtonam krychu pašyraje dla Łukašenki prastoru dla hieapalityčnaha maneŭru i asłablaje zaležnaść ad Maskvy.
Zalacańni Łukašenki da Kitaju taksama nie praduhledžvajuć «zdrady» Rasiei.
Ale samoj svajoj najaŭnaściu hetyja adnosiny pašyrajuć mahčymaści maneŭru dla Łukašenki i ŭskosna asłablajuć zaležnaść ad Maskvy.
U vypadku palapšeńnia adnosinaŭ Miensku z Vašynhtonam asłableńnie zaležnaści ad Rasiei moža akazacca nia metaj, a takim ža ŭskosnym, pabočnym nastupstvam.
Naŭrad ci vynikam pieramovaŭ Kiełaha ŭ Miensku stanie pieranos asnoŭnych pieramovaŭ pamiž Kijevam i Maskvoj u Biełaruś. Ale placoŭkaj dla pieramovaŭ pa peŭnych pytańniach, skažam, u abmienie pałonnymi Miensk moža i stać. Hetyja abmieny praź Biełaruś apošnim časam pieravažna i ažyćciaŭlajucca.
I reč nia ŭ tym, što hetyja pieramovy niemahčyma vieści ŭ inšym miescy. Ale zhoda na Miensk — na heta ŭ pryncypie mahła b pahadzicca Ŭkraina, i heta rascaniła b jak krok nasustrač joj Maskva. U pryncypovych pytańniach baki nie hatovyja iści nasustrač adzin adnomu. U hetym — mahli b, i heta mahło b stać demanstracyjaj choć niejkaha prahresu na pieramovach.
Rola Łukašenki nieabaviazkova praduhledžvajecca mienavita takaja. Ale takoha kštałtu — ad jaho mohuć čakać niejkich krokaŭ, jakija b choć u niečym zblizili Maskvu i Kijeŭ.
Nie atrymajecca ničoha z hetych pražektaŭ — nu značyć, nie atrymajecca. Vialikaj biady ad sproby nia budzie.
A niekatoryja stanoŭčyja vyniki, chaj i nievialikija, mohuć być i navat užo jość — 14 vyzvalenych palitviaźniaŭ, naprykład. Jak było adznačana, palapšeńnie adnosinaŭ Vašynhtonu ź Mienskam pryviadzie da peŭnaha asłableńnia zaležnaści biełaruskaj dyktatury ad Maskvy.
Na dumku Eŭropy, takaja palityka moža tuju dyktaturu ŭmacavać. Ale ŭ Trampa svajo bačańnie. Jašče ŭ studzieni sioleta vybary ŭ Biełarusi asudzili ŭsie eŭrapiejskija stalicy. A Dziarždepartament tolki abranaha ŭ Bieły dom Trampa krasamoŭna pramaŭčaŭ.
Kali možna razmaŭlać z Pucinym, dyk čamu nielha z Łukašenkam?
Časam vychad z tupiku navat paharšaje sytuacyju. Ale stan tupiku jon prynamsi likviduje.
Kamientary