PARIE pryznała adkaznaść Łukašenki za pieramiaščeńnie ŭkrainskich dziaciej
U pryniatuju rezalucyju Parłamienckaj asamblei Rady Jeŭropy ŭniesienaje dapaŭnieńnie, jakoje tyčycca adkaznaści Alaksandra Łukašenki za pieramiaščeńnie ŭkrainskich dziaciej z akupavanych Rasijaj terytoryj Ukrainy. Rezalucyja «Pravavyja aśpiekty i aśpiekty pravoŭ čałavieka ahresii Rasijskaj Fiederacyi suprać Ukrainy» była pryniataja 24 červienia padčas letniaj siesii PARIE, paviedamlaje «Viasna».
Vosieńniu minułaha hody pravaabarončyja arhanizacyja Freedom House, «Viasna», ZMINA (Ukraina) i inicyjatyva byłych siłavikoŭ BelPol padrychtavali dakład «Skradzienaje dziacinstva», dzie siarod inšaha adznačyli, što pieravychavańnie ŭkrainskich dziaciej na terytoryi Biełarusi va ŭmovach vajny Rasii suprać Ukrainy kvalifikujecca jak dyskryminacyjny pieraśled, jaki źjaŭlajecca złačynstvam suprać čałaviečnaści.
U siaredzinie vieraśnia aŭtary dakładu pieradali dakumienty ŭ Mižnarodny kryminalny sud u Haazie.
Jak zajaviŭ kiraŭnik Narodnaha antykryzisnaha ŭpraŭleńnia (NAU) Pavieł Łatuška, jaki źjaŭlajecca členam delehacyi Kaardynacyjnaj rady na siesii PARIE, hetaje dapaŭnieńnie było ŭniesiena ź jaho inicyjatyvy «na padstavie dokazaŭ, sabranych NAU, jakija byli pradstaŭlenyja ŭ PARIE».
U dapaŭnieńni ŭkazvajecca, što pa stanie na 14 žniŭnia 2024 hoda nie mienš za 3500 ukrainskich dziaciej z akupavanych Rasijaj terytoryj Ukrainy byli hvałtoŭna pieramieščanyja praz abo na terytoryju Biełarusi, dzie jany zaznali rasijskuju palityčnuju, vajennuju i relihijnuju indaktrynacyju.
«Heta pieramiaščeńnie adbyvałasia pa pramym zahadzie Alaksandra Łukašenki», — havorycca ŭ papraŭcy.
MZS Ukrainy ŭ zajavie, pryśviečanaj uchvalenym 24 červienia rezalucyjam PARIE, adznačyła, što «Ukraina vysoka aceńvaje dakładnuju farmuloŭku pravavych vyvadaŭ, u pryvatnaści: pryznańnie dziejańniaŭ RF, Biełarusi i KNDR jak akta ahresii», a taksama «fiksacyju indyvidualnaj adkaznaści palityčnaha i vajennaha kiraŭnictva hetych dziaržaŭ».
Kamientary