U Rasii ŭpłyvovaha ekanamista zvolnili za prahnoz paražeńnia RF u vajnie na źniasileńnie
Dziaržaŭnaja rasijskaja karparacyja «VEB.RF» zvolniła svajho šmathadovaha hałoŭnaha ekanamista Andreja Klepača paśla jaho rezkaha vystupu z krytykaj ekanamičnaha kursu krainy. Pavodle danych The Bell, kiraŭnik dziaržkarparacyi Ihar Šuvałaŭ pryniaŭ rašeńnie pra zvalnieńnie paśla «zvanka źvierchu».
Pryčynaj reakcyi ŭładaŭ staŭ dakład Klepača na siesii Mikickaha kłuba Maskoŭskaj biržy, na jaki paśla publikacyi ŭ vydańni The Moscow Times źviarnuli ŭvahu šmatlikija miedyja. U svaim vystupie ekśpiert zajaviŭ, što Rasija žyvie iluzijami i niaŭchilna adstaje ŭ technałahičnaj i ekanamičnaj honcy.
Zakranajučy temu vajny i sankcyjnaha cisku, Klapač adznačyŭ, što Rasija nie zmoža pieramahčy ŭ zaciažnym kanflikcie.
«My ŭ hetaj vajnie na źniasileńnie nie vyjhrajem kankurencyju. U nas jość iluzija, što tam usio ruchnie. Nie ruchnuła i nie ruchnie. U nas narastajuć vydatki», — skazaŭ ekanamist.
Jon dadaŭ, što rasijskaja ekanomika prajhraje kankurencyju nie tolki ZŠA i Kitaju, ale «ŭ čymści prajhraje i Ukrainie».
Pavodle acenak Klepača, straty ad udaraŭ Uzbrojenych sił Ukrainy pa rasijskaj infrastruktury, naftahazavych i chimičnych kompleksach «užo pieratvarajucca ŭ zaŭvažny makraekanamičny barjer rostu». Situacyju paharšaje i žorstkaja palityka Centrabanka RF, a taksama pašyreńnie amierykanskich sankcyj, praź jakija Indyja i Kitaj pačali skaračać zakupki rasijskaj nafty.
Najbolš rezkaj častkaj dakładu stała papiaredžańnie pra mahčymy sacyjalny kryzis, jaki ekśpiert paraŭnaŭ z padziejami Lutaŭskaj revalucyi 1917 hoda i raspadam SSSR u 1991 hodzie.
«Ja vieru, što Rasija nie razvalicca, ale toje, što my pryjdziem da sacyjalnaha kryzisu, ja amal upeŭnieny. Ekanamična my nie ruchniem, ale i naša adstavańnie budzie narastać z usimi nastupstvami, jakija z hetaha vynikajuć», — skazaŭ Klapač.
Andrej Klapač zajmaŭ pasadu hałoŭnaha ekanamista «VEB.RF» na praciahu 12 hadoŭ, a da hetaha byŭ namieśnikam kiraŭnika Minekanamraźvićcia RF. Starejšaja navukovaja supracoŭnica Bierlinskaha centra Karnehi Alaksandra Prakapienka nazyvaje jaho adnym z najlepšych makraekanamistaŭ Rasii, adznačajučy, što Klapač i raniej vyłučaŭsia realistyčnymi acenkami, jakija časta vyklikali niezadavolenaść kiraŭnictva.
Staruju kamianicu kala ratušy ŭ Mahilovie rychtavali dla haradskoha muzieja. Ciapier tam robiać ofis rasijskaha pasolstva na čale z byłym ministram «ŁNR»1414
Kamientary