Prezident Kamieruna, jakomu 92 hady i jaki kiruje ŭžo 43 hady, znoŭ budzie bałatavacca
U vypadku pieramohi jon budzie kiravać da 99 hadoŭ.
Pol Bija, najstarejšy dziejny kiraŭnik dziaržavy ŭ śviecie, abviaściŭ pra namier udzielničać u prezidenckich vybarach, pryznačanych na 12 kastryčnika 2025 hoda. Adpaviednaja zajava źjaviłasia ŭ niadzielu na jaho aficyjnaj staroncy ŭ sacsietcy X, piša Rasijskaja słužba Radyjo Svaboda.
«Ja — kandydat u prezidenty. Maja rašučaść słužyć vam takaja ž vialikaja, jak i maštaby vyklikaŭ, ź jakimi sutykajecca naša kraina», — havorycca ŭ publikacyi.
Bija zajmaje pasadu prezidenta Kamieruna z 1982 hoda. Paśla admieny abmiežavańnia na kolkaść prezidenckich terminaŭ u 2008 hodzie jon atrymaŭ mahčymaść bałatavacca nieabmiežavanuju kolkaść razoŭ. U vypadku pieramohi jon zastaniecca va ŭładzie da 99 hadoŭ. Pytańni pra stan zdaroŭja Bija rehularna stanoviacca pradmietam hramadskaha abmierkavańnia, asabliva paśla jaho 42-dzionnaj adsutnaści letaś. Ułady tady zajavili, što jon adčuvaje siabie dobra, i zabaranili publičnaje abmierkavańnie hetaj temy, spasyłajučysia na mierkavańni nacyjanalnaj biaśpieki.
Pra vyłučeńnie Bija daŭno chadzili čutki, adnak aficyjnaha paćvierdžańnia dahetul nie było. Jaho kandydaturu aktyŭna padtrymlivajuć členy kirujučaj partyi — Kamierunskaha narodna-demakratyčnaha ruchu (CPDM).
Pra namier udzielničać u vybarach taksama zajavili niekalki apazicyjnych palitykaŭ, uklučajučy Maurysa Kamto, Džošua Osi, Akieru Munu i Kabrała Libii. Jany rezka krytykujuć šmathadovaje kiravańnie Bija i patrabujuć reformaŭ, što zabiaśpiečvajuć prazrystaść i padspravazdačnaść vybarčaha pracesu.
Kamierun praciahvaje sutykacca z vostrymi prablemami — ad ekanamičnych ciažkaściaŭ i sieparatysckaha kanfliktu ŭ anhłamoŭnych rehijonach da terarystyčnaj pahrozy na poŭnačy. Tam aktyŭna dziejničaje radykalnaja isłamisckaja hrupoŭka Boka Charam, źviazanaja ź IDIŁ. Jana vystupaje suprać śvieckaj adukacyi i viadomaja sieryjaj kryvavych napadaŭ u rehijonie voziera Čad, u tym liku na terytoryi Kamieruna.
Kamientary
Dy ź jaho vachlaram chvarob, kab dažyć da 92.