Kolki treba vykłaści baćkam, kab sabrać u škołu pieršakłaśnika

Padrychtoŭka dziciaci da novaha navučalnaha hoda — heta nie tolki kupla školnaj formy ci kłasičnaha adzieńnia, ale i vialikija vydatki na kancylarskija i piśmovyja pryłady.

Asabliva šmat vydatkaŭ patrabujecca ad baćkoŭ pieršakłaśnikaŭ, bo im treba adrazu nabyć poŭny nabor, jaki ŭklučaje kala 30 roznych pazicyj.

U hety śpis uvachodziać:

• papka dla sšytkaŭ i nabory abhortak dla sšytkaŭ i knih;
• pienał (ad prostaha płastykavaha za 1,5 rubla da modnaha za 30 rubloŭ);
• sšytki ŭ liniejku i kletku (ad 0,21 da 0,85 rubla za adzinku);
• ručki ź sinimi stryžniami (ad 0,22 kapiejki za štuku da 18 rubloŭ za darahuju madel, nabory — da 10 rubloŭ);
• prostyja i kalarovyja ałoŭki (ad kapiejek da 15 rubloŭ);
• fłamastary (5—42 rubli);
• liniejki (ad 0,45 da 9 rubloŭ), tačyłki (0,58—8,88 rubla), humki (0,53—5,81 rubla).

Akramia hetaha, dla pracoŭnaha navučańnia i malavańnia treba nabyć:

• albom dla malavańnia (0,84—6,35 rubla);
• farby: akvarel (3—11 rubloŭ) i huaš (5—21 rubiel);
• nabory pendźlaŭ (ad 4 da 23 rubloŭ) ci pendźli paasobku (3—14 rubloŭ);
• «niepralivajku» dla vady (1,2—3,2 rubla);
• płastylin (6—20 rubloŭ), doščačku dla lepki (3—10 rubloŭ), nožyki (1,5—12 rubloŭ);
• kalarovuju i biełuju papieru, karton (ad 1 da 5 rubloŭ za nabor).

Nieabchodnyja taksama klei — i PVA (1,8—3,2 rubla), i klej-ałovak (1—5,5 rubla), a jašče nažnicy z zakruhlenymi kancami (4—9 rubloŭ).

Dziońnik u pieršym kłasie pakul što nie patrebny — jaho pačynajuć vieści tolki z treciaha kłasa. Ale kali kuplać, to kaštuje jon niadoraha — kala 2,7 rubla, i za apošni hod košt nie źmianiŭsia.

Takim čynam, kali brać samyja prostyja i tannyja rečy, to kamplekt školnych pryład dla pieršakłaśnika ź dziesiaćciu sšytkami ŭ kletku i dziesiaćciu ŭ liniejku abydziecca prykładna ŭ 80 rubloŭ.

Kali ž vybirać samyja darahija varyjanty, to suma pieravysić 330 rubloŭ.

U paraŭnańni ź minułym hodam ceny istotna nie źmianilisia: minimalny nabor kaštavaŭ kala 85 rubloŭ, a samy darahi — zvyš 320.

Vučniam siarednich i starejšych kłasaŭ sabrać partfiel lahčej i tańniej. Pa-pieršaje, častka kancylarskich tavaraŭ zastajecca ź minułaha hoda ŭ dobrym stanie. Pa-druhoje, im užo nie patrebnyja niekatoryja pryłady — naprykład, płastylin, doščački dla lepki, kalarovaja papiera ci karton. Tamu ceny na zbory buduć nižejšyja, čym u pieršakłaśnikaŭ.

• 0
• 0
• 0
• 1
• 0
• 0
• 0
• 0