Hihanckaja źmiajuka napałochała ludziej u Mazyry. Vyśvietliłasia, što jaje vyhulvaŭ 12‑hadovy chłopčyk
Cikavy incydent adbyŭsia ŭ Mazyry: naviedvalniki haradskoha parku sustreli padčas prahułki vialikuju źmiaju.
Videa z reptylijaj, jakaja spakojna paŭzła pa darožkach, chutka raspaŭsiudziłasia ŭ sacyjalnych sietkach i vyklikała burnaje abmierkavańnie, piša Onliner.by.
«Hulajem u parku, a tut udaŭ na vypasie taksama», — padpisali rolik jaho aŭtary.
Na kadrach vidać, jak minaki ź cikavaściu nazirajuć za źmiajoj. Adny spałochalisia niečakanaj sustrečy, inšyja, naadvarot, vyrašyli padyści bližej. Adzin z adpačyvalnikaŭ navat pasprabavaŭ pahładzić udava, adnak, jak vidać ź videa, takaja ŭvaha reptylii nie spadabałasia.
Paźniej zdymačnaja hrupa miascovaha telekanała vyśvietliła, što źmiaja nie źbiehła, a była na prahułcy razam z haspadarom. Z hadavancam na vulicu vychodzić 12‑hadovy Uład — chłopčyk całkam spakojna trymaje vialikuju źmiaju na rukach i hładzić jaje, niby kotku ci trusa.
Udava zavuć Sułtan. Jamu try hady, a ŭ siamji jon žyvie kala hoda — źmiaju padaryli siabry baćki chłopčyka.
Pavodle słoŭ Ułada, Sułtan maje spakojny charaktar, a ciopłaje nadvorje jamu pasuje, bo ŭdavy žyvuć u tropikach. Padletak pryznajecca, što spačatku sam bajaŭsia źmiai, ale ciapier jany, zdajecca, stali lepšymi siabrami.
U Biełarusi ŭtrymańnie ŭdavaŭ nie zabaroniena, kali žyvioła nie ŭvachodzić u pieralik vidaŭ, zabaronienych dla chatniaha ŭtrymańnia. Abmiežavańnie datyčycca źmiej daŭžynioj bolš za čatyry mietry.
Pavodle słoŭ haspadara, Sułtan dasiahaje prykładna 1,5 mietra, tamu jaho ŭtrymańnie doma dazvolena.
Ciapier čytajuć
«Ciapier mnie čužaja sama kancepcyja ŭžyć niešta, čaho ty nie viedaješ». Vialikaja hutarka ź Ivanam Šyłam pra biznes, zarablańnie z dapamohaj ŠI, žančyn i botaks
Kamientary