Biełarusam za miažoj prapanujuć aformić pašpart RR i padzarabić — mutnaja schiema

U čym sutnaść spravy?

U Biełarusi isnuje takaja pracedura, jak aficyjnaje adbyćcio na PMŽ u inšuju krainu. Jana absalutna nie abaviazkovaja, ale daje peŭnyja pieravahi i niekatoryja minusy.

Raniej biełaruskija hramadzianie, jakija aficyjna vyjechali na pastajannaje miesca žycharstva ŭ inšuju krainu, atrymlivali pašpart admysłovaj sieryi RR.

Apošnija niekalki hadoŭ pašparty sieryi RR nie vydajuć, zamiest hetaha staviać štampy ab pastanoŭcy na pastajanny konsulski ŭlik u zvyčajny pašpart, ale ŭ narodzie hetuju praceduru pa-raniejšamu nazyvajuć atrymańniem pašparta RR.

Pavialičyć

Aficyjnaje adbyćcio na PMŽ daje mahčymaść pryjazdžać u Biełaruś na aŭto z zamiežnaj rehistracyjaj na pravach zamiežnika — to-bok nie pakidajučy finansavaj harantyi, jakaja raŭniajecca mytu za ŭvoz hetaha transpartnaha srodku.

Na PMŽ i nazad u Biełaruś

Ale biełarusy mohuć nie tolki aficyjna vyjechać na pastajannaje miesca žycharstva ŭ inšuju krainu, ale i viarnucca na radzimu.

Čałaviek, jaki aficyjna adbyŭ na PMŽ za miažu, pry viartańni ŭ Biełaruś moža pryvieźci svaju majomaść, jakuju jon mieŭ u inšaj krainie, biez apłaty myta.

U hety śpis uvachodziać i aŭtamabili. Hałoŭnaje, kab takaja mašyna ci inšy transpartny srodak prabyli na ŭliku ŭ krainie, kudy čałaviek vyjechaŭ na PMŽ, nie mienš za šeść miesiacaŭ da viartańnia ŭ Biełaruś.

Takim prahałam u zakanadaŭstvie i karystalisia biełaruskija dalnabojščyki, u jakich litoŭskaja mytnia pačała aryštoŭvać aŭtamabili praz padazreńni ŭ abychodzie sankcyj.

Pry hetym śpis rečaŭ, jakija možna biez myta pryvieźci ŭ Biełaruś pry viartańni z PMŽ, nie abmiažoŭvajecca aŭtamabilem.

Aproč adnaho lehkavoha aŭto, zamiežnik, jaki pierajazdžaje ŭ Biełaruś na PMŽ, abo biełarus, jaki viartajecca na radzimu, moža biez pošliny pryvieźci pryčep da aŭto i matacykł. Ale nie bolš za adnu adzinku kožnaha vidu transpartu.

Pavialičyć

Śpis tavaraŭ nie abmiažoŭvajecca adnymi tolki transpartnymi srodkami. Viartajučysia z zamiežnaha PMŽ, biez pošliny možna ŭvieźci i inšyja ŭłasnyja rečy, uklučajučy raznastajnuju bytavuju techniku.

Prostymi słovami, čałaviek moža jechać na aŭto z zamiežnaj rehistracyjaj, uziać da jaho pryčep, zavaleny roznaj technikaj i inšymi rečami, uvieźci ŭsio heta biez apłaty myta, a na nastupny dzień vyjechać ź Biełarusi i zajechać na matacykle, jaki taksama zajedzie ŭ krainu biez myta.

Tamu ekanomija na mytnych płaciažach pry takim kamplekcie moža składać navat nie adzin dziasiatak tysiač jeŭra.

Naprykład, poŭnaja mytnaja pošlina za aŭto z trochlitrovym ruchavikom, jakomu ŭžo spoŭniłasia piać hadoŭ, składaje 15 tysiač jeŭra.

Pavialičyć

Kali dadać da kamplekta jašče niejki darahi matacykł koštam 10‑15 tysiač jeŭra, to heta jašče kala 3200‑4800 jeŭra ekanomii na mycie. A jašče ž jość pryčep i inšyja bolš drobnyja rečy.

Zamiest invalidaŭ i šmatdzietnych šukajuć uładalnikaŭ pašparta RR

Praz heta niekatoryja kiemlivyja działki pačynajuć šukać ludziej, z dapamohaj jakich možna prakrucić hetuju afioru.

Dniami pra pošuk achvotnych padzarabić na hetaj ščylinie kazaŭ adzin biełaruski błohier-dalnabojščyk. Maŭlaŭ, jość realnaja mahčymaść padzarabić tym, što maje taki pašpart, ale nie maje hrošaj ci prosta žadańnia samastojna nabyvać i potym pradavać toje aŭto.

Pavialičyć

Adzin z surazmoŭcaŭ «Našaj Nivy» raskazaŭ, što paŭdzielničać u padobnaj schiemie jamu prapanoŭvali jašče letaś.

Kolki płaciać?

Mužčyna, jaki ŭžo maje na rukach pašpart RR, skazaŭ, što za ŭdzieł u takoj ździełcy jamu prapanavali 5000 jeŭra.

Dla hetaha jamu treba było aformić na siabie aŭtamabil i matacykł. Surazmoŭca kaža, što prynamsi da navin pra aryšt mašyn litoŭskaj mytniaj tema ŭvozu aŭto biez myty praz afarmleńnie pašparta RR była vielmi papularnaj u dalnabojnickich kołach.

Mužčyna navat čuŭ pra ŭznaharodu ŭ 10 tysiač dalaraŭ, praŭda, sam ličyć takuju sumu małaimaviernaj.

Pavialičyć

Niejkaj sfarmavanaj taksy, jak u vypadku z razmytnioŭkaj aŭto na lhotnikaŭ, niama. Njekatoryja šukajuć achvotnych prakrucić takuju avanturu za 2000 jeŭra plus apłatu ŭsich vydatkaŭ pa afarmleńni pašparta RR.

Pry hetym surazmoŭca adznačaje, što niaredka razam z mašynaj dla siabie tyja, chto «viartajecca» ŭ Biełaruś, za ŭznaharodu afarmlajuć takim čynam matacykł ci pryčep dla siabroŭ, svajakoŭ i hetak dalej. Hetak ža viazuć niekatoruju patrymanuju bytavuju techniku.

Adna mahčymaść na ŭsio žyćcio

Niahledziačy na adnosnuju prastatu i vyhadu, skarystacca lhotaj pa ŭvozie ŭłasnaj majomaści biez apłaty myty čałaviek moža tolki adzin raz. Pradaŭšy hetaje prava inšamu, čałaviek bolš nie zmoža hetaha zrabić, kali raptam praź niejki čas sapraŭdy budzie mieć takuju patrebu.

Što da papularnaści hetaj schiemy, to, pa nazirańniach dalnabojščyka, bolšaść kali i robić sabie pašpart RR, to dla taho, kab mieć mahčymaść jeździć u Biełaruś na aŭto ź jeŭrapiejskimi numarami.

Tym bolš, što va ŭmovach sankcyj najaŭnaść aŭto na jeŭrapiejskich numarach zdymaje ź biełarusaŭ lubyja abmiežavańni pa pieramiaščeńni, jakija jość u aŭto ź biełaruskaj prapiskaj.

• 0
• 0
• 1
• 4
• 2
• 1
• 0
• 0