Zamiežnik abaviazany zapoŭnić ankietu nie paźniej za 48 hadzin da pierasiačeńnia miažy. Kali ankiety nie budzie — moža čakać štraf da 2000 jeŭra i departacyja. Heta datyčycca ŭsiaho, u tym liku tranzitu ŭ aeraporcie Ryhi.
Z 1 vieraśnia ŭ Łatvii ŭstupaje ŭ siłu novaja pracedura pierasiačeńnia miažy dla hramadzian šerahu trecich krain, u tym liku i biełarusaŭ.
Ciapier dla ŭjezdu treba zahadzia padać infarmacyju pra siabie i čakać paćvierdžańnia (abo admovy). Asnovaju miechanizmu źjaŭlajucca papraŭki da Zakonu ab immihracyi, pryniatyja Siejmam 3 krasavika, a techničnuju realizacyju ŭskładziena na sajt eta.gov.lv.
Ministerstva ŭnutranych spraŭ udakładniła, što zamiežnik abaviazany zapoŭnić ankietu nie paźniej za 48 hadzin da pierasiačeńnia miažy.
U ankiecie treba ŭkazać metu i termin pajezdki, maršrut, miesca mierkavanaha znachodžańnia, kantaktnyja danyja, a taksama źviestki ab słužbie ŭ dziaržaŭnych strukturach abo ŭdziele ŭ vybarach (to-bok deputactva).
Padavać dadzienyja treba asabista — za ich niepradstaŭleńnie ci skažeńnie praduhledžana administracyjnaja adkaznaść (štraf da 2000 €).
Paśla adpraŭki ankiety ŭjazny atrymaje adkaz na paznačany elektronny adras — paćvierdžańnie abo admova. Dazvalajecca padavać źviestki i raniej za 48 hadzin, ale kali płany źmianiajucca — treba abnavić infarmacyju adpaviedna.
Kali čałaviek ujazdžaje tranzitam i nie maje kantaktaŭ u Łatvii, nieabchodna paznačyć tolki dastupnyja kantaktnyja danyja.
Papraŭki raspaŭsiudžvajucca na hramadzian trecich krain, u jakich niama łatvijskaj vizy abo vidu na žycharstva, i jakija nie źjaŭlajucca hramadzianami ES, krain NATO, Šviejcaryi abo Brazilii. Takim čynam, pad novyja patrabavańni traplajuć, naprykład, hramadzianie Biełarusi i Ukrainy
Sistema raźličana na toje, kab pradastaŭlenyja źviestki mahli vykarystoŭvać orhany biaśpieki i pravaachoŭnyja struktury dla acenki ryzyk. Kali takija ryzyki buduć vyjaŭleny, ujezd u Łatviju kankretnaj asobie mohuć abmiežavać.
Kamientary