Padpiavać Turu ŭ «ekstremiscki» čat pryjšoŭ hubazikaviec Artur Hajko. Kamu i čamu jon tam simpatyzuje?
U telehram-čat «Tolki refarmatary i refarmatarki», aproč prapahandysta Ihara Tura, pryjšoŭ vykazacca hubazikaviec i administratar bujnoha z-kanała «Biełorusskij siłovik» Artur Hajko.
Čat «Tolki refarmatary i refarmatarki» byŭ stvorany kolišnim pres-sakratarom Kaardynacyjnaj rady Antonam Radniankovym. Heta jaho razam ź Ivanam Kraŭcovym i Maryjaj Kaleśnikavaj u vieraśni 2020 hoda vyvozili ź Biełarusi, kali Maryja parvała pašpart i zastałasia ŭ krainie. Ciapier u čacie kala 660 udzielnikaŭ, adnak aktyŭnyja tolki niekalki dziasiatkaŭ. Čat pryznany «ekstremisckim».
Jak my daviedalisia, što heta Artur Hajko? Jahony akaŭnt maje imia karystalnika cennelex i id 7136099880. Jon pryviazany da asabistaha telefonnaha numara Artura Hajko. Da jaho ž pryviazanaja staronka «Ukantakcie», jakaja naležyć Hajko — «Artur Mirny».
Da taho ž, Cennelex — adzin ź nikaŭ, jaki vykarystoŭvaŭ Hajko raniej dla rehistracyi ŭ servisie mail.ru.
Hajko prajšoŭsia pa niekalkich temach. Adna ź ich — miedyja. Hajko kaža, što dziaržaŭnyja i niezaležnyja ŚMI pavinny admovicca ad ahresii ŭ bok adno adnaho.
«Usie palityzavanyja płatformy hublajuć svaju aŭdytoryju i mahčymaść na jaje ŭpłyvać. Rana ci pozna heta pryviadzie da taho, što ŭpłyvać budzie ŭžo prosta niama na kaho. Užo zaraz idzie adtok našaj aŭdytoryi da rasijskich miedyja», — narakaje jon.
Praŭda, pry hetym abaraniaje Ryhora Azaronka, jaki palivaje brudam luboha, chto krytykuje ŭładu.
«Dyk Ryhor tolki ŭ vobrazie «kryklivy», a pa fakcie jon dosyć spakojny i razvažlivy. Heta, kali zaŭvažyć, było vidać u intervju Sabčak».
Pra toje, ci daduć kaliści žurnalistam u Biełarusi rabić svajo miedyja, a nie pieć chvałaśpievy Łukašenku, Hajko piša:
«Nu, «jak raniej» nie budzie dakładna. Budzie novy farmat, ale jakim jon budzie — nieviadoma ciapier nikomu».
Taksama hubazikaviec padzialiŭsia, kamu z pradstaŭnikoŭ demakratyčnych sił simpatyzuje.
«Ja, znoŭ ža, vykažu asabistaje mierkavańnie: z boku pakul čutny tolki hołas OSC (Ofisa Cichanoŭskaj — NN) ź ich staroj pieśniaj pra «ŭžo chutka, treba terminova dacisnuć».
Takim hałasam, jak vaš — a vas niamała: Tania [Chomič], Ivan [Kraŭcoŭ], Anton [Radniankoŭ], [Andrej] Dźmitryjeŭ, [Andrej] Jahoraŭ, byccam by i [Valer] Kavaleŭski — vašamu, na moj pohlad, abjektyŭnamu punktu hledžańnia nie chapaje važkaści. Vas nie čuvać.
Moža, praz adsutnaść kankretnych prapanoŭ, moža, praź vieta z boku OSC (pryvitańnie «niezaležnym ŚMI»), a moža, praz adsutnaść popytu ŭ ludziej ahułam. Mnohija ŭžo daŭno ad usiaho hetaha stamilisia».
30-hadovy supracoŭnik HUBAZiKa staŭ viadomy tym, što ŭkaraniŭsia ŭ «Čornuju knihu Biełarusi» (prajekt vykładaŭ imiony i adrasy siłavikoŭ, čynoŭnikaŭ i prapahandystaŭ, zamiašanych u represijach) i dzieviać miesiacaŭ byŭ jaje administrataram.
Ciapier čytajuć
Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia8080
Kamientary