Što budzie z aŭtobusnymi turami ŭ Jeŭropu paśla zakryćcia miažy z Polščaj

Padarožniki taksama pacierpiać, bo navat častkova kampiensavać vydatki na padrychtoŭku pajezdki im nichto nie zmoža. Zvyčajnaja strachoŭka ŭ hetaj situacyi nie dapamoža.

Biełaruskija turfirmy, jak akazałasia, čakali niejkich uskładnieńniaŭ. Naprykład, adna z kampanij, jakaja arhanizuje aŭtobusnyja tury, užo pieraniesła častku pajezdak, kab jany nie supadali z terminami vajskovych vučeńniaŭ «Zachad» u Biełarusi. Jak adznačaje pradstaŭnik kampanii, im udałosia minimizavać častku ryzyki, ale całkam jaje paźbiehnuć nie atrymałasia.

Inšyja turfirmy šukajuć mahčymaść abjezdu praź Litvu abo Łatviju. Adnak heta składana: naprykład, kirunak praź Litvu ciapier vielmi pierahružany, a kab trapić u Łatviju, usie pasažyry biez łatvijskaj vizy ci dazvołu na žycharstva pavinny za 48 hadzin da ŭjezdu zapoŭnić elektronnuju ankietu samastojna. Dla vialikaj hrupy ludziej heta stvaraje istotnyja ciažkaści, asabliva kali da vyjezdu zastajecca mała času.

Bolšaść turfirmaŭ zaraz čakajuć aficyjnaha paviedamleńnia polskich uładaŭ pra zakryćcio miažy, kab daviedacca dakładnyja terminy. Śpiecyjalisty adznačajuć: kali zakryćcio budzie bolš za 5—7 dzion, straty buduć vielmi istotnyja. Nie ŭsie tury možna pieranieści pa časie, a mnohija turysty nie zmohuć źmianić datu pajezdki z-za adpačynku abo terminaŭ dziejańnia vizy.

U vypadku admieny turaŭ turfirmy pavinny buduć kampiensavać klijentam bolšuju častku vydatkaŭ, što moža stvaryć prablemy ź viartańniem hrošaj partnioram u Jeŭropie i hatelam, a časam heta moža pryvieści i da štrafaŭ.

Klijenty turfirmaŭ taksama nie całkam abaronieny. Niekatoryja zmohuć pahadzicca na pieranos tura, ale heta mahčyma tolki pry najaŭnaści doŭhaterminovaj vizy. Šmat chto atrymlivaje vizu na kankretnyja daty pajezdki, a kali hetyja daty mianiajucca, vizu treba adkryvać nanoŭ. Varta adznačyć, što hrošy za nievykarystanuju vizu nie viernuć. «Strachoŭka ad niavyjezdu» na taki vypadak nie raspaŭsiudžvajecca.

Akramia taho, hetaja situacyja moža źnizić popyt na aŭtobusnyja tury ŭ Jeŭropu na najbližejšy čas, bo ludzi buduć bajacca paŭtoru padobnych prablem. Pavodle staršyni Respublikanskaha sajuzu turystyčnaj industryi Filipa Hułaha, heta moža pavialičyć cikavaść da mienš ryzykoŭnych maršrutaŭ, naprykład, u Baku, Tbilisi, krainy Centralnaj Azii abo rehijony Rasii.

• 0
• 0
• 0
• 0
• 0
• 0
• 0
• 0