Jak žonka Uładzimira Pucina jašče ŭ 1990‑ia daviedałasia pra zdrady muža
Pucina zdaŭ jaho siabar Ihar Siečyn.
Rasijskija rasśledavalniki Raman Badanin i Michaił Rubin u svajoj knizie «Car ułasnaj piersonaj» raskazali pra pikantny epizod z žyćcia Uładzimira Pucina ŭ 1990-ja. Im pra heta paviedamiŭ były blizki znajomy lidara Kramla, a tady namieśnika kiraŭnika Administracyi prezidenta Barysa Jelcyna, piša BILD.
Jak pišuć Badanin i Rubin, Pucin šukaŭ miesca dla sustreč z paluboŭnicaj. Na dapamohu jamu pryjšoŭ Ihar Siečyn, jaho padnačaleny. Vypadkova jon atrymaŭ u toj čas kvateru płoščaj navat bolš, čym u šefa. «Prykładna na čatyry kvadratnyja mietry», — uspaminaje surazmoŭca aŭtaraŭ knihi. Heta złavała Pucina, ale jon źmiryŭsia, bo Siečyn pradastaŭlaŭ jamu hetuju kvateru kožny raz, kali sam z žonkaj sychodziŭ z domu.
Usio heta rabiłasia tajemna ad žonki Siečyna Maryny. Adnaho razu jana viarnułasia dadomu raniej, čym čakałasia, i zastała ŭ svajoj kvatery paluboŭnicu Pucina (sam jon užo ci syšoŭ, ci jašče nie paśpieŭ pryjści). Naturalna, jana zapadozryła ŭ zdradzie muža. Toj nie staŭ chłusić i «zdaŭ» načalnika. A Maryna adrazu ŭsio raskazała Ludmile Pucinaj, ź jakoj była znajomaja.
Što potym adbyłosia pamiž Ludmiłaj i Uładzimiram, nieviadoma. Aficyjna jany raźvialisia tolki ŭ 2013 hodzie.
Siabroŭstvu ž Pucina ź Siečynym hety epizod nie paškodziŭ. Siečyn da hetaha času ličycca adnym z samych mahutnych ludziej Rasii i ŭznačalvaje «Rasnaftu».
Kniha Ramana Badanina i Michaiła Rubina pra Uładzimira Pucina vyjšła ŭ lipieni 2025 hoda.
Kamientary