У Беларусі можна пажыць ва ўласнай бурбалцы. Дзяўчына паказала незвычайны гатэль сярод лесу
Дзяўчына паказала, як жыла ў цалкам празрыстай бурбалцы: «Чуваць толькі гукі дажджу і лісця». Але яе энтузіязм падзяляюць не ўсе: «Можа, маньяк за табой назірае».
Адзін з самых незвычайных гатэляў Беларусі знаходзіцца за 30 кіламетраў ад Мінска — недалёка ад Ракава. Нумароў (калі іх можна так назваць) усяго тры — і ўяўляюць сабой пакоі цалкам празрыстыя бурбалкі.
З аднаго боку, ты можаш бачыць усё навокал у любую пару года. З іншага — ты таксама жывеш быццам бы ўнутры акварыума. Стваральнікі запэўніваюць: хвалявацца няма праз што, бо знаходзяцца «бурбалкі» на прыватнай тэрыторыі, якая ахоўваецца. То-бок выпадковы чалавек на вас глядзець не прыйдзе. Але тыя, хто ўжо адпачыў у гатэлі Bubble, пішуць, што восенню і зімой усё ж можна пабачыць іншых турыстаў.
Унутры «бурбалак» ёсць вялікі ложак, кандыцыянер, мікрахвалёўка, чайнік, посуд, ручнікі ды разеткі. А вось унітаз у празрысты пакойчык па зразумелай прычыне ставіць не сталі. Туалет і душ (апошнім можна карыстацца выключна летам) знаходзяцца на вуліцы. Там жа прадугледжана зона барбекю, дзе можна гатаваць ежу.
Калі самастойна гатаваць няма жадання, то за пяць кіламетраў ёсць рэстаран, адкуль можна замовіць дастаўку.
З’явіўся гатэль Bubble яшчэ ў 2020 годзе, калі праз пандэмію каранавіруса краіны пазакрывалі межы, а беларусы пачалі шукаць варыянты цікава адпачыць на радзіме.
Два з трох «нумароў» — гэта сапраўдныя шары, якія неабходна перыядычна паддзімаць (для гэтага дыстанцыйна ўсталяваная адмысловая помпа і пракладзеныя паветраныя тросы). Шар мае дыяметр па падлозе 4,2 метра, яго вышыня — каля 3,5‑4 метраў. Трэці «нумар» зроблены з полікарбанату, таму мае сталую форму.
Гасцей гатэль можа прымаць да таго моманту, пакуль на вуліцы не будзе халадней за -10 градусаў. Пераначаваць тут каштуе 350 рублёў.
Пра свой адпачынак там у тыктоку распавяла беларуская блогерка Кацярына Цэхавая. Яна засталася ў захапленні:
— Калі знаходзішся ўнутры, поўнае адчуванне, быццам сферы няма і ты жывеш проста на прыродзе. Чуваць толькі гукі дажджу, лісця, а побач журчыць ручай. Унутры цёпла і ўтульна, ложак з падагрэвам.
Яе ролік набраў 285 тысяч праглядаў і больш за 10 тысяч лайкаў. А вось у каментарыях з'явіліся людзі, якія адпачывалі ў тых бурбалках, і не ўсе з іх засталіся задаволенымі.
«Не каштуе сваіх грошай, восенню холадна, душ далёка, туалет на вуліцы халодны, халадзільніка няма, тэлевізара таксама. Шчыра, выкінутыя грошы. За гэтую суму можна было арандаваць нармальны дом, мы былі засмучаныя, нават ноччу з’ехалі праз холад», — напісала адна дзяўчына.
«Атмасфера сапраўды крутая, былі ў маі. Але сваіх грошай не каштуе», — дадала іншая.
Нехта хвалюецца пра бяспеку і лічыць такі гатэль марай маньяка. Але большасць каментатараў у захапленні ад ідэі такога адпачынку.
Здаецца, дзяўчына знайшла самае інстаграмнае месца для адпачынку ў Беларусі. Але кошт глэмпінгу не для слабанервовых
Дзяўчына арандавала на дзень народзінаў замак пад Мінскам — і ўзарвала тыкток
У сялянскай хаце або ў замку. Дзе ў Беларусі можна пажыць у гістарычным будынку і колькі гэта каштуе?
Пяць люксавых гатэляў Беларусі, якія знаходзяцца ў невялікіх гарадах. Вы дакладна пра іх не ведалі
Цяпер чытаюць
«Я стаў шчаслівы». Праца на будоўлі прыносіць добрыя грошы, а грамадская актыўнасць — маральную сілу. Былы каліновец Кусь расказаў пра тое, як вярнуў унутраную раўнавагу
«Я стаў шчаслівы». Праца на будоўлі прыносіць добрыя грошы, а грамадская актыўнасць — маральную сілу. Былы каліновец Кусь расказаў пра тое, як вярнуў унутраную раўнавагу
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе1010
Каментары