«Kala pałovy ŭ čarzie ŭ DAI — rasijanie». Rasijanie ŭ čarhovy raz łamanulisia ŭ Biełaruś pa luksavyja mašyny
Zdajecca, heta budzie apošni ryvok. Voś što raskazvajuć.
«Kuplali šmat BMW, Mercedes, Audi»
Užo nie pieršy miesiac u Biełarusi nazirajecca pavyšany popyt na aŭtamabili z boku rasijan.
Mužčyna, jaki ŭ pačatku miesiaca zdymaŭ aŭto z uliku ŭ DAI, kaža, što kala pałovy ludziej u čarzie byli rasijanami.
«Na ahladzie taksama było šmat ruskich, jakija kuplali davoli darahija aŭto — šmat BMW, Mercedes, Audi, Range Rover», — dzielicca nazirańniami biełarus.
Adbyvajecca heta na fonie taho, što rasijskija ŭłady čarhovy raz vyrašyli pierahladzieć staŭki ŭtylizacyjnaha zboru na aŭtamabili — hetym razam na mašyny z matorami mahutnaściu bolš za 160 k.s. Spačatku płanavałasia, što novyja staŭki ŭtylizacyjnaha zboru buduć dziejničać z 1 listapada 2025 hoda, ale paźniej datu ŭviadzieńnia novych normaŭ pieranieśli na 1 śniežnia.
Pieranos zhulaŭ na ruku biełaruskim pradaŭcam. Pryhnać za miesiac aŭto ź Jeŭropy, ZŠA ci Karei rasijanie ŭžo nie paśpiejuć, tamu pierš za ŭsio jany łamanulisia ŭ Biełaruś.
Ceny vyrastuć bolš čym istotna
U adroźnieńnie ad papiarednich źmien, kali pavyšany ŭtylzbor možna było abyści, razmytniŭšy aŭto adrazu ŭ RF na fizičnuju asobu abo pačakaŭšy, pakul mašyna praviadzie hod u Biełarusi ci inšaj krainie JEAES, ciapier usio heta nie maje značeńnia.
Dla mašyn va ŭzroście da troch hadoŭ minimalny pryrost utylzboru składzie 750 tysiač rasijskich rubloŭ (kala $9 200), a dla starejšych za try hady — 1 244 000 rubloŭ (kala $15 300).
Dla aŭtamabilaŭ z matorami mahutnaściu da 160 k.s. ničoha nie źmianiajecca, i rasijanie zmohuć i dalej płacić kapieječny (da 70 dalaraŭ) lhotny ŭtylzbor.
Tamu ciapier u pieršuju čarhu vyhrabajuć aŭtamabili, jakija ŭžo bolš za hod u Biełarusi i majuć bolš za 160 konskich sił.
Na toje, što rasijanie masava skupajuć mašyny ŭ Biełarusi, pakazvaje i situacyja na aŭtarynku «Malinaŭka». Błohiery-padborščyki ŭžo nieadnarazova zaŭvažali, što na rynku zastajecca ŭsio mienš aŭtamabilaŭ, jakija padychodziać dla ekspartu ŭ Rasiju.
«Raniej za miesiac u nas ź placoŭki ŭ Rasiju mahło pajechać 2‑5 mašyn, a za kastryčnik pradali 17»
Ułaśnik aŭtakamisa, ź jakim pahutaryła «Naša Niva», taksama adznačaje, što apošnim časam klijentaŭ z RF stała značna bolš.
«Kali jašče ŭ pieršaj pałovie hoda za miesiac u nas ź placoŭki ŭ Rasiju mahło pajechać 2‑5 mašyn, to z vosieni takich pakupnikoŭ stała našmat bolš. Tolki za kastryčnik u RF my pradali 17 aŭto, i ŭ hetym miesiacy budzie ŭžo kala dziesiaci», — dzielicca nazirańniami ŭłaśnik aŭtakamisa.
Ź jaho słoŭ, aproč aŭto z matorami mahutniejšymi za 160 k.s., jon pradaŭ i niekalki varyjantaŭ z bolš słabymi ruchavikami.
«Adzin z takich pakupnikoŭ skazaŭ, što siońnia padymajuć utyl na adny aŭto, a zaŭtra padymuć na inšyja, tamu vyrašyŭ paśpiašacca», — zhadvaje surazmoŭca.
Vybar abmiežavany
Kolkaść mašyn, pradadzienych u Rasiju, mahła b być bolšaj, ale vybar abmiežavany.
«Ja čuŭ, što niekatoryja navat pakupajuć aŭto, jakija pryviezienyja mienš jak 12 miesiacaŭ tamu, i płaciać kamiercyjny ŭtyl, bo jon usio adno mienšy za novyja staŭki. Ale asnoŭnaja masa, kaniečnie, šukaje mašyny, jakija bolš jak hod u Biełarusi.
A pakolki vybar takich aŭto abmiežavany, to prodažy nie takija vialikija, jak, naprykład, byli padčas minułych źmienaŭ u Rasii, kali nie mieła značeńnia, kali mašyna była razmytnienaja ŭ Biełarusi», — kaža ŭłaśnik aŭtakamisa.
Stali viadomyja padrabiaznaści taho, jak u Vjetnamie zatrymali Vieramiejčyka21
Kamientary