Biełaruski dziudaist čatyry hady tamu pakinuŭ Biełaruś i nie zhubiŭsia ŭ novaj krainie

30‑hadovy spartsmien vystupaje ŭ ciažkaj vahavoj katehoryi zvyš 100 kh. Da pierajezdu jon byŭ šmatrazovym čempijonam Biełarusi. U 2016 hodzie Śviryd zavajavaŭ bronzu na junijorskim čempijanacie Jeŭropy ŭ ispanskaj Małazie, a taksama srebra na čempijanacie Jeŭropy siarod spartsmienaŭ da 23 hadoŭ u Tel-Avivie. U 2017 hodzie jon uziaŭ jašče adno srebra ŭ Padhorycy, a ŭ 2019‑m — bronzu na turniry Grand Prix u Taškiencie.

Na Alimpijskich hulniach u Tokia ŭ 2021 hodzie jon pradstaŭlaŭ Biełaruś, ale atrymaŭ tam traŭmu, złamaŭšy ruku. Jahony baćka Leanid Śviryd raniej byŭ hałoŭnym trenieram zbornaj Biełarusi pa dziudo.

Paśla pačatku poŭnamaštabnaj rasijskaj ahresii suprać Ukrainy ŭ 2022 hodzie siamja Śvirydaŭ — baćka, maci i Mikita — pierajechała ŭ Charvatyju i pasialiłasia ŭ Splicie. Adnoj z pryčyn adjezdu stała niazhoda z padtrymkaj biełaruskimi ŭładami rasijskaj ahresii, ale taksama na rašeńnie mahli paŭpłyvać kanflikty vakoł stanovišča baćki i syna ŭ biełaruskim dziudo.

U krasaviku 2022 hoda Rada Charvackaha alimpijskaha kamiteta padtrymaŭ nadańnie Mikitu Śvirydu hramadzianstva Charvatyi, adnak vystupać za novuju krainu jamu adrazu nie dazvolili.

Biełaruskaja fiederacyja dziudo nie chacieła vydavać jamu nieabchodnyja dakumienty dla pierachodu biez vypłaty kampiensacyi. Pavodle samoha Śviryda, suma hetaj kampiensacyi była supastaŭnaja z kampiensacyjami za pierachody viadomych futbalistaŭ — jon navat paraŭnaŭ jaje z sumaj, jakuju mahli b patrabavać za adnaho ź lidaraŭ charvackaj zbornaj Ivana Pieryšyča.

Tamu spartsmien zastaŭsia ŭ Splicie, praciahvaŭ treniravacca i čakaŭ mahčymaści vystupać za Charvatyju. U vyniku tolki z vosieni 2024 hoda jon atrymaŭ prava ŭdzielničać u mižnarodnych spabornictvach pad charvackim ściaham. Amal dva z pałovaj hady jon nie vystupaŭ na aficyjnych turnirach Mižnarodnaj fiederacyi dziudo.

Śviryd pradstaŭlaje splicki kłub Student, dzie ciapier taksama pracuje jaho baćka. Za Charvatyju jon pačaŭ vystupać u 2025 hodzie i ŭžo paśpieŭ zavajavać niekalki miedaloŭ.

Siarod ich — srebra na turniry European Open u Paryžy, srebra ŭ Lublanie, bronza na turniry «Vialikaha šlema» (Grand Slam) u Taškiencie i niadaŭniaje srebra na anałahičnym turniry ŭ pieruanskaj Limie. Taksama Mikita Śviryd staŭ čempijonam Charvatyi ŭ svajoj vahavoj katehoryi. Pry vazie kala 135 kh jon vyłučajecca dobraj fizičnaj padrychtoŭkaj i vynoślivaściu.

Na hety momant u suśvietnym rejtynhu ŭ katehoryi zvyš 100 kh Śviryd zajmaje 27‑ie miesca. Charvackija žurnalisty ličać, što pry dalejšym prahresie jon moža pretendavać na ŭdzieł u Alimpijskich hulniach u Łos-Andželesie ŭ 2028 hodzie.

• 0
• 0
• 0
• 0
• 0
• 0
• 0
• 0