Lidar hurta «Drazdy» Vital Karpanaŭ, jaki letaś abviaściŭ pra sychod kalektyvu sa sceny i płany zaniacca biełaruskamoŭnym stendapam, padzialiŭsia niečakanymi kadrami. Muzyka apublikavaŭ fota ŭ carkoŭnym abłačeńni z carkvy Śviatoj Jefrasińni ŭ Iviancy.
«Z naradžeńniem Chrysta! Znoŭ daviałosia papanamaryć, pamalicca ŭ ałtary svajho chrama ŭ Iviancy praz 25 hadoŭ! Paradavała pytańnie samaha maleńkaha panamara, chłopčyk 9 hadoŭ, jaki padyšoŭ i spytaŭ: «A ty słužyŭ?»», — napisaŭ muzyka ŭ Threads.
Panamar (abo ałtarnik) — heta nie śviatar, a śviecki słužyciel, jaki dapamahaje pry bohasłužeńni. Jaho hałoŭnaja zadača — sačyć za paradkam u ałtary i svoječasova dapamahać śviataru.
Mienavita panamary raspalvajuć kadziła, vynosiać śviečki, rychtujuć abłačeńnie dla śviataroŭ, zvoniać u zvany i prybirajuć u ałtary. Heta nižejšaja stupień carkoŭnaha słužki, da jakoj časta dałučajucca chłopčyki ci mužčyny ź liku viernikaŭ.
Dla Karpanava vizit u ivianiecki chram — heta sapraŭdnaje viartańnie damoŭ. Chacia muzyka naradziŭsia ŭ Dubrovienskim rajonie, jaho dziacinstva prajšło pobač ź Iviancom, u vioscy Sivica.
U školnyja hady (z 5‑ha da 11‑ha kłasa) Vital razam z maci naviedvaŭ carkvu Śviatoj Jefrasińni Połackaj, jakaja tady tolki budavałasia — u tym liku ź jaho ŭdziełam. Karpanaŭ śpiavaŭ u carkoŭnym chory, naviedvaŭ niadzielnuju škołu i byŭ słužkam u ałtary.
Sama słužba, pra jakuju napisaŭ śpiavak, prachodziła ŭ nižniaj carkvie hetaha chrama, pabudavanaha ŭ 1998 hodzie na miescy byłoha kaścioła ŭ stylizavanych formach staražytnaruskaha dojlidstva.
Vital Karpanaŭ u ałtary carkvy. Fota: Threads
Ciažki hod dla «Drazdoŭ»
Apošni hod dla Karpanava i jaho hurta byŭ niaprostym. «Drazdy», viadomyja svaimi biełaruskamoŭnymi chitami i łajalnaj da ŭłady rytorykaj, raptoŭna sutyknulisia z prablemami. Niahledziačy na padkreślenuju padtrymku aficyjnaha kursu i navat svojeasablivaje «pakajańnie» za 2020 hod (tady Karpanaŭ paraŭnaŭ pratestoŭcaŭ z tymi, chto «prystaviŭ nož da horła kiroŭcy», a siabie i inšych spałochanych — z tymi, chto «puknuŭ ad strachu»), hurt trapiŭ pad presinh.
Pryčynaj stali skarhi prarasijskich aktyvistaŭ, siarod ich, Volhi Bondaravaj, jakuju razdražniała biełaruskaja mova ŭ tvorčaści muzykaŭ. Uviesnu Karpanaŭ navat zajaŭlaŭ pra spynieńnie dziejnaści hurta, bo im faktyčna zabaranili vystupać u bujnych haradach.
Paźniej situacyja krychu palepšyłasia: paśla rezanansu ŭ ŚMI čynoŭniki nibyta dali dabro na kancerty ŭ abłasnych centrach. Adnak stalica dla «Drazdoŭ» zastałasia zakrytaj — u praviadzieńni kancerta ŭ minskim Pałacy sportu im admovili.
Na hetym fonie Karpanaŭ pačaŭ šukać siabie ŭ inšych žanrach, anansavaŭšy solnyja vystupy ŭ farmacie biełaruskamoŭnaha stendapa, bo, pavodle jaho nazirańniaŭ, «siało zdahaniaje» navat tych, chto źjechaŭ u vialiki horad i admaŭlajecca ad rodnaj movy.
Kamientary