Łukašenka pra vykradańnie Madura: Heta sastupka Trampa vajskoŭcam za Afhanistan
Uručajučy ŭ Minsku premii «Za duchoŭnaje adradžeńnie», Alaksandr Łukašenka ŭpieršyniu asabista vykazaŭsia pra vykradańnie amierykanskim śpiecnazam kiraŭnika Vieniesueły Nikałasa Madura i dastaŭku jaho na sud u ZŠA.
Łukašenka nazvaŭ vieniesuelski narod «siabroŭskim» i nahadaŭ pra svaje ščylnyja adnosiny jak ź Nikałasam Madura, tak i ź jahonym papiarednikam Uha Čaviesam. Hruntujučysia na hetym, jon ličyć siabie ekśpiertam pa Vieniesuele i nibyta sprabavaŭ svaju pazicyju danieści da amierykancaŭ:
«Napiaredadni ja skazaŭ, što kali vy, amierykancy, chočacie druhi Vjetnam, vy jaho atrymajecie. Jak by tam ni składvałasia situacyja, mnie zdajecca, jany heta pačuli. I toje, što jany pahražajuć ciapier Vieniesuele niejkaj naziemnaj apieracyjaj, ja dumaju, jany vydatna razumiejuć, što hetaja apieracyja skončycca nie na ich karyść. Tysiačy zahinuć užo. I amierykancy. Dumaju, ni Donald, ni inšyja hetaha nie chočuć».
Pryčynu ž taho, što amierykancy ŭsio ž vykrali Madura, jon bačyć u patrebie Trampa kinuć piernik svaim siłavikam, jakija pierad tym nibyta byli prynižanyja:
«Vy pavinny dakładna razumieć: Amieryka — vielmi składanaja kraina. Heta nie tak, jak u nas, navat u Rasii i inšych krainach. Ja dumaju, heta chutčej za ŭsio sastupka Donalda Trampa vajskoŭcam. Pamiatajecie, jak uciakali z Afhanistana, čaplajučysia za šasi samalotaŭ, padali na ŭźlotna-pasadačnaj pałasie? Hańba! Nu treba ž było pakazać, što na niešta zdolnyja».
«Ja chaču, kab vy razumieli: tam było ŭsio. I damoŭlenaść, i hrošy, jakija byli apłačanyja ŭ tym liku ludziam u Vieniesuele. I vajskoŭcam, i cyvilnym. Tam była zmova, i tam była zdrada. Usio tam było», — padkreśliŭ Łukašenka.
Na jahonuju dumku, Tramp moh by dasiahnuć u Vieniesuele svaich metaŭ i biez takoj prynižalnaj dla jaje apieracyi:
«Ja tolki ŭdziačny Donaldu za toje, što jon adkryta kaža: «Nafta, nam patrebna nafta!» Ja heta z bolem kažu pra toje, što byŭ u niejkaj stupieni ŭciahnuty ŭ hetuju situacyju ŭ samym pačatku. I amierykancaŭ infarmavaŭ, što vieniesuelcy hatovyja z vami supracoŭničać. Nie treba rabić hetyja hłupstvy, ź jakich budzie vielmi składana vyjści. […] Usio, što chočuć amierykancy, možna było zrabić biez zachopu», — śćviardžaje jon.
Učarašni zachop amierykancami rasijskaha tankiera Łukašenka aceńvaje jak tolki «śpiektakl»:
«Ja im zaŭsiody kazaŭ, adnak i svajho starejšaha brata papiaredžvaŭ, i prosta napiaredadni hetaha hidkaha mierapryjemstva: nie było b tolki śpiektakla z boku amierykancaŭ i ŭsiaho Zachadu, nie razyhrali b jany nas u čarhovy raz. I siońnia ja absalutna pierakanany, što heta tak. Navošta było zachoplivać zusim niadaŭna pusty rasijski tankier pad ściaham Rasii? Navošta heta treba było rabić, kali vy chočacie miru va Ukrainie?»
Zialenski prapanavaŭ ZŠA zachapić Kadyrava pa prykładzie Madura
U Karakasie amierykanskija śpiecnazaŭcy «bačyli» praź ścieny. Što heta za supiertechnałohija?
Za Madura sačyli mikradrony pamieram z nasiakomaje?
Dziarždep ZŠA pa-rusku zajaviŭ pra niebiaśpieku hulniaŭ z Trampam
Tramp: U nastupnyja 30 dzion vybary ŭ Vieniesuele niemahčymyja — «spačatku my pavinny navieści paradak u krainie»
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary