Premjer Kanady: Stary suśvietny paradak nie vierniecca, siarednim dziaržavam treba trymacca razam
«Siarednija dziaržavy pavinny dziejničać razam, bo, kali nas niama za stałom, my stanovimsia častkaj mieniu», — zajaviŭ Karni.
Mark Karni ŭ svajoj pramovie na Suśvietnym ekanamičnym forumie ŭ Davosie zajaviŭ, što «stary paradak užo nie vierniecca» i zaklikaŭ mienš bujnyja krainy abjadnacca, kab adstojvać svaje intaresy ŭ baraćbie z samymi bujnymi, piša Bi-bi-si.
«Siarednija dziaržavy pavinny dziejničać razam, bo, kali nas niama za stałom, my stanovimsia častkaj mieniu», — zajaviŭ Karni ŭ aŭtorak, dadaŭšy, što, na jaho dumku, mahutnyja krainy vykarystoŭvajuć ekanamičny prymus, kab atrymać žadanaje.
Jon taksama paćvierdziŭ hatoŭnaść Kanady akazvać padtrymku Hrenłandyi, Danii i aljansu NATA, čym vyklikaŭ apładysmienty zały.
Pad vialikimi dziaržavami zvyčajna razumiejuć krainy, jakija majuć pastajannyja miescy ŭ Radzie biaśpieki AAN — Kitaj, Francyju, Rasiju, Vialikabrytaniju i ZŠA. Ich status adlustroŭvaje značny ekanamičny i vajenny patencyjał.
Da siarednich dziaržaŭ adnosiać dziaržavy nakštałt Kanady, Aŭstralii, Arhienciny, Paŭdniovaj Karei i Brazilii — krainy, jakija, niahledziačy na bolš ścipłyja pamiery ich ekanomik, taksama akazvajuć vialiki ŭpłyŭ na suśvietnuju palityku.
U svajoj pramovie Karni skazaŭ, što śviet znachodzicca «ŭ razhary pierałomu, a nie ŭ pracesie pierachodu».
«Vialikija dziaržavy pačali vykarystoŭvać ekanamičnuju intehracyju ŭ jakaści zbroi, taryfy ŭ jakaści ryčahu ŭździejańnia, finansavuju infrastrukturu ŭ jakaści srodku prymusu, a łancužki pastavak u jakaści ŭraźlivych miescaŭ, jakija možna vykarystoŭvać u svaich intaresach», — skazaŭ jon.
Karni taksama zajaviŭ, što «Kanada była adnoj ź pieršych, chto pačuŭ tryvožny sihnał» ab tym, što hieahrafičnaje stanovišča i histaryčnyja sajuzy bolš nie harantujuć biaśpieku i roskvit.
Prezident ZŠA nieadnarazova nazyvaŭ Kanadu « 51‑m štatam» i pahražaŭ abjadnać jaje z ZŠA z dapamohaj «ekanamičnaj siły». Vašynhton uvioŭ u dačynieńni da paŭnočnaha susieda i bujnoha handlovaha partniora vysokija pošliny. Pry hetym Kanadzie ŭdałosia naraścić ekspart na inšyja rynki na 14% — bolš, čym jana straciła z-za źnižeńnia pastavak u ZŠA. Niadaŭna Karni taksama zaklučyŭ ambicyjnaje handlovaje pahadnieńnie z Kitajem.
Niadaŭna Tramp uklučyŭ Kanadu ŭ svaje płany pa zachopu Hrenłandyi, apublikavaŭšy ŭ sacyjalnych sietkach kartu ZŠA, Kanady i Hrenłandyi z nakładzienym na jaje vyjavaj amierykanskaha ściaha.
Pa słovach Karni, Kanada, jak člen NATA, ćviorda padtrymlivaje Hrenłandyju, Daniju i «ich vyklučnaje prava vyznačać budučyniu Hrenłandyi».
«Naša prychilnaść artykułu 5 zastajecca niepachisnaj», — dadaŭ premjer-ministr, majučy na ŭvazie punkt damovy NATA, jaki zvyčajna traktujecca takim čynam, što napad na adnaho z členaŭ aljansu ličycca napadam na ŭsich.
U pačatku hetaha tydnia kanadskija ŚMI paviedamili, što Kanada razhladaje mahčymaść adpraŭki nievialikaha kantynhientu vojskaŭ u Hrenłandyju dla ŭdziełu ŭ vajennych vučeńniach razam z dackimi i inšymi jeŭrapiejskimi vojskami.
Adkazvajučy na pytańnie pra heta ŭ Davosie, ministr zamiežnych spraŭ Kanady Anita Anand skazała: «My rehularna ŭdzielničajem u vučeńniach NATA, a taksama ŭ vučeńniach, jakija pravodziać sami kanadskija ŭzbrojenyja siły». Jana dadała, što rašeńni ab budučych raźmiaščeńniach vojskaŭ prymajuć ministr nacyjanalnaj abarony i načalnik štaba abarony.
U svajoj pramovie Karni skazaŭ, što dla adaptacyi da hieapalityčnaj situacyi, jakaja źmianiajecca, Kanada ŭ ciapierašni čas skancentravana na ŭzajemadziejańni ź inšymi krainami i stvareńni «roznych kaalicyj pa roznych pytańniach na asnovie ahulnych kaštoŭnaściej i intaresaŭ».
Premjer-ministr nazvaŭ Kanadu «stabilnym i nadziejnym» partnioram i adznačyŭ niadaŭnija handlovyja i inviestycyjnyja pahadnieńni, zaklučanyja z Kitajem i Kataram, a taksama dahavor ab zakupkach u śfiery abarony, padpisany Kanadaj ź ES u pačatku minułaha hoda.
Karni naŭprost nie zhadaŭ Donalda Trampa ŭ svaim vystupie, ale niekatoryja jaho zaŭvahi zdavalisia adrasavanymi prezidentu ZŠA, jaki płanuje vystupić na Suśvietnym ekanamičnym forumie z pramovaj ŭ sieradu.
Kamientary