«Što zdaryłasia ź Litvoj?» Brusiel azadačany nieadnaznačnaj pazicyjaj Vilni ŭ dačynieńni da Minska
Niahledziačy na paciapleńnie adnosin pamiž Vašynhtonam i Minskam, čakajecca, što Jeŭrapiejski sajuz usio ž padoŭžyć sankcyi ŭ dačynieńni da Biełarusi. Adnak supiarečlivyja sihnały, jakija pastupajuć ź Vilni, ździŭlajuć Brusiel, piša LRT.
ES prymaje šerah sankcyjnych mier suprać Biełarusi ŭ adkaz na represii z boku režymu, parušeńni pravoŭ čałavieka i jaje rolu ŭ padtrymcy vajennaj ahresii Rasii suprać Ukrainy. Hetyja abmiežavańni miarkujecca padoŭžyć da 28 lutaha 2026 hoda.
Apošnim časam ZŠA źmiakčyli svoj padychod da režymu Alaksandra Łukašenki i ŭ abmien na vyzvaleńnie palityčnych źniavolenych abviaścili pra admienu sankcyj u dačynieńni da biełaruskich avijalinij i ŭhnajeńniaŭ.
Adnak u Brusieli padkreślivajuć, što ES nie maje namieru iści tym ža šlacham, pakolki Minsk nie źmianiŭ svaich pavodzin.
«Nasamreč heta [admiena sankcyj ZŠA] daje peŭnyja adčuvalnyja humanitarnyja vyniki, pakolki zaraz byli vyzvalenyja mnohija apanienty, u tym liku i takija, jak Maryja Kaleśnikava. Ale było b vielmi naiŭna mierkavać, što heta moža pryvieści da jakich-niebudź źmien režymu ŭ Biełarusi ci da bolš ščylnych adnosin pamiž Biełaruśsiu i Amierykaj, pakolki i sama Biełaruś nie advierniecca ad Rasii», — zajaviła LRT analityk Jeŭrapiejskaha palityčnaha centra (EPC) u Brusieli Maryja Marcišucie.
«Toje, što ja čuju ŭ Brusieli, — prosta procilehłaje. Dumaju, ES maje namier i dalej uzmacniać sankcyi suprać Biełarusi».
Dypłamaty taksama z aptymizmam hladziać na padaŭžeńnie sankcyj ES u dačynieńni da Minska, choć niekatoryja krainy imknucca da peŭnych źmiakčeńniaŭ — naprykład, da adkryćcia pavietranaj prastory dla biełaruskich avijakampanij i tamu padobnaha.
«Nakolki mnie viadoma, i Vienhryja, i Słavakija patrabujuć peŭnych sastupak. Skažu navat bolš — isnuje karotki śpisak aliharchaŭ, jakich hetyja dziaržavy starajucca vykraślić sa śpisa asob, što padpadajuć pad sankcyi. A što heta kali nie karupcyja, palityčnaja karupcyja?» — aburaŭsia ŭ razmovie z LRT člen kamiteta Jeŭraparłamienta pa zamiežnych spravach Piatras Aŭštravičus.
Ekśpiert pa sankcyjach inšaha analityčnaha centra, jaki pracuje ŭ Brusieli, RUSI, Piatras Kacinas źviarnuŭ uvahu na toje, što Złučanyja Štaty, navat zdymajučy niekatoryja sankcyi ź Biełarusi, nie akazvajuć cisku na jeŭrapiejcaŭ, kab tyja pastupali hetak ža.
«Tak što ja dumaju, chutčej za ŭsio, situacyja takaja: kali b treba było stavić hrošy, ja b skazaŭ, što sankcyi ES zastanucca. Ci buduć jany bolš žorstkimi — znoŭ ža, ciažka skazać», — adznačyŭ jon u kamientaryi LRT.
Tym nie mienš Marcišucie čakaje, što ŭ lutym budzie pryniata nie tolki rašeńnie ab padaŭžeńni, ale i ab uzmacnieńni sankcyj: «Asabliva pakul Biełaruś padtrymlivaje vajnu Rasii suprać Ukrainy, pakul akazvaje cisk na susiednija krainy z dapamohaj mihrantaŭ, pakul praciahvajucca parušeńni pavietranaj prastory — jak praz padaŭleńnie GPS-sihnałaŭ, tak i z vykarystańniem pavietranych šaroŭ».
Paśla vosieńskich atak pavietranych šaroŭ z kantrabandaj Litvie ŭdałosia dabicca ŭviadzieńnia dadatkovaha kryteryja hibrydnych pahroz u dačynieńni da Biełarusi, jaki dazvalaŭ by prymianiać sankcyi ES. Adnak zaraz nie čuvać vyraznaj pazicyi Litvy, choć praz kantrabandnyja šary napiaredadni znoŭ była parušana praca Vilniuskaha aeraporta. Bolš za toje, niekatoryja rašeńni Siejma zachraśli, litoŭskija palityki zahavaryli pra mahčymy dyjałoh ź Minskam, a lidar biełaruskaj apazicyi Śviatłana Cichanoŭskaja abviaściła pra svoj adjezd ź Litvy.
«Ni dla kaho nie sakret, što ŭ Litvie nie tolki ŭ zamiežnaj palitycy, ale i ŭ mnohich inšych siektarnych palitykach panuje sapraŭdnaja błytanina. Sapraŭdy, jak kažuć ludzi, pravyja nie viedajuć, što robiać levyja, i naadvarot. I pavinien skazać, što takaja zabłytanaja palityka Litvy — biez vyraznaj linii i jasnych metaŭ u zamiežnaj palitycy ŭ dačynieńni da trecich krain — užo zaŭvažanaja ŭ Brusieli», — zajaviŭ Aŭštravičus.
«Nas pra heta pytajuć ekśpierty, jakija pracujuć nad hetymi pytańniami. Jany vykazvajuć, ja b skazaŭ, navat ździŭleńnie: što zdaryłasia ź Litvoj?»
Sam jeŭraparłamientaryj ličyć, što łancužok schavanych krokaŭ, jakija składajucca ŭ adnu liniju, viadzie da dyjałohu z režymam A. Łukašenki.
Pry hetym jon adznačyŭ, što nie bačyć prablemy z padaŭžeńniem sankcyj ES suprać Biełarusi, pakolki Litva ŭžo vykazałasia za heta, adnak «kali my źmienim pazicyju, heta sapraŭdy budzie aplavucha».
Analityk EPC Marcišucie taksama adznačaje, što Litva pasyłaje ŭ Brusiel nieadnarodny sihnał.
«My byccam by chočam bolš žorstkich sankcyj, ale adnačasova — i pryvieści da dyjałohu. Heta sapraŭdy nie vyhladaje vielmi surjozna», — skazała jana, dadaŭšy, što ŭ ES chapaje krain, jakija chacieli b pačać dyjałoh i zavieršyć izalacyju nie tolki z Łukašenkam, ale i z Uładzimiram Pucinym.
«Ja dumaju, peŭny abmien infarmacyjaj z režymam Łukašenki mahčymy, ale tolki akazvajučy ekanamičny cisk, my možam harantavać, što pahrozy, jakija zychodziać z terytoryi Biełarusi, pamienšacca ci zusim spyniacca. Tamu možna było b pryniać jašče bolš žorstkija miery», — padahulniła Marcišucie.
Ciapier čytajuć
Na Šry-Łancy ŭ 37 hadoŭ pamior biełaruski kinapradziusar Andrej Matałyha3
Kamientary
_____________________
Takoje adčuvańnie, što dla eŭrapiejcaŭ, jak dobrych ruskich, isnuje tolki i vyklučna Kaleśnikava. Praŭdu kažučy - prosta dastali, jany druhich imienaŭ nia viedajuć