Na vajnie suprać Ukrainy zahinuŭ 21‑hadovy chakieist z Homiela

Kanał rasijskaha raźviedvalnaha bataljona «Raźviedosy» paviedamiŭ ab hibieli svajho bajca pa imieni Maćviej z pazyŭnym Pups. Proźvišča paznačana nie było, ale «Fłahštok» vyśvietliŭ, što zahinuły — chakieist z Homiela.

Najmitu byŭ usiaho 21 hod, u jaho zastalisia maci, małodšaja siastra i brat.

Miarkujučy pa infarmacyi kanała raźviedvalnaha bataljona, Maćviej słužyŭ u raźviedhrupie. 4 lutaha jana «vykonvała zadaču pa vyjaŭleńni chovanak i začystcy blindažoŭ sapiernika». U hety čas hrupa była atakavana ŭdarnymi FPV-dronami. 

Śćviardžajecca, što «nalot varožych BPŁA byŭ adbity, ale hrupa paniesła straty paranienymi bajcami». Pry evakuacyi paranienych, jakich supravadžaŭ Maćviej, byŭ ździejśnieny paŭtorny nalot. U bataljonie zajavili, što bajec prykryvaŭ hrupu i źbivaŭ drony z hładkastvolnaj zbroi, ale adzin sa źbitych BpŁA ŭpaŭ pobač i zdetanavaŭ — ranieńni byli niesumiaščalnyja z žyćciom. Maćvieja pradstavili da ŭznaharody «Orden mužnaści» paśmiarotna.

Prykładna ŭ toj ža čas ab «trahičnaj hibieli» svajho hulca paviedamiła chakiejnaja kamanda «Słavianie», jakaja vystupaje ŭ amatarskaj chakiejnaj lizie Homiela. Abstaviny hibieli nie ŭdakładnialisia, ale byli nazvany imia i proźvišča zahinułaha — Maćviej Uharaŭ. U kamandzie jon byŭ bramnikam. Krynica paćvierdziła «Fłahštoku», što zahinuły — mienavita jon.

Pavialičyć

Taksama jon byŭ sudździoj, jaki pracavaŭ na matčach dziciačych kamand u Homieli. U apošni čas jaho zaŭvažali ŭ homielskim Ladovym pałacy ŭ vajskovaj kurtcy z naleplenym šaŭronam.

U kamientarach u telehramie ŭ naviny pra hibiel Maćvieja niechta napisaŭ «Biełaruś pamiataje», pryjšli ŭ kamientary i svajaki zahinułaha. Ich słovy poŭnyja nianaviści da ŭkraincaŭ, jakich nazyvajuć «banderaŭcami» i zaklikajuć «ścierci ź ziamli». Siastra zahinułaha navat vykarystoŭvała niecenzurnyja vyrazy i raskazała, što brata zabili ŭ dzień jaje 17-hodździa, i što jon byŭ jaje adzinaj aporaj, abiacaŭ viarnucca žyvym. Jany zaklikali žorstka pomścić za zahinułaha svajaka.

U toj ža čas babula Halina Tkačova źviarnułasia da kamandziraŭ, kab jany «adkazali za ŭsio»:

«Moładź nienavučanuju adpraŭlać u piekła, viedajučy što jany nie viernucca… Navat kali Afhan byŭ, maładych dzieciukoŭ navučali paŭhoda, jak trymacca i kab vyžyć, a vy nienavučanych i nie abstralanych na niepaźbiežnuju śmierć…»

Na asabistaj staroncy Uharava bačna, što jon zachaplaŭsia strajkbołam i ŭ 2025 hodzie ŭdzielničaŭ u vajenizavanaj «Bitvie haradoŭ» u Babrujsku. U tym ža hodzie apošni raz vykładaŭ fota ŭ chakiejnaj formie. Pavodle źviestak «Kibierpartyzan», z 2023 pa 2024 hady Uharaŭ prachodziŭ słužbu ŭ minskim śpiecnazie — u VČ 3214 (padraździaleńni ŭnutranych vojskaŭ).

• 58
• 1
• 16
• 13
• 0
• 2
• 5
• 2