Kiraŭnik MZS Litvy: Abmierkavańnie palityki ŭ dačynieńni Minska nie aznačaje jaje pierahladu
Ministr zamiežnych spraŭ Kiastucis Budrys zajaviŭ, što dyskusii, jakija ŭźnikajuć adnosna palityki krainy ŭ dačynieńni da Minska, nie aznačajuć jaje pierahladu abo namieru terminova źmianiać kurs, piša LRT.
Pavodle jaho słoŭ, sam fakt abmierkavańnia nie varta traktavać jak sumnieŭ u pravilnaści dziejučaj linii. Budrys adznačyŭ, što takija dyskusii nieabchodnyja dla acenki taho, nakolki pravodzimanaja palityka adpaviadaje pastaŭlenym metam.
«Mnie zdajecca, što, skažam, niapravilna interpretujecca toje, što kali my niešta abmiarkoŭvajem, heta aznačaje, što my stavim pad sumnieŭ biahučuju palityku i tamu miarkujem, što jana budzie nieadkładna pierahledžana. Nie, treba pravieryć, ci sapraŭdy toje, što my robim, pravilna», — zajaviŭ ministr u apublikavanym u sieradu intervju partału Lrytas.
Takim čynam Budrys prakamientavaŭ pačaščanyja zajavy pradstaŭnikoŭ kirujučaj kaalicyi pra mahčymaść adnaŭleńnia dyjałohu ź Minskam.
Staršynia Sacyjał-demakratyčnaj partyi Litvy Mindaŭhas Sinkiavičus raniej dapuskaŭ mahčymaść sustrečy na ŭzroŭni namieśnikaŭ ministraŭ, padkreśliŭšy, što Vilnia pavinna šličvać dziejańni partnioraŭ — Jeŭrapiejskaha sajuza i Złučanych Štataŭ.
Ź inšaha boku, jon ličyć, što viarnucca da abmierkavańnia palityčnaha dyjałohu ź Minskam možna budzie tolki paśla taho, jak ES praciahnie sankcyi ŭ dačynieńni da Biełarusi.
Budrys zajaviŭ, što padtrymlivaje dyskusii pra palityku sankcyj, jakija ŭźnikajuć, i zapeŭniŭ, što ŭ jaho jość «kuča arhumientaŭ» na karyść taho, što heta adzin z samych efiektyŭnych ekanamičnych i palityčnych instrumientaŭ.
«Kali chtości ličyć, što sankcyi nie pracujuć, davajcie abmiarkujem, ci nie niapravilna vybrana śfiera ich prymianieńnia abo, skažam, ich ukaranieńnie nie pracuje, bo i tut jość častka prablem. Abchod sankcyj — heta vialikaja tema, i situacyja z našymi pieravozčykami pakazała, što i tut u nas, vierahodna, jość nie adzin šery momant», — skazaŭ Budrys.
Pavodle słoŭ ministra, dyskusii pra dasiahnutyja vyniki i karyść sankcyj mohuć praciahvacca, ale nielha śćviardžać, što jany nie prynieśli žadanych vynikaŭ, pakul nie vyčarpany ŭsie resursy.
«Da taho času, pakul my nie vyčarpajem usie resursy jak u dačynieńni da Rasii, tak i ŭ dačynieńni da Biełarusi ŭ palitycy sankcyj, imknučysia źmianić ich pavodziny, ja nie zhodny z tym, što ŭ dadzienaj situacyi sankcyi źjaŭlajucca nieefiektyŭnym srodkam, bo my jašče nie pierakanalisia ŭ hetym, — skazaŭ jon. — My pavinny realizavać pakiet sankcyj u poŭnym abjomie. U Amieryki jość reziervy, u Jeŭropy jość reziervy. I my jašče pavinny dziejničać. U hetym pytańni niama nijakich źmienaŭ u palitycy i pazicyi».
Kamientary