Rubia dapuściŭ, što ZŠA zatrymlivajuć pieradaču Ukrainie kuplenych Jeŭropaj rakiet-pierachopnikaŭ

20 kastryčnika, razmaŭlajučy z žurnalistami pierad pajezdkaj u Indyju, Rubia zajaviŭ, što nie było nijakaha śviadomaha palityčnaha rasparadžeńnia, metaj jakoha było b nanieści škodu Ukrainie. Pavodle jaho słoŭ, naŭmysna Ukrainie ni ŭ čym nie admaŭlali.

Paźniej, užo znachodziačysia ŭ Indyi, kiraŭnik Dziarždepartamienta adznačyŭ, što prezident ZŠA Donald Tramp rasčaravany abvinavačvańniami ŭ tym, što jon śviadoma škodzić Ukrainie. U pryvatnaści, heta tyčycca śćviardžeńniaŭ, byccam Tramp rasparadziŭsia spynić pieradaču Kijevu amierykanskich raźviedvalnych źviestak. Rubia padkreśliŭ, što takija abvinavačvańni nie adpaviadajuć rečaisnaści.

Pa słovach Rubia, jahonaja razmova z prezidentam Ukrainy Uładzimiram Zialenskim praciahvałasia 45 chvilin. Zialenski paviedamiŭ, što jany abmiarkoŭvali pastaŭki rakiet dla pierachopu balistyčnych rakiet, rańniaje papiaredžańnie pra rasijskija ataki, a taksama pracu spadarožnikavych servisaŭ Starlink i Starshield kampanii SpaceX, jakimi ŭkrainskija vajskoŭcy karystajucca dla kiravańnia bieśpiłotnikami i suviazi na froncie.

Napiaredadni, 19 kastryčnika, Zialenski padčas anłajn-razmovy z amierykanskimi sienatarami Ryčardam Blumientalem i Tomam Cilisam zajaviŭ, što ZŠA zatrymlivajuć pieradaču Ukrainie rakiet, za jakija ŭžo zapłacili jaje sajuźniki ŭ miežach prahramy PURL. Pavodle ŭkrainskaha prezidenta, adzin z padrychtavanych da adpraŭki pakietaŭ rakiet čakaje podpisu ministra abarony ZŠA Pita Chiehsieta.

Zialenski taksama adznačyŭ, što jeŭrapiejskija partniory čakajuć dazvołu Vašynhtona na pieradaču Ukrainie rakiet-pierachopnikaŭ dla sistem Patriot sa svaich zapasaŭ. Na jaho dumku, heta moža śviedčyć pra palityčnaje rašeńnie zapavolić akazańnie dapamohi Kijevu.

Akramia taho, Zialenski zajaviŭ, što apošnim časam Ukraina trojčy nie atrymlivała ad ZŠA papiaredžańniaŭ pra rasijskija ŭdary balistyčnymi rakietami. Kijeŭ taksama nie atrymaŭ vyčarpalnych tłumačeńniaŭ nakont abmiežavańniaŭ na vykarystańnie Starshield — vajskovaha kamunikacyjnaha servisu na bazie technałohij Starlink. Ukrainski prezident nazvaŭ hetyja dziejańni amierykanskaha boku ciažkimi dla razumieńnia ŭ adnosinach pamiž siabrami.

Pry hetym Ukraina, pavodle Zialenskaha, hatovaja na 30 dzion spynić udary pa rasijskich naftapierapracoŭčych zavodach, jak taho patrabuje Donald Tramp. Adnak Kijeŭ stavić umovaj takoha kroku pieradaču jamu rakiet-pierachopnikaŭ dla sistem Patriot.

• 0
• 0
• 0
• 2
• 0
• 0
• 2
• 0