Naŭsieda: Ja budu siarod tych, chto najbolš žorstka patrabuje padaŭžeńnia sankcyj ES suprać Biełarusi
Napiaredadni lutaŭskaha rašeńnia Jeŭrasajuza pa sankcyjach Hitanas Naŭsieda zajaviŭ pra bieskampramisnuju pazicyju. Na fonie pravakacyj z pavietranymi šarami, jakija paralizavali pracu vilenskaha aeraporta, i čutak pra kułuarnyja damoŭlenaści Vašynhtona ź Minskam, litoŭski prezident zajaviŭ: nijakich sastupak nie budzie.
Prezident Litvy Hitanas Naŭsieda zajaviŭ, što budzie siarod tych, chto najbolš rašuča zapatrabuje praciahnieńnia sankcyj suprać Biełarusi.
«Ja budu siarod tych, chto najbolš žorstka zapatrabuje praciahnieńnia hetych sankcyj», — skazaŭ kiraŭnik dziaržavy ŭ aŭtorak, piša LRT.
Pavodle słoŭ Naŭsiedy, biełaruski režym zastajecca blizkim sajuźnikam Rasii, praciahvaje aryšty palityčnych źniavolenych i ažyćciaŭlaje hibrydnyja ataki z vykarystańniem pavietranych šaroŭ z kantrabandaj.
Apošni incydent z zapuskam takich šaroŭ byŭ zafiksavany na minułym tydni, u aŭtorak Vilniusskamu aeraportu trojčy pryjšłosia prypyniać pracu.
Prezident Litvy raniej adznačaŭ, što paśla hetaha zdareńnia amierykanski bok zaniaŭ žorstkuju pazicyju ŭ dačynieńni da minskaha režymu, pakazaŭšy, što padobnyja dziejańni mohuć pieraškodzić palapšeńniu dvuchbakovych adnosin.
«Reakcyja była sapraŭdy žorstkaj — i pa rytorycy, i pa farmuloŭkach. Pahladzim, jakija vysnovy z hetaha buduć zrobleny. Adnak kali biełaruski režym imkniecca choć by ŭ niejkaj stupieni narmalizavać adnosiny — ja ŭžo nie kažu ź Jeŭrapiejskim sajuzam, ale choć by sa Złučanymi Štatami Amieryki, — jamu, biezumoŭna, varta paźbiahać takich prykmiet eskałacyi», — padkreśliŭ Naŭsieda.
U siaredzinie śniežnia śpiecpasłańnik prezidenta ZŠA Donalda Trampa Džon Koŭł z administracyjaj Alaksandra Łukašenki damovilisia ab vyzvaleńni častki palityčnych źniavolenych i ab admienie sankcyj na biełaruskija kalijnyja ŭhnajeńni. Tady palityčnyja naziralniki pačali razvažać ab mahčymaści cisku z boku Vašynhtona na Litvu z metaj adnaŭleńnia tranzitu hetych uhnajeńniaŭ praz Kłajpiedski port.
Pavodle słoŭ Naŭsiedy, nijakich abmierkavańniaŭ z ZŠA ab mahčymym źmiakčeńni sankcyj nie viadziecca, i Vašynhton nikoli nie prasiŭ ab hetym ni ź jakoj padstavaj. Prezident taksama zaklikaŭ palitykaŭ mienš razvažać pra hipatetyčnyja scenaryi dyjałohu ź Minskam.
«Što tyčycca zajavy spadara [staršyni Kamiteta pa zamiežnych spravach Siejma Remihijusa] Matuzasa, heta, vierahodna, było razvažańnie ŭ duchu «što było b, kali b». Siońnia razvažać pra toje, što było b, kali b, prosta nie nadta adkazna, pakolki ŭ nas jość taja situacyja, jakaja jość. Jana realnaja, nie hipatetyčnaja i dla nas nieprymalnaja», — skazaŭ jon.
Tak litoŭski prezident prakamientavaŭ vykazvańnie Matuzasa ab tym, što ŭ Vilniusie abmiarkoŭvajecca mahčymy źmiest pieramoŭ ź Biełaruśsiu i varyjanty ich praviadzieńnia na niejtralnaj terytoryi.
Minsk ź minułaha hoda dabivajecca sustrečy na ŭzroŭni ministraŭ ci vice-ministraŭ zamiežnych spraŭ, u toj čas jak z-za pavietranych šaroŭ z kantrabandaj pracu Vilniusskaha aeraporta nieadnarazova prychodziłasia spyniać, a Litva ŭ adkaz na niekatory čas zakryvała miažu ź Biełaruśsiu.
Ministr zamiežnych spraŭ Litvy Kiastucis Budrys raniej zajaŭlaŭ, što, akazvajučy cisk na Litvu, minski režym imkniecca da mižnarodnaj lehitymacyi, i padkreślivaŭ, što takija pieramovy nie razhladajucca.
Ciapier čytajuć
Taksistka z Tadžykistana naśmierć źbiła biełarusku ŭ Polščy — i spakojna pakinuła krainu19
Kamientary