U Polščy pačaŭsia sud nad bandaj narkahandlaroŭ, jakich rasijskija śpiecsłužby najmali dla dyviersij. Siarod abvinavačanych troje biełarusaŭ
U Hdańsku pačaŭsia sud pa spravie hrupy Alhierda Ł., viadomaha pa mianušcy Oła. Členy jaho hrupy padazrajucca ŭ handli zbrojaj i narkotykami, padpałach, dyviersijach i źbićciach. Ad zvyčajnaha kryminalnaha pracesu hety adroźnivajecca tym, što častka złačynstvaŭ ździajśniałasia pa zamovie zamiežnych śpiecsłužbaŭ, jakija šukali vykanaŭcaŭ u hrupach u Telegram.
Na łavie padsudnych vosiem čałaviek, u tym liku troje hramadzian Biełarusi, piša Most.
Sud pa spravie złačynnaj hrupy pavinien byŭ pačacca jašče ŭ śniežni 2025 hoda, ale tady advakat adnaho ź biełarusaŭ, Ściapana K., chadajničaŭ ab razmovie sa svaim klijentam, pakolki da taho času ŭ jaho nie było mahčymaści sustrecca ź im. Ściapan K. — ziać byłoha konsuła Biełarusi ŭ Hdańsku. Akramia jaho, abvinavačańni vystaŭlenyja Andreju B. i Jarasłavu S. Apošni supracoŭničaŭ sa śledstvam, tamu da suda znachodziŭsia na voli.
Zvyčajna hrupa ździajśniała vyklučna kryminalnyja złačynstvy. Naprykład, padpał restarana, što było elemientam razborak kankurentaŭ. Taksama hrupa zajmałasia handlem zbrojaj pad vyhladam dapamohi Ukrainie. Udzielniki bandy sapraŭdy byli źviazany z dobraachvotnickimi abjadnańniami, jakija vajujuć na baku Ukrainy, ale prakuratura ličyć, što heta było tolki prykryćciom.
Pa infarmacyi haziety Wyborcza, častka zbroi šła z Ukrainy ŭ Polšču, a častka — dalej u Čechiju.
Asablivuju ŭvahu da spravy pryciahvaje suviaź niekatorych epizodaŭ z zamiežnymi śpiecsłužbami, jakija zakazvali dyviersii — padpały abjektaŭ. Adzin z asnoŭnych padazravanych — Kamil K. pa mianušcy Karek — na dopytach śćviardžaŭ, što nie viedaŭ ab tym, što zakazy zychodzili ad ich. Śledčyja hetamu nie vierać.
Wyborcza, spasyłajučysia na abvinavačańnie, piša, što Karek i biełarusy byli pryciahnuty da dyviersijnych akcyj praz akaŭnt Lucky Strike ŭ miesiendžary Telegram. Hety akaŭnt šukaŭ «partyzan», jakija za hrošy buduć padpalvać roznyja abjekty pa ŭsioj Jeŭropie. Polskija śpiecsłužby ličać, što akaŭnt viaduć ahienty HRU.
U čym abvinavačvajuć biełarusaŭ
U spravie šmat epizodaŭ, i biełarusy prachodziać pa šerahu ź ich. Pa viersii prakuratury, jany datyčnyja da padpału restarana ŭ Hdyni ŭ 2023 hodzie. Uron tady skłaŭ amal 3 młn złotych, i śledčyja pryjšli da mierkavańnia, što padpał zamovili kankurenty abjekta.
Ściapana K., Kamila K., Andreja B. i Jarasłava S. abvinavačvajuć u sprobie padpału składa ŭ Hdańsku ŭ sakaviku 2024 hoda. Akramia taho, Ściapan K. i Andrej B. abvinavačvajucca ŭ padpale składa paddonaŭ u Markach pad Varšavaj u noč z 8 na 9 krasavika 2024 hoda. Usie padpały ździajśnialisia z vykarystańniem kaktejlaŭ Mołatava. Hetyja dziejańni źviazvajuć z zamovaj zamiežnych śpiecsłužbaŭ.
Asobna viadziecca vytvorčaść suprać Ściapana K., jakoha padazrajuć u padpale budaŭničaha hipiermarkieta OBI ŭ Varšavie ŭ krasaviku 2024 hoda pa zamovie rasijskaj raźviedki.
Taksama suprać Ściapana K. vysunuty dadatkovyja abvinavačvańni: za schileńnie da źbićcia inšaj asoby i sprobu pryčynieńnia ciažkaj škody zdaroŭju ŭ abmien na majomasnuju vyhadu.
Častka epizodaŭ źviazana z handlem zbrojaj i narkotykami.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary