Za tydzień vajny ź Iranam krainy Blizkaha Uschodu vykarystali bolš rakiet Patriot, čym atrymała Ukraina za čatyry hady vajny
Na pačatku poŭnamaštabnaha ŭvarvańnia Kijeŭ nieadnarazova źviartaŭsia da zachodnich sajuźnikaŭ z prośbami ab pastaŭkach sistem supraćpavietranaj abarony Patriot, adnak atrymaŭ ich u značna mienšaj kolkaści, čym patrabavała situacyja na froncie. U vyniku Ukraina była vymušanaja raspracavać ułasnyja, značna tańniejšyja sposaby baraćby ź iranskimi dronami, jakija Rasija masiravana vykarystoŭvaje suprać ukrainskich haradoŭ. Siońnia hety ŭnikalny dośvied Kijeŭ prapanuje Vašynhtonu i jaho partnioram na Blizkim Uschodzie. Z padrabiaznaściami znajomić The New York Times.
Vajna ZŠA i Izraila ŭ Iranie moža adciahnuć uvahu suśvietnaj supolnaści ad ukrainskaha pytańnia. Tym nie mienš dla Kijeva hety kanflikt adkryŭ mahčymaść prademanstravać svaju ekśpiertnaść i vykarystać pieradavyja technałohii na novym froncie.
Ukrainski bok aktyŭna prapanuje dapamohu amierykanskim siłam i ich blizkaŭschodnim sajuźnikam u abaronie ad iranskich udarnych bieśpiłotnikaŭ — tych samych madelaŭ, jakija rasijskija vojski hadami zapuskajuć pa ŭkrainskaj terytoryi.
Jak adznačyŭ u intervju NYT Uładzimir Zialenski, ź pieršych dzion eskałacyi na Blizkim Uschodzie jon i jaho kamanda pačali atrymlivać zvanki ad lidaraŭ Bachrejna, AAE, Iardanii, Kuviejta, Katara i Saudaŭskaj Aravii z prośbami ab kansultacyjach i dapamozie.
Užo 5 sakavika Złučanyja Štaty aficyjna źviarnulisia da Ukrainy z zapytam ab sadziejničańni ŭ abaronie amierykanskich vajskovych baz u Iardanii. Pavodle słoŭ ukrainskaha lidara, śpiecyjalizavanaja kamanda z dronami-pierachopnikami ŭłasnaj vytvorčaści vyjechała na miesca pryznačeńnia ŭžo na nastupny dzień.
Žurnalisty vydańnia padkreślivajuć, što hetaje supracoŭnictva razhortvajecca na fonie davoli składanych adnosin pamiž Kijevam i Vašynhtonam. Charakterna, što ŭ toj samy dzień, kali pastupiła prośba ab dapamozie, Donald Tramp znoŭ publična nazvaŭ kiraŭnika ŭkrainskaj dziaržavy bolšaj pieraškodaj dla mirnaha pahadnieńnia, čym Uładzimira Pucina.
U hetych umovach ukrainskija ŭłady raźličvajuć, što padtrymka amierykanskich inicyjatyŭ na Blizkim Uschodzie ŭmacuje davier z boku Vašynhtona i palepšyć pazicyi Kijeva ŭ mirnych pieramovach, jakija prachodziać pry pasiarednictvie ZŠA.
Akramia taho, supracoŭničajučy z ZŠA na Blizkim Uschodzie, Kijeŭ taksama imkniecca padkreślić roźnicu pamiž svajoj pazicyjaj i pazicyjaj Maskvy. U toj čas jak Kijeŭ abaraniaje sajuźnikaŭ, Maskva, pavodle źviestak amierykanskaj raźviedki, pieradavała Tehieranu dadzienyja ab dysłakacyi amierykanskich karabloŭ i vajskoŭcaŭ.
U razmovie z karespandentam NYT prezident Ukrainy padkreśliŭ, što, niahledziačy na ščyraje žadańnie dapamahčy blizkaŭschodnim krainam, jon vymušany bałansavać pamiž vonkavymi zapytami i ŭnutranymi patrebami abarony, bo vajna doma idzie ŭžo piaty hod. Isnuje pieraściaroha, što kanflikt u Iranie moža pierakryć pastaŭki zbroi, nieabchodnaj samim ukraincam.
Mienavita tamu Kijeŭ prapanuje krainam rehijona farmat bartaru: u abmien na ŭkrainskija technałohii supraćdronnaj abarony i BPŁA-pierachopniki Ukraina choča atrymać mahutnyja sistemy SPA, zdolnyja źbivać rasijskuju balistyku.
Da taho ž, Kijeŭ raźličvaje na dypłamatyčny ŭpłyŭ arabskich krain, mnohija ź jakich majuć ščylnyja suviazi z Maskvoj.
«Mahčyma, jany zmohuć pahavaryć z ruskimi, kab tyja zrabili paŭzu. U takim vypadku my, biezumoŭna, dapamožam Blizkamu Uschodu z abaronaj», — patłumačyŭ łohiku ŭkrainski bok.
Na siońnia Ukraina źjaŭlajecca adnoj z samych kampietentnych krain u śviecie pa źniščeńni iranskich «šachiedaŭ», na asnovie jakich Rasija ŭžo stvaryła ŭłasnyja viersii.
Spačatku ŭkrainskija siły sprabavali źbivać takija bieśpiłotniki darahimi rakietami, u tym liku Patriot. Ale chutka vyśvietliłasia, što heta ekanamična nievyhodna: vytvorčaść adnaho «šachieda» kaštuje da 50 tysiač dalaraŭ, u toj čas jak rakieta-pierachopnik Patriot — bolš za 3 miljony dalaraŭ.
Kab nie marnavać darahija zachodnija resursy, Ukraina navučyłasia efiektyŭna vykarystoŭvać ciažkija kulamioty, tannyja rakiety dla F-16, srodki radyjoelektronnaj baraćby i ŭłasnyja drony-pierachopniki.
Pavodle dadzienych ukrainskich VPS, ciapier atrymlivajecca źbivać bolšaść takich dronaŭ. Naprykład, u lutym Rasija zapuściła kala 5000 bieśpiłotnikaŭ i imitataraŭ pa ŭkrainskich haradach, i kala 87% ź ich byli źniščanyja.
Jak zaŭvažaje vydańnie, padčas intervju Zialenski paviedamiŭ, što akramia Iardanii jašče adna hrupa ŭkrainskich śpiecyjalistaŭ moža adpravicca ŭ rehijon, kab dapamahčy krainam acanić, jak možna abaraniacca ad iranskich dronaŭ biez masavaha vykarystańnia darahich rakiet Patriot.
Jak adznačaje NYT, hetyja rakiety zastajucca vielmi deficytnymi. U 2025 hodzie suśvietnaja vytvorčaść novych Patriot skłała ŭsiaho 620 adzinak — i heta ličycca rekordam.
Adnak tolki za pieršy tydzień aktyŭnych bajoŭ na Blizkim Uschodzie było vydatkavana bolš za 800 takich rakiet. Pavodle jeŭrakamisara pa abaronie Andryjusa Kubilusa i prezidenta Ukrainy, hetaja kolkaść spatrebiłasia dla supraćdziejańnia atacy bolš jak 2000 iranskich bieśpiłotnikaŭ i bolš jak 500 balistyčnych rakiet.
Vynikovaja ličba, jakuju pryvodzić NYT, najlepš ilustruje dyspraporcyju: za ŭsie hady poŭnamaštabnaj vajny Ukraina, pa słovach daradcy prezidenta Ukrainy Dźmitryja Litvina, atrymała kala 600 sučasnych rakiet Patriot.
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku2323
Kamientary
Ci nie zdajecca heta niekarektnym paraŭnańniem?