U minskich školnych stałovych buduć katlety ŭ formie serca

Novyja stravy źjaviacca ŭ mieniu staličnych škoł paśla viasnovych kanikułaŭ. Pra heta paviedamiła Minsk-Navinam dyrektarka Kambinata školnaha charčavańnia Ludmiła Krupskaja. 

KŠP raspracoŭvaje dvuchtydniovyja racyjony pavodle siezonaŭ. Jakraz ciapier — viasnovy. I z pačatku čaćviortaj vučebnaj čverci dzieciam prapanujuć abnoŭlenaje mieniu.

Tak, ź jaho vyklučać syrniki i pielmieni. Paśla praviadzieńnia ankietavańnia vučniaŭ va ŭsich škołach stała zrazumieła, što hetyja stravy choć i padabajucca dzieciam, ale ŭžo zdajucca davoli zvykłymi i budzionnymi.

— Tamu prapanujem dzieciam alternatyvu — nahietsy z sousam «Kazka», — raspaviała Ł. Krupskaja.

Jašče adna navinka — katleta «Banzaj». Jana taksama składajecca z kurynaha file z dadańniem naturalnych śpiecyj, naprykład časnaku. Padavacca strava budzie ŭ formie serca.

— Hetyja pazicyi ŭvojduć u mieniu školnikaŭ 1— 11‑ch kłasaŭ, — udakładniaje Ł. Krupskaja. — Racyjon vučniaŭ siaredniaj i staršaj škoły taksama budzie dapoŭnieny kurynymi kaŭbaskami ŭ naturalnaj abałoncy.

Pavodle słoŭ surazmoŭcy, KŠP štodnia adsočvaje kolkaść charčovych adkidaŭ, što zastajucca paśla pryjomaŭ ježy. Heta dazvalaje praanalizavać, jakija stravy padabajucca dzieciam, a ad jakich varta admovicca. Biezumoŭna, «źjadalnaść» porcyj zaležyć i ad času pryjomu ježy, i ad majsterstva kucharaŭ.

— Ale ahulnyja tendencyi jość, i my ich adznačajem. Pa-pieršaje, dzieci zasumavali pa miasnych stravach.

Tamu ŭ mieniu viartajem bitočki kurynyja z syram.

Pa-druhoje, źviarnuli ŭvahu, što mienšaj papularnaściu ŭ dziaciej karystajucca harniry. U mieniu ŭklučany bulbianoje piure, zapiečanyja bulbianyja dolki, kašy — hreckaja i rysavaja. Taksama byŭ bułhur, jaki dzieciam nie vielmi spadabaŭsia. U nastupnym dvuchtydniovym racyjonie my zamienim jaho na inšuju krupu, — adznačyła Ł. Krupskaja.

Dobraja navina: u mieniu zastanucca bliny, pracent adchodaŭ pa jakich minimalny i nie pieravyšaje 10 %.

— Zaraz vučni atrymlivajuć hetuju stravu z roznymi načynkami: tvarahom, višniaj, a z novaj čverci buduć jašče i ź jabłykami i karycaj. U pierśpiektyvie prapracoŭvajecca pytańnie ŭviadzieńnia blinoŭ ź viandlinaj i syram, — udakładniła dyrektar KŠP.

U topie lubimych straŭ u dziaciej — tartylja z dvuma načynkami: syram i jajkam, syram i kaŭbasnym vyrabam. I ŭ novym mieniu jana zastaniecca.

— Praviali siarod školnikaŭ dehustacyju nuta. Jon dzieciam spadabaŭsia, i my ŭklučyli jaho ŭ mieniu viasnovych azdaraŭlenčych łahieraŭ. Heta vielmi karysny pradukt z vysokim utrymańniem białku. Taksama jość zaduma ŭ budučyni prapanavać dzieciam draniki, — padzialiłasia Ł. Krupskaja.

• 0
• 0
• 0
• 0
• 0
• 0
• 0
• 0