«Narmalizuje savieckuju vajennuju estetyku»: brytanskija palityki zaklikajuć prybrać «Mašu i Miadźviedzia» sa stryminhavych servisaŭ

Piaćdziasiat parłamientaryjaŭ ličać, što sieryjał źjaŭlajecca prykładam «miakkaj siły», z dapamohaj jakoj Rasija sprabuje ŭpłyvać na zachodniuju aŭdytoryju, piša Bi-bi-si.

Hłabalnaja płatforma Netflix pakazvaje rasijski multsieryjał užo 11 hadoŭ. Sioleta kampanija nabyła pravy na vośmy i dziaviaty siezony historyj pra maleńkuju dziaŭčynku-harezu i cyrkavoha miadźviedzia-piensijaniera. Akramia ich u sieryjale jość miadźviedzica, u jakuju biez pamiaci zakachany Miadźviedź, roznyja lasnyja žyvioły, stryječnaja siastra Mašy z Maskvy i navat inšapłanietniki.

U liście da ministra kultury Vialikabrytanii Lizy Nendzi 50 deputataŭ z šaści brytanskich partyj — lejbarystaŭ, kansiervataraŭ, libierał-demakrataŭ, «zialonych», pradstaŭnikoŭ Šatłandskaj nacyjanalnaj partyi i valijskaj Plaid Cymru — śćviardžajuć, što multsieryjał źjaŭlajecca prapahandaj, pryčym «nie nadta tonkaj».

Praŭda, jak i mnohija krytyki raniej, dokazam hetaha parłamientaryi ličać tolki adzin sa starych epizodaŭ sieryjała — «Miaža na zamku» (u Rasii jon vyjšaŭ jašče vosieńniu 2010 hoda, zadoŭha da pačatku rasijskaj ahresii suprać Ukrainy, a na Netflix źjaviŭsia ŭ 2015 hodzie).

U hetaj sieryi Maša, achoŭvajučy aharod Miadźviedzia, spačatku nadziavaje furažku ź sinim akołyšam i čyrvonaj zorkaj (padobnyja nasili supracoŭniki NKUS), a paśla — šlem tankista.

Spačatku papularny multfilm atrymlivaŭ pieravažna stanoŭčyja vodhuki hledačoŭ. Adnak pieršyja zajavy pra toje, što kazačnyja historyi mohuć być instrumientam rasijskaj prapahandy, źjavilisia jašče da poŭnamaštabnaha ŭvarvańnia Rasii va Ukrainu ŭ 2022 hodzie. Takija śćviardžeńni hučali ŭ Finlandyi, Estonii i Litvie.

Paśla pačatku poŭnamaštabnaj vajny hałasy krytykaŭ stali jašče bolš hučnymi. Niadaŭna na rašeńnie Netflix nabyć pravy na novyja sieryi multfilma adreahavaŭ ministr zamiežnych spraŭ Estonii Marhus Cachkna.

«Rasija viadzie vajnu nie tolki rakietami, ale i naratyvami, — napisaŭ jon u sacyjalnych sietkach. — «Maša i Miadźviedź» — heta častka kramloŭskaj miakkaj siły, jakaja ŭkaraniaje prakramloŭskija i militarysckija vobrazy ŭ zabaŭlalny dziciačy kantent, narmalizujučy rasijskuju ahresiju i impierskija ambicyi. Śviet nie pryniaŭ by dziciačuju pradukcyju, u jakoj u pazityŭnym kantekście demanstravalisia b nacysckija simvały. Savieckaja simvolika zasłuhoŭvaje takoj ža adnaznačnaj maralnaj acenki».

Cachkna nahadaŭ, što dla mnohich narodaŭ, u tym liku dla estoncaŭ, simvolika NKVD asacyjujecca z akupacyjaj, masavymi zabojstvami i departacyjami. Ilustracyja z furažkaj vykarystoŭvałasia ŭ aficyjnym akaŭncie multsieryjała ŭ Twitter (ciapier X) u krasaviku 2015 hoda z podpisam: «Chej, ciapier ja ŭ armii». Brytanskija parłamientaryi nahadvajuć, što NKVD byŭ adkazny za masavyja departacyi, rasstreły i pieraśled dziasiatkaŭ miljonaŭ žycharoŭ SSSR. Na ich dumku, takaja rekłama «aktyŭna narmalizuje savieckuju vajennuju estetyku dla hłabalnaj dziciačaj aŭdytoryi».

U Vialikabrytanii sieryjał, akramia Netflix, tranśluje taksama stryminhavy servis ITVX, jaki naležyć brytanskaj teleradyjokampanii ITV.

«Da brytanskich dziaciej sieryjał traplaje praz najbujniejšuju hłabalnuju płatformu i viadomaha brytanskaha viaščalnika. My ličym heta niedapuščalnym, — adznačajuć deputaty. — Brytanskija baćki majuć prava raźličvać na toje, što kantent, jaki ich dzieci atrymlivajuć praź licenzavanyja płatformy, byŭ naležnym čynam pravierany, asabliva kali našy sajuźniki ŭžo vykazvali abhruntavanyja padazreńni adnosna dziaržaŭnaj prapahandy».

Studyja Animaccord, jakaja vyrablaje multsieryjał, adchilaje abvinavačańni ŭ prapahandzie. U 2025 hodzie kampanija kančatkova pakinuła Rasiju i padkreślivaje, što pry stvareńni sieryjała nie vykarystoŭvajucca rasijskija dziaržaŭnyja srodki.

Brytanskaja hazieta The Guardian cytuje halivudskuju PR-kansultantku Miełani Banvičyna, jakaja pradstaŭlaje Animaccord:

«Moj klijent kateharyčna adchilaje łžyvyja i paklopnickija śćviardžeńni pra toje, što sieryjał «Maša i Miadźviedź» niejkim čynam źviazany z prapahandaj».

Adnak deputaty, jakija padpisali list, śćviardžajuć, što, niahledziačy na kiprskuju rehistracyju, studyja dahetul płacić padatki ŭ Rasii.

«Jaje dachody, u tym liku atrymanyja ad mižnarodnaha stryminhu, u vyhladzie padatkaŭ pastupajuć na finansavańnie rasijskaj dziaržavy, — havorycca ŭ zvarocie da ministra kultury. — Maštab hetaha finansavańnia značny: pavodle acenak analitykaŭ, tolki rekłamnyja dachody ad prahladaŭ u Jeŭropie składajuć miljony dalaraŭ štohod. […] Brytanskija dzieci, jakija hladziać hetyja prahramy na Netflix abo ITVX, źjaŭlajucca častkaj aŭdytoryi, što, mahčyma, prynosić prybytak studyi, jakaja faktyčna dapamahaje finansavać rasijskuju vajennuju mašynu».

• 7
• 0
• 0
• 0
• 0
• 0
• 1
• 0