Pracy mastaka z Navapołacka nie ŭziali na vystavu Art Minsk. Jon pryjšoŭ na adkryćcio ŭ kaściumie kłoŭna i staŭ hałoŭnaj zorkaj
Mastak Hienadź Duk zładziŭ pierformans na adkryćci vystavy ŭ stalicy. Naviedvalnikam strašna spadabałasia.
Hienadź Duk — heta małady mastak z Navapołacka, jaki ciapier žyvie i pracuje ŭ Minsku. Raniej ekśpierymientavaŭ z muzykaj i animacyjaj, pisaŭ nievialikija apaviadańni — šukaŭ svoj styl. Pa adukacyi jon kulturołah — skončyŭ Biełaruski dziaržaŭny ŭniviersitet kultury i mastactvaŭ horada Minska.
Hienadź paśpiachova ŭdzielničaŭ u roznych vystavach. Naprykład, u 2024 hodzie jon atrymaŭ pieršaje miesca na «Vosieńskim sałonie» ŭ naminacyi «Ličbavaje mastactva i kałaž».
Na Art Minsk Hienadź taksama raniej vystaŭlaŭsia — try razy, dva ź jakich byŭ siarod pieramožcaŭ. Ale sioleta pracy mastaka admovilisia prymać.
Sam aŭtar u sacsietkach vykazvaje zdahadku, što źviazana heta ŭsio ź letašnim kanfliktam: «Paśla «Vosieńskaha sałona 2025» u mianie skłalisia naciahnutyja adnosiny z arhanizatarami (maje pracy paškodzili padčas mantažu). Na hety raz mianie prosta praihnaravali i vyrašyli, vidać, nie źviazvacca. Padazraju, što asnoŭny kryteryj adboru — heta asabistaja simpatyja da samoha mastaka i jaho zdolnaść da liślivaści».
Adna z prac, jakaja nie trapiła na Art Minsk, — heta «Samowar»: karcina mužčynskaha cieła z samavaram zamiest hałavy, z kranika jakoha ciače kroŭ. Dapaŭniaje pracu vierš:
«I hdie-to sołncie, niebo — hołuboj,
A v samowar-je tichij boj.
Skaži mnie, boy, što tam za boj?
— Ty nie utianieš za soboj?
Hdie nietu sołnca, nieba —
hołuboj…»
Mirycca z takim rašeńniem Hienadź nie staŭ. Jon zładziŭ pierformans na adkryćci Art Minsk — pryjšoŭ, adziety jak kłoŭn.
Na śpinu Hienadź prymacavaŭ svaju inšuju pracu — na karcinie sumny kłoŭn, padobny da Maračka z «Vioski durakoŭ», niasie kryž. Jak tłumačyć aŭtar, u jaje asnovie razvažańni nakont taho, što mastactva — heta praklon i ciažkaja noša, asabliva kali mastak znachodzicca nie ŭ tym miescy i nie ŭ toj čas.
Na šyju mastak paviesiŭ vysušanuju rybu z nadpisam «Ježa dla rozumu». Na advarotnym baku napisana: «I padumać hetaja ryba nie mahła, što budzie ŭžytaja takim pierakručanym čynam: stanie niečym mienšym, čym ryba, i niečym bolšym, čym śmierć, — stanie art-abjektam na paciechu kryŭlak. Prabač, što nie źjeŭ».
U ruki Hienadź uziaŭ viadro, dzie byli minijaciurnyja paštoŭki ź jaho pracami — ich jon razdavaŭ ludziam.
I voś u takim epatažnym vyhladzie pajšoŭ hulać pa vystavie. Miarkujučy pa videa, jakimi ludzi dzielacca ŭ sacyjalnych sietkach, pakryŭdžany mastak staŭ hałoŭnym ekspanatam. Vakoł jaho zaŭsiody było šmat ludziej, jakija chacieli sfatahrafavacca razam.
Adna z naviedvalnic padzialiłasia ŭ Threads: kali b kožny, chto chacieŭ sfatahrafavacca z Hienadziem, kinuŭ hrošy ŭ jaho viadro, dyk mastak by atrymaŭ bolš, čym kaštujuć dźvie jaho zabrakavanyja pracy.
Nahadajem: u 2022 hodzie ŭłady ŭpieršyniu začyścili Art Minsk ad mastakoŭ, jakich paśla pratestaŭ 2020 hoda paličyli «nienadziejnymi». Tady amal u apošni momant pierad uračystym adkryćciom vystavy z Pałaca mastactvaŭ u Minsku terminova vynosili raboty mastakoŭ — pad katok cenzury trapili niekalki dziasiatkaŭ tvorcaŭ.
Na vystavie ŭ 2024 hodzie navat «Mis Biełaruś» Eleanora Kačałoŭskaja adznačyła, što joj było sumna praz pusteču i nievialikuju kolkaść cikavych prac.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2828
Kamientary