U Minsku na bierazie Cnianki słužbovaja aŭčarka MNS pakusała niekalkich sabak. Ratavalniki hatovyja im dapamahać
4 maja ŭ redakcyju vydańnia «Anłajnier» źviarnułasia čytačka. Jana raskazała, što ŭ niadzielu padčas prahułki pa «Łejksajd parku» na jaje hadavanca napaŭ sabaka, «jaki ŭciok z centra MNS». Pavodle słoŭ dziaŭčyny, «ałabaj ukusiŭ minimum troch sabak». Jaje hadavanka ź pierałomam 4 rebraŭ i prakusam lohkich apynułasia ŭ klinicy.
Dziaŭčyna pa imieni Nastaśsia śćviardžała, što sabaka byŭ na samavyhule, biez namordnika. Pavodle jaje danych, padobny vypadak užo adbyvaŭsia zimoj.
Pa kamientaryj nakont situacyi žurnalisty źviarnulisia ŭ MNS. Ich zapeŭnili, što situacyja na kantroli, a nieŭzabavie źniali i aficyjny videaadkaz.
«Tak, sapraŭdy, učora adbyŭsia incydent na bierazie Cnianskaha vadaschovišča z udziełam našaha vartavoha sabaki, u vyniku jakoha paciarpieli inšyja vypadkovyja sabaki i, jak nastupstva, ich haspadary.
Biezumoŭna, my razumiejem chvalavańnie haspadaroŭ. Litaralna adrazu paśla zdareńnia my šukali kantakty ŭładalnikaŭ paciarpiełych sabak, prapanoŭvali, naturalna, finansavuju dapamohu, dapamohu ŭ pošuku vieterynarnych klinik. Kantakty ŭstalavanyja, my znachodzimsia ŭ pramym uzajemadziejańni z paciarpiełymi.
Siońnia adnamu z sabak — maltyjskaj bałoncy — patrabavałasia pieralivańnie kryvi. U roli donara vystupiŭ naš vartavy sabaka, jon ža, na žal, vinavaty ŭ situacyi. Hety sabaka ŭžo na praciahu piaci hadoŭ achoŭvaje naša režymnaje padraździaleńnie.
Biezumoŭna, my prymiem usie miery, kab takoje nie paŭtaryłasia. Jašče raz kažu pra toje, što my biarom na siabie ŭsie spadarožnyja vydatki na lačeńnie, na dalejšuju reabilitacyju sabak. Lubuju dapamohu, jakaja spatrebicca, my hatovyja akazać pa pieršym zvanku. I sapraŭdy ščyra, sam jak sabačnik, prynošu svaje prabačeńni», — adznačyŭ načalnik centra vadałazna-ratavalnaj słužby Aleh Ściapuk.
Darečy, paroda vartavoha sabaki — siarednieazijackaja aŭčarka. Što tyčycca adnoj z paciarpiełych — Moli, — to na hety momant jana praciahvaje prachodzić lačeńnie.
Pavodle słoŭ jaje ŭładalnicy, «prahnoz vielmi sumny». U sabaki niaprosty los: jaje vyratavali ad niesumlennych zavodčykaŭ u vielmi drennym stanie. Padčas sterylizacyi ŭ Moli spyniłasia serca, ale jaje ŭdałosia vyratavać.
Nastaśsia raskazvaje pra stan sabaki ŭ sacsietkach, za jaje samaadčuvańniem sočać tysiačy čałaviek. Mierkavana, Moli spatrebicca apieracyja ŭ najbližejšyja dni.
U Barysavie nieviadomy raskidvaje «marmieładki» z rybałoŭnymi kručkami — jość zahinułyja žyvioły
Navukoŭcy śćviardžajuć, što my niapravilna hulajem sa svaimi sabakami. A jak pravilna?
U Homieli sabaka pamior u pakutach, niečym atruciŭšysia na dvary. I heta ŭžo nie pieršy padobny vypadak
Na miažy Biełarusi ź Litvoj słužyć valfchund
Ciapier čytajuć
Kolki biełarusaŭ atrymali polskaje hramadzianstva za apošni čas. Ličby ŭražvajuć39
Kamientary