Historyja 12‑hadovaj Viery ŭ minskaj infiekcyjnaj balnicy nastolki ŭraziła biełarusaŭ, što ciapier čarha z achvotnych dapamahčy
Dopis minčanki, jakaja raspaviała pra adzinokaje dzicia ŭ balnicy, nabraŭ amal paŭmiljona prahladaŭ. Pryvieźli joj šmat, ale ciapier ludzi chvalujucca: ci dazvolać dziaŭčyncy zabrać padarunki ŭ dziciačy dom.
Dzicia Eły Kazak trapiła ŭ infiekcyjnuju balnicu ŭ Minsku. Maci, jakaja lažyć razam z dačkoj, uraziła dziaŭčynka z susiedniaj pałaty — maleńkuju pacyjentku pryvieźli ź dziciačaha doma.
«Dobraja, pryjemnaja, zvać Viera. Moža ŭ kaho jość stary niepatrebny telefon. My pakul svoj dali pakarystacca. Božački, jak akazałasia mała treba dla ščaścia. Z zabaŭ u jaje tolki razmaloŭki dy fłamastary. Kali ŭ kaho jość i nie škada, možacie pieradać joj, ja dumaju, dzicia budzie ščaślivaje», — napisała Eła ŭ Threads.
Potym jana dadała, što parazmaŭlała ź dziaŭčynkaj i daviedałasia, što ŭ toj jość tata — i Viera vielmi spadziajecca, što toj sioleta zabiare jaje damoŭ.
Dopis zavirusiŭsia — mienš čym za sutki jaho pahladzieła kala paŭmiljona čałaviek. Šmat chto pytaŭsia, čym i jak možna dapamahčy — niechta prapanoŭvaŭ pryhatavać i prynieści smačnaj damašniaj ježy, niechta cikaviŭsia patrebami ŭ adzieńni i abutku, niechta byŭ hatovy nabyć štości dla tvorčaści.
Zredku hučali i hałasy piesimistaŭ. Maŭlaŭ, šmat padarunkaŭ tolki škodzić u takim vypadku, bo farmirujuć staŭleńnie da žyćcia ŭ styli: «mnie ŭsie pavinny dapamahać». Ale skieptyki ŭsio ž u mienšaści.
U kamientary pryjšli i znakamityja błohiery. Kakabaj, naprykład, paabiacaŭ pryvieźci płanšet dla hulniaŭ.
U chutkim časie źjavilisia kamientary ludziej, jakija ŭžo paśpieli źjeździć u infiekcyjonku i pieradać rečy 12‑hadovaj Viery. Telefon u dziaŭčynki ŭžo jość, a voś sałodkaje prosiać nie prynosić, bo jano moža vyklikać alerhiju.
U kamientarach ludzi raspaviadali, što taksama traplali ŭ takija situacyi: «Pakłali dziaŭčynku hadoŭ 4-5, baćki pjuć, staić pytańnie ab pazbaŭleńni baćkoŭskich pravoŭ. Dzicia trapiła ŭ balnicu ŭ padranych kałhotkach i brudnym adzieńni. Praz tydzień u jaje była hara cacak, razmalovak, adzieńnia — miadsiostry śmiajalisia, što treba budzie na vypisku hruzavik zamaŭlać».
Na žal, nie zaŭsiody kaniec historyi byŭ ščaślivy: «Lažali z synam zimoj tam ža. U susiedniaj pałacie byŭ chłopčyk ź dziciačaha doma, try hady. Lažaŭ adzin, biez cacak. Maja siabroŭka pryviezła jamu cacki, knižki. Kali jaho zabirali, usio pakinuli, skazali nielha», «Raspaviadu adzin vypadak: u sacyjalnym prytułku, kali my padaryli padarunki, adzin baćka, jaki lubić ałkaholnyja napoi, zabraŭ usio ŭ dziciaci sa słovami «doma budzieš karystacca». I ŭ takoj situacyi supracoŭniki ničoha nie mohuć zrabić, bo baćka nie pazbaŭleny baćkoŭskich pravoŭ».
Ciapier ludzi chvalujucca, kab padarunki zastalisia ŭ dziciaci.
Sama ž Eła pryznajecca, što navat nie paśpiavaje adkazvać usim, chto choča dapamahčy: «Ź Vieraj pahutaryła, jana zasmuciłasia, imavierna, pakul nie zrazumieła, što adbyvajecca. Ja ŭ takoj situacyi ŭpieršyniu, tamu, na moj pohlad, joj nie treba vielizarnaja kolkaść rečaŭ, ježy i inšaha. My nie viedajem, jak da hetaha pastaviacca ŭ dziciačym domie».
Biełarusy dapamahli maładoj maci ź invalidnaściu zrabić ramont u internacie. Inakš dzicia zabrali b u dziciačy dom
Jak žyvie Vital Tysieŭ — aktyvist, jakomu biełarusy sabrali 45 tysiač jeŭra na terminovuju apieracyju i ŭratavali ad paraliču
«Lublu, kali biełarusy biełarusiacca»: u sacsietkach žartujuć z nadvorja i abmiarkoŭvajuć prablemy
«Biełarusy takija biełarusy». U tyktoku zachaplajucca, jak pasažyry dapamahli kiroŭcu tralejbusa ŭ Minsku
Ciapier čytajuć
Daišnik, jakoha źbiŭ mašynaj piensijanier pad Minskam, pamior u balnicy. Jamu zładzili pyšnaje pachavańnie18
Kamientary