Гісторыя 12‑гадовай Веры ў мінскай інфекцыйнай бальніцы настолькі ўразіла беларусаў, што цяпер чарга з ахвотных дапамагчы
Допіс мінчанкі, якая распавяла пра адзінокае дзіця ў бальніцы, набраў амаль паўмільёна праглядаў. Прывезлі ёй шмат, але цяпер людзі хвалююцца: ці дазволяць дзяўчынцы забраць падарункі ў дзіцячы дом.
Дзіця Элы Казак трапіла ў інфекцыйную бальніцу ў Мінску. Маці, якая ляжыць разам з дачкой, уразіла дзяўчынка з суседняй палаты — маленькую пацыентку прывезлі з дзіцячага дома.
«Добрая, прыемная, зваць Вера. Можа ў каго ёсць стары непатрэбны тэлефон. Мы пакуль свой далі пакарыстацца. Божачкі, як аказалася мала трэба для шчасця. З забаў у яе толькі размалёўкі ды фламастары. Калі ў каго ёсць і не шкада, можаце перадаць ёй, я думаю, дзіця будзе шчаслівае», — напісала Эла ў Threads.
Потым яна дадала, што паразмаўляла з дзяўчынкай і даведалася, што ў той ёсць тата — і Вера вельмі спадзяецца, што той сёлета забярэ яе дамоў.
Допіс завірусіўся — менш чым за суткі яго паглядзела каля паўмільёна чалавек. Шмат хто пытаўся, чым і як можна дапамагчы — нехта прапаноўваў прыгатаваць і прынесці смачнай дамашняй ежы, нехта цікавіўся патрэбамі ў адзенні і абутку, нехта быў гатовы набыць штосьці для творчасці.
Зрэдку гучалі і галасы песімістаў. Маўляў, шмат падарункаў толькі шкодзіць у такім выпадку, бо фарміруюць стаўленне да жыцця ў стылі: «мне ўсе павінны дапамагаць». Але скептыкі ўсё ж у меншасці.
У каментары прыйшлі і знакамітыя блогеры. Какабай, напрыклад, паабяцаў прывезці планшэт для гульняў.
У хуткім часе з’явіліся каментары людзей, якія ўжо паспелі з’ездзіць у інфекцыёнку і перадаць рэчы 12‑гадовай Веры. Тэлефон у дзяўчынкі ўжо ёсць, а вось салодкае просяць не прыносіць, бо яно можа выклікаць алергію.
У каментарах людзі распавядалі, што таксама траплялі ў такія сітуацыі: «Паклалі дзяўчынку гадоў 4-5, бацькі п’юць, стаіць пытанне аб пазбаўленні бацькоўскіх правоў. Дзіця трапіла ў бальніцу ў падраных калготках і брудным адзенні. Праз тыдзень у яе была гара цацак, размалёвак, адзення — мядсёстры смяяліся, што трэба будзе на выпіску грузавік замаўляць».
На жаль, не заўсёды канец гісторыі быў шчаслівы: «Ляжалі з сынам зімой там жа. У суседняй палаце быў хлопчык з дзіцячага дома, тры гады. Ляжаў адзін, без цацак. Мая сяброўка прывезла яму цацкі, кніжкі. Калі яго забіралі, усё пакінулі, сказалі нельга», «Распавяду адзін выпадак: у сацыяльным прытулку, калі мы падарылі падарункі, адзін бацька, які любіць алкагольныя напоі, забраў усё ў дзіцяці са словамі «дома будзеш карыстацца». І ў такой сітуацыі супрацоўнікі нічога не могуць зрабіць, бо бацька не пазбаўлены бацькоўскіх правоў».
Цяпер людзі хвалююцца, каб падарункі засталіся ў дзіцяці.
Сама ж Эла прызнаецца, што нават не паспявае адказваць усім, хто хоча дапамагчы: «З Верай пагутарыла, яна засмуцілася, імаверна, пакуль не зразумела, што адбываецца. Я ў такой сітуацыі ўпершыню, таму, на мой погляд, ёй не трэба велізарная колькасць рэчаў, ежы і іншага. Мы не ведаем, як да гэтага паставяцца ў дзіцячым доме».
Беларусы дапамаглі маладой маці з інваліднасцю зрабіць рамонт у інтэрнаце. Інакш дзіця забралі б у дзіцячы дом
Як жыве Віталь Тысеў — актывіст, якому беларусы сабралі 45 тысяч еўра на тэрміновую аперацыю і ўратавалі ад паралічу
«Люблю, калі беларусы беларусяцца»: у сацсетках жартуюць з надвор’я і абмяркоўваюць праблемы
«Беларусы такія беларусы». У тыктоку захапляюцца, як пасажыры дапамаглі кіроўцу тралейбуса ў Мінску
Цяпер чытаюць
Даішнік, якога збіў машынай пенсіянер пад Мінскам, памёр у бальніцы. Яму зладзілі пышнае пахаванне18
Каментары