Kampaniju «ŁadaHarant», jakaja raniej była adnym z bujnych zabudoŭščykaŭ Minska, pryznali bankrutam. Ekanamičny sud Minska 5 maja adkryŭ praces likvidacyi, jaki pavinien zaviaršycca da studzienia 2027 hoda, paviedamlaje Office Life.
Firmu bolš za 30 hadoŭ tamu stvaryŭ pradprymalnik Alaksiej Vahanaŭ. Spačatku jana nazyvałasia «Łada OMS-Chołdynh». U svoj čas kampanii, źviazanyja z Vahanavym, aktyŭna zajmalisia budaŭnictvam žylla ŭ Minsku i ŭźviali kvartały na praśpiekcie Dziaržynskaha, vulicach Ščorsa, Majakoŭskaha, Hrušaŭskaj, Čyhunačnaj i ŭ inšych rajonach.
Adnak nie ŭsie prajekty akazalisia paśpiachovymi. Adzin z samych viadomych — hatelny kompleks Novotel Minsk Mayakovskaya — tak i nie byŭ zavieršany. Paźniej niedabudavany abjekt pierajšoŭ dziaržavie i byŭ pierarobleny pad miedycynskuju ŭstanovu. Kampanija «Łada OMS-Inžynirynh», jakaja zajmałasia hetym prajektam, zbankrutavała ŭ 2024 hodzie i paśla była likvidavanaja.
Na siońniašni dzień u «ŁadaHarant» zapazyčanaść pierad kredytorami składaje kala 4,3 miljona rubloŭ. Pry hetym košt jaje aktyvaŭ aceńvajecca prykładna ŭ 1 miljon rubloŭ. Siarod majomaści — hrošy na rachunkach, debitorskaja zapazyčanaść, nieruchomaść, enierhietyčnyja abjekty, a taksama akcyi TK Banka i Banka BiełVEB.
Taksama za kampanijaj ličacca traktar MTZ i samazvał HAZ, ale ich faktyčnaje miescaznachodžańnie ciapier nieviadomaje. Jašče ŭ 2020 hodzie techniku pieradali inšaj firmie.
Sam Alaksiej Vahanaŭ apošnim časam bolš źviazany z aŭtamabilnaj halinoj. Letaś źjaviłasia infarmacyja, što zavod «Junison», da jakoha jon mieŭ dačynieńnie,,trapiŭ u sudovyja spravy ab mahčymym prymusovym pierachodzie majomaści dziaržavie. Taksama pradstaŭniki «Łada OMS Techna» prapanoŭvali arhanizavać vypusk śpiecyjalnych aŭtamabilaŭ dla ludziej ź invalidnaściu na bazie «Brestmaša».
Ciapier čytajuć
Siłaviki śćviardžajuć, što zatrymali dvuch mužčyn za hałasavańnie na vybarach u KR. Ale ci možna hetamu vieryć?14
Kamientary