Biełaruskija ŭłady, vidać, rychtujucca prymusova zabrać majomaść jašče adnaho pradpryjemstva z zamiežnym kapitałam — aŭtazavoda «Junison». Hetu infarmacyju zaŭvažyła vydańnie «Lusterka» na sajcie Viarchoŭnaha suda, dzie «Junison» fihuruje ŭ pieraliku spraŭ ab kanfiskacyi majomaści. Raniej pa takoj ža schiemie dziaržava nacyjanalizavała byłyja restarany McDonald’s (kampanija «MAK.by»).
Zavod «Junison» znachodzicca ŭ vioscy Abčak pad Minskam i byŭ zasnavany jašče ŭ 1996 hodzie jak sumiesnaje biełaruska-brytanskaje pradpryjemstva. Za svaju historyju zavod vypuskaŭ aŭto brendaŭ Ford, KIA, Samand, a z 2020 pa 2021 hod — kitajskija mašyny Changan. U 2022 hodzie pradpryjemstva trapiła ŭ śpis kampanij, udzielnikam jakich zabaroniena rasparadžacca akcyjami biez dazvołu dziaržavy.
Ciapier Dziaržkammajomaść padała pazoŭ u Ekanamičny sud Minska z patrabavańniem kanfiskacyi majomaści «Junisona» nibyta z matyvaŭ «hramadskaj nieabchodnaści». Heta adbyvajecca na padstavie sakretnaha zakona, padpisanaha Łukašenkam u 2023 hodzie, jaki dazvalaje zabirać majomaść u kampanij z tak zvanych «niedružalubnych krain». Zakon praduhledžvaje i mahčymaść zamieny kiraŭnictva pradpryjemstva na pradstaŭnikoŭ ułady abo poŭnuju nacyjanalizacyju.
U sudzie ŭžo adbylisia try pasiadžeńni, ale padrabiaznaści nie raskryvajucca. U krasaviku «Junison» mieŭ zapazyčanaść pierad biudžetam, ale da maja jaje pahasiŭ. U lutym u dakumientach prajšli źmieny, źviazanyja z kiraŭnictvam pradpryjemstva.
Pakul ža zavod praciahvaje dziejničać i navat šukaje rabotnikaŭ — niekalki vakansij raźmieščanyja ŭ dziaržaŭnym banku zaniataści.
U harach Kyrhyzstana z drona adšukali cieły źnikłych biełaruskich alpinistaŭ8
Kamientary