Viadomy łahatyp ciapier budzie naležać siabroŭcy Viktara Łukašenki
«Marskaja havań» praciahvaje źbirać tavarnyja znaki «Biełryby» paśla nabyćcia płoščaŭ pradpryjemstva. Na hety raz «Biełryba» pieradała kampanii pravy na dva svaje tavarnyja znaki.
Siarod ich — łahatyp pradpryjemstva. Infarmacyja pra heta jość u rejestry tavarnych znakaŭ Nacyjanalnaha centra intelektualnaj ułasnaści Biełarusi, piša Office Life.
U druhoj pałovie 2025 hoda kampanija «Marskaja havań» nabyła płoščy zbankrutavanaha pradpryjemstva «Biełryba» ŭ Minsku. U lutym 2026 hoda my paviedamlali, što paśla hetaha «Marskaja havań» vyrašyła abnavić rehistracyju troch jaho tavarnych znakaŭ, u tym liku adnaho łahatypa.
Z aficyjnaha biuletenia NCIS Biełarusi vynikaje, što ŭ druhoj pałovie sakavika 2026 hoda «Biełryba» pieradała «Marskoj havani» pravy na jašče adzin svoj łahatyp, a taksama na vyjavu, jakaja čymści nahadvaje vierchniuju častku vakuumnaj upakoŭki z rybaj.
Pieršapačatkova «Biełryba» padała zajaŭku na ich rehistracyju ŭ siaredzinie lipienia 2002 hoda. Sama rehistracyja adbyłasia ŭ kancy vieraśnia 2004 hoda.
Abodva tavarnyja znaki zarehistravanyja ŭ piaci kłasach tavaraŭ. Ciapier kampanija «Marskaja havań» moža vykarystoŭvać ich, naprykład, dla ŭpakoŭki tavaraŭ, kansiervavanych charčovych praduktaŭ, ryby i h.d.
Dyrektaram kampanii «Marskaja havań» źjaŭlajecca biełaruskaja biznesvumen, siabroŭka Viktara Łukašenki Ludmiła Niaronskaja. Siarod jaje aktyvaŭ — rasijskaja kampanija «Sajuznyja promysły», rybapierapracoŭčy zavod u Kaladzičach, sietka bistro «Rybny dom «Marskija siezony» i inš. Akramia hetaha, kampanija buduje jašče adzin zavod pa pierapracoŭcy ryby ŭ SEZ «Viciebsk».
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam24
Kamientary
Ni viedaju jak dzie a u Babrujsku była dobraja infrastruktura vialikija na toj čas sučasnyja ladoŭni .