IT-miljanier Hurski: Prafiesija budučyni — šamany promptu

Biełaruski IT-pradprymalnik Juryj Hurski, biznes jakoha ciapier aceńvajecca ŭ $1 miljard, u intervju jutub-prajektu «Eto Osietinskaja» paraŭnoŭvaje bum vakoł ŠI sa źjaŭleńniem iPhone: spačatku funkcyjanalnaściu zacikavilisia technary, a paśla ŭsie astatnija.

Jon adznačaje, što ciapier my na stadyi «masavaha vyprabavańnia fišak», kali karystalniki ekśpierymientujuć z roznymi madelami, ale pakul nie całkam razumiejuć ich sens. U toj ža čas štučny intelekt raspaŭsiudžvajecca značna chutčej, jaho ŭniosak adčuvalny ŭ roznych śfierach.

Pa słovach Hurskaha, ŠI pierš za ŭsio spraścić dostup da pasłuh, jakija raniej byli darahimi i dastupnymi tolki dla abmiežavanaha koła ludziej, jakija mieli hrošy:

«Adbudziecca vielmi mocnaja demakratyzacyja pasłuh i servisaŭ, jakija raniej kaštavali doraha i byli dastupnyja tolki abranym. Raniej, kab mnie zrabić, naprykład, niejkaje cikavaje rasśledavańnie, mnie treba było naniać jakoje-niebudź analityčnaje ahienctva, zapłacić kuču hrošaj, pačakać. Jany mnie rabili resiorč. Ciapier ja rablu pravilny prompt u GPT, i jon mnie sam robić za 15 chvilin».

Toje ž tyčycca, naprykład, fitnes-koŭčynhu abo jurydyčnych pasłuh, jakija ciapier kaštujuć sotni dalaraŭ u hadzinu. U budučyni, adznačaje Hurski, štučny intelekt zrobić ich masavymi, tannymi i bolš prafiesijnymi.

Hurski vielmi čakaje, kali heta ž adbudziecca na ŭzroŭni jurystaŭ, tamu što ich pasłuhi vielmi darahija. «Tak, ja chaču, kab u mianie byŭ ŠI-juryst. (…) Ja nie liču, što, naprykład, zadača napisać papieru — heta zadača dla žyvoha čałavieka. Heta idealnaja zadača dla štučnaha intelektu».

«I heta budzie adbyvacca pastupova, zakranajučy ŭsio bolš halin, usio bolš rečaŭ, jakija byli niedastupnyja. I jak śledstva, z adnaho boku, źjavicca nieabchodnaść asvojvać inšyja prafiesii, tamu što častka prafiesij stanie niepatrebnaj. Heta adbudziecca dastatkova chutka. Ale źjaviacca novyja prafiesii, pa-pieršaje. A pa-druhoje, ja dumaju, što ŭ cełym jakaść žyćcia siaredniaha čałavieka vyraście», — davodzić biznesmien.

Jakija novyja prafiesii źjaviacca

Hurski zaŭvažaje, što my pakul nie viedajem nazvaŭ novych prafiesij.

«Raniej u nas było šmat dyzajnieraŭ, a zaraz u nas jość adzin dyzajnier, jaki ŭmieje pracavać sa štučnym intelektam, jaki robić kreatyvy dla rekłamy. Jak jaho nazvać, składana zrazumieć. Heta ŭžo novaja rola zusim. Bo jaho zadača ŭžo nie malavać. Jaho zadača razumieć, jaki kreatyŭ budzie dobra pracavać, (…) i pravilna pierapisać prompt».

U vyniku ŭźnikaje patreba ŭ ludziach, jakija ŭmiejuć pravilna kamunikavać z madelami štučnaha intelektu — tak zvanyja «šamany promptaŭ».

Pavialičyć

Hurski padzialiŭsia svaim dośviedam kamunikacyi z ChatGPT:

«U mianie byŭ prompt, musić, staronak piać. Ja tam prosta całkam apisvaŭ sutnaść praduktu, sutnaść zadačy. (…) Tam byli spasyłki na krynicy, kudy hladzieć, byli spasyłki na toje, kudy nie hladzieć».

Što ahulnaha ŭ ŠI i ahrarnaj revalucyi

Hurski zapeŭnivaje: «U kančatkovym vyniku, ja praktyčna ŭpeŭnieny, što my pryjdziem da biezumoŭnaha dachodu».

Pa jaho słovach, taki dachod užo isnuje ŭ mnohich krainach u vyhladzie pracoŭnych miescaŭ, jakija datujucca. Ale jany nasamreč nie patrebnyja:

«Heta pierahružanyja dziaržavy, dzie istotnaja častka nasielnictva zaniataja. Chacia heta možna było daŭno ŭžo aŭtamatyzavać. Toje, što Mask sprabuje ŭ Amierycy ciapier biespaśpiachova zrabić».

Hurski zaŭvažaje, što dla jaho heta padobna da ahrarnaj revalucyi:

«U Rasii, naprykład, da revalucyi, ja ciapier nie pamiataju kolki, (…) 95 ci 96% — heta byli sialanie, jakija arali rukami ziamlu. Ciapier ich tam zastałosia paru pracentaŭ. (…) U Amierycy dva ci try pracenty fiermieraŭ. I ničoha nie adbyłosia.

Heta značyć prosta dajšli inšyja roli, inšyja prafiesii, i čałaviek pazbaviŭsia ad vielmi manatonnaj, rucinnaj pracy».

Tamu, praciahvaje biznesmien, pieršaje, što zrobić ŠI, «pazbavić nas ad manatonnaj, rucinnaj pracy, jakaja, u pryncypie, adymaje zanadta šmat našaha tvorčaha žyćcia. I źjavicca bolš prafiesij, jakija patrabujuć ad čałavieka realna emacyjnaj addačy, tvorčaj addačy, uzajemadziejańnia ź inšymi».

Tamu Hurski dastatkova aptymistyčna hladzić na pierśpiektyvy ŭkaranieńnia ŠI ŭ žyćcio:

«Mnie zdajecca, što śviet stanie ŭsio ž taki lepšym, a nie horšym».

Padstaŭ dla dehradacyi stanie bolš

Razam z tym, jon adznačaje, što padstaŭ dehradavać stanie bolš. Kab abhruntavać svaju dumku, mužčyna zhadvaje svaju vučobu ŭ škole ŭ 1990-ch:

«Nam u škole zadavali napisać refierat. (…) Ja sadziŭsia ŭ tralejbus. Jechaŭ na inšuju častku horada, u biblijateku, tam pa indeksie doŭha šukaŭ patrebnyja knižki. U hetych knižkach šukaŭ doŭha patrebnuju staronku. Ručkami vypisvaŭ patrebnyja mnie skazy.

Adpaviedna jechaŭ nazad. Zadača napisać refierat — heta była sapraŭdy składanaja zadača, jakaja patrabavała nieradavych arhanizacyjnych namahańniaŭ. Pamiać i hetak dalej. Ciapier heta robić ChatGPT. Ty prosta jamu havoryš: «Napišy mnie refierat». Jon piša».

Industryja padtrymki rozumu stanie vializnaj

Hurski zaŭvažaje, što ŭ budučym, kali štučny intelekt budzie vyrašać za ludziej intelektualnyja zadačy, źjavicca vialikaje zapatrabavańnie na «industryju padtrymańnia rozumu ŭ pracazdolnym stanie», padobna da taho, jak siońnia zapatrabavany fitnes i sport.

«Heta pravilnaja dumka, što funkcyi rozumu treba padtrymlivać hetak ža, jak i cieła. Vidavočna, što na hetym narodzicca šmat industryi ŭ hetuju epochu. Mabyć, buduć niejkija fitnes-brejn-hadzińniki. To-bok, ludzi buduć jak zajmacca sportam, tak i niejak padtrymlivać svoj [intelektualny] stan».

Hurski ličyć, što va ŭmovach, kali ŭ ludziej źjavicca bolš svabodnaha času, jany bolš buduć zajmacca samaraźvićciom. U jahonym vypadku asablivy intares vyklikaje miedytacyja, i jon bačyć u hetym kirunku vialiki patencyjał i źbirajecca stvaryć novuju kampaniju.

«Patencyjna heta moža stvaryć vializny rynak. Tamu što, kali zaraz čałaviek zaniaty nie vielmi jamu cikavaj pracaj i heta zajmaje 10-12 hadzin u dzień, vidavočna, što ŭ jaho prastory dla mocnaha raźvićcia niama».

80% ludziej budzie hulać u kampjutarnyja hulni

Adnak Hurski ćviaroza aceńvaje i patencyjnyja pahrozy. Bolšaść ludziej, na jaho dumku, zamiest raźvićcia buduć imknucca kampiensavać vyzvaleny čas prostymi krynicami dafaminu — videa, sacsietki, zabaŭlalny kantent. Jon prahnazuje, što tolki 10—20% nasielnictva skarystajucca novymi mahčymaściami dla samaraźvićcia. Astatnija 80% — vierahodna, pahłybiacca ŭ kampjutarnyja hulni.

U hetym kantekście Juryj pradkazvaje revalucyju ŭ halinie kampjutarnych hulniaŭ. Pavodle jaho, budučynia hulniavoha kantentu za hienieracyjaj na chadu z dapamohaj štučnaha intelektu. Hulni buduć stvaracca imhnienna, z unikalnymi siužetami i naładami pad kankretnaha čałavieka. Heta całkam źmienić halinu zabaŭ i budzie mocna pryciahvać ludziej.

• 5
• 3
• 3
• 4
• 4
• 0
• 0
• 0