Pavodle źviestak haziety The Washington Post, 83‑hadovy były prezident ZŠA Džo Bajden, jaki prachodzić lačeńnie ad raku prastaty ź mietastazami ŭ kości, u apošni čas prykmietna asłabieŭ i redka źjaŭlajecca na publicy.
Jak paviedamlaje vydańnie, paśla sychodu ź Biełaha doma Bajden u asnoŭnym pravodzić čas u vuzkim kole siamji, daŭnich siabroŭ i byłych pamočnikaŭ. Ludzi ź jaho atačeńnia raskazali žurnalistam na ŭmovach ananimnaści, što stan zdaroŭja byłoha prezidenta vyklikaje zaniepakojenaść, a lačeńnie, pavodle ich mierkavańnia, moža nie davać čakanaha vyniku.
Jany taksama ličać, što vosieńniu Bajdenu moža być ciažej chavać svajo asłablenaje stanovišča, bo ŭ listapadzie pavinny vyjści jaho miemuary i jamu spatrebicca ŭdzielničać u ich prezientacyi.
Raniej u lipieni amierykanski apielacyjny sud dazvoliŭ kansiervatyŭnamu analityčnamu centru Heritage Foundation atrymać aŭdyjozapisy i rasšyfroŭki hutarak Bajdena ź piśmieńnikam Markam Zvoniceram, jaki dapamahaŭ jamu rychtavać miemuary. Hetyja materyjały byli atrymanyja Ministerstvam justycyi ZŠA padčas rasśledavańnia spravy ab abychodžańni Bajdena z sakretnymi dakumientami. Jany stali adnoj z pryčyn, čamu śpiecyjalny prakuror Robiert Chur raniej acharaktaryzavaŭ Bajdena jak pažyłoha čałavieka z prablemami pamiaci.
Pytańni pra ŭzrost, fizičnuju vynoślivaść i kahnityŭnyja zdolnaści Bajdena zastavalisia adnoj z hałoŭnych tem padčas jaho prezidenctva. Asabliva vostra jany paŭstali paśla debataŭ z Donaldam Trampam letam 2024 hoda, kali Bajden vyhladaŭ stomlenym, havaryŭ słabym hołasam i časam hublaŭ chod dumki. Paśla chvali krytyki jon praź niekalki tydniaŭ admoviŭsia ad udziełu ŭ prezidenckaj honcy.
U mai 2025 hoda, praź niekalki miesiacaŭ paśla viartańnia Trampa ŭ Bieły dom, u Bajdena dyjahnastavali ahresiŭnuju formu raku prastaty. Pavodle acenki miedykaŭ, takoje zachvorvańnie ličycca nievylečnym, ale ŭ niekatorych vypadkach jaho možna kantralavać z dapamohaj lačeńnia.
Žonka byłoha prezidenta ZŠA Džył Bajden raniej raskazvała, što dyjahnaz staŭ dla siamji niečakanaściu. Pavodle jaje słoŭ, jany byli šakavanyja tym, što na momant vyjaŭleńnia chvaroba ŭžo dasiahnuła čaćviortaj stadyi i raspaŭsiudziłasia na kości. Pry hetym jana davała aściarožna aptymistyčnyja acenki i śćviardžała, što lačeńnie dapamahaje.
Paśla sychodu z pasady pradstaŭniki Bajdena doŭhi čas nie kamientavali padrabiaznaści jaho stanu. Vosieńniu 2025 hoda jaho ofis paviedamiŭ, što jon prachodzić pramianiovuju i harmanalnuju terapiju, a taksama pieranios apieracyju pa vydaleńni rakavych utvareńniaŭ skury.
Sam Bajden u pačatku lipienia, kali abviaščaŭ pra vychad svaich miemuaraŭ, koratka zajaviŭ, što praciahvaje lačeńnie i jano prachodzić «vielmi dobra».
Syn Bajdena patroliŭ Trampa
Bajden nazvaŭ Trampa łuzieram
Džył Bajden zajaviła, što padčas debataŭ z Trampam joj padałosia, byccam u jaje muža prosta na scenie zdaryŭsia insult
Bajden sudzicca z administracyjaj Trampa praz ułasnyja miemuary
Bajden: Ja zabyŭ pra Pucina bolš, čym mnohija viedajuć
Džo Bajden paśla zakančeńnia prezidenctva pieražyvaje finansavyja prablemy
Kamientary